Меҳмонлар Самарқандда
Ўзбекистон мусулмонлари идораси раиси, муфтий Усмонхон Алимов ҳазратлари “Ислом ҳамжиҳатлиги: Ўзбекистон-Озарбайжон мисолида” халқаро илмий-амалий анжуманида сўзлаган маърузасида Ўзбекистонда виждон ва эътиқод эркинлиги таъминланиб, диний бағрикенглик тобора мустаҳкамланаётгани, қисқа вақтда Қорақалпоғистонда “Имом Эшон Муҳаммад” масжиди, Хоразмда “Охун бобо” масжиди, Тошкентда “Сузук ота” масжидини катта мажмуа шаклида бунёд этилаётгани, Сурхондарёда Имом Термизий, Қашқадарёда Абу Муин Насафий мажмуаларининг қайта қурилаётгани, Бухорода Мир Араб олий мадрасаси ва Термиз шаҳрида Имом Термизий халқаро илмий-тадқиқот маркази иш бошлагани катта туҳфа бўлгани ҳақида сўз юритдилар.
Айниқса, Самарқандда Имом Бухорий халқаро илмий-тадқиқот маркази ташкил этилгани аждодларимизнинг бой маънавий мероси бутун ислом оламида кенг ўрганилишига имконият беришини таъкидладилар ҳамда Ҳазрати Имом мажмуасида Ўзбекистондаги Ислом цивилизацияси маркази, Ислом академиясининг очилиши ва мамлакатимиз ҳудудларида ақида, калом, фиқҳ, тафсир ва ҳадис мактабларининг ташкил этилиши диёримиздан яна Имом Бухорий, Имом Термизий, Имом Мотуридий, Бурҳониддин Марғилоний каби алломалар етишиб чиқишига катта ишонч уйғотишини айтдилар.
Муфтий ҳазратлари нутқини: “Фурсатдан фойдаланиб, Сиз азиз меҳмонларни диёримизнинг энг мўътабар масканлари бўлган Тошкент, Самарқанд ва Бухоро шаҳарлари бўйлаб, азиз-авлиёлар хоки поклари қўним топган жойларни зиёрат қилишга таклиф этаман”, деган таклиф билан якунладилар.
Муфтий ҳазратларининг таклифларига биноан анжуманга ташриф буюрган эътиборли меҳмонлар кеча Ҳазрати Имом мажмуасига зиёратга келиб Ўзбекистон мусулмонлари идораси ҳамда Ҳазрати Имом жоме масжиди билан танишдилар. сўнгра Ҳазрати Усмон Мусҳафини, Бароқхон мадрасасини, Қаффол Шоший ва Зиёвуддин Эшон Бобохон мангу қўним топган масканларни зиёрат қилдилар. Тошкент Ислом институтига бориб ўқитувчи ва талабалар билан самимий суҳбат қурдилар. Ундан кейин эса “Минор” жоме масжидига бордилар. Кечаги куннинг энг муҳим воқеаси хорижлик меҳмонларнинг Президент Шавкат Мирзиёев билан учрашуви бўлди.
Бугун тонгдан меҳмонлар муфтий ҳазрат бошчилигида «Афросиёб» тезюрар поездига ўтириб Самарқандга қараб йўлга тушган эди. Улар куннинг биринчи ярмида Самарқандга етиб боришди. Уларни вилоят раҳбарлари ва олиму уламолари, навқирон ёшлар ҳамроҳлигида катта хурсандчилик билан кутиб олишди. Нуфузли меҳмонлар “Регистон плаза» меҳмонхонасига жойлашди ва вақтни ғанимат билиб Имом Бухорий ҳазратларининг зиёратига ошиқдилар.
Жума намозини ушбу муборак масканда ўқидилар. Сўнгра Ўзбекистон Республикасининг Биринчи Президенти Ислом Каримовнинг қабрини зиёрат этишди. Энди эса шаҳардаги диққатга сазовор жойларни кўздан кечирмоқдалар.
Дамин ЖУМАҚУЛ
Куала-Лумпурда “Ўзбекистон-Малайзия: креатив ва зиёрат туризми” мавзусида фотокўргазма ташкил этилди
Мамлакатимизнинг Малайзиядаги элчихонаси томонидан Туризм қўмитаси ҳамда MARA Технология университети (UiTM) билан ҳамкорликда Ўзбекистоннинг туристик салоҳияти ва бой маданий меросига бағишланган фотокўргазма ўтказилди, деб хабар бермоқда “Дунё” АА.
Куала-Лумпур шаҳрида бўлиб ўтган “Ўзбекистон-Малайзия: креатив ва зиёрат туризми” номли тадбирда Малайзия Туризм, санъат ва маданият вазири Тионг Кинг Синг, Ислом туризм маркази бош директори Моҳаммад Фаисал, маҳаллий сиёсий ва ишбилармон доиралар, вазирлик ва идоралар, маданият ҳамда туризм соҳаси вакиллари, дипломатик корпус ҳамда ОАВ ходимлари иштирок этди.
Анжуман сўнгги йилларда Ўзбекистон ҳудудларида барпо этилган янги зиёрат туризми масканлари ҳамда UiTMнинг Санъат, дизайн ва медиа факультети сураткаш ва дизайнерларидан иборат ижодий жамоасининг шу йил 17–31 август кунлари Тошкент шаҳри, Самарқанд, Бухоро ва Хоразм вилоятларига амалга оширган ташрифи якунларига бағишланди.
Кўргазманинг очилиш маросимида Ўзбекистон элчиси Каромиддин Гадоев сўзга чиқиб, мамлакатимизда туризм ва маданият соҳаларида амалга оширилаётган тизимли ислоҳотлар, янги сайёҳлик йўналишлари ҳамда инвестициявий имкониятлар ҳақида атрофлича маълумот берди. У малайзиялик туроператор ва инвесторларни Ўзбекистон билан ҳамкорликни янада кенгайтиришга чақирди.
Ўз навбатида, Малайзия Ислом туризм маркази бош директори Моҳаммад Фаисал икки мамлакат ўртасида зиёрат туризми, маданият, олий таълим ва креатив иқтисодиёт соҳаларидаги алоқаларнинг кенгайиши ўзаро сайёҳлар оқимини оширишга хизмат қилаётганини таъкидлади. У Ўзбекистоннинг маданий, зиёрат ва қишки туризм йўналишлари Малайзияда тобора оммалашиб бораётганини алоҳида қайд этди.
Ўзбекистон мусулмонлари идораси Матбуот хизмати
