Билим юртида “Қувноқлар ва зукколар”
Истиқлол туфайли юртимизда барча соҳалар тараққиётига алоҳида эътибор берилди. Қайси жабҳага боқманг, ижобий янгиланишлар, улкан ўзгаришларнинг самараларини кўрамиз. Шулар қаторида диний соҳага ҳам мустақиллигимизнинг дастлабки йиллариданоқ жуда катта эътибор қаратиб келинмоқда. Бунинг биргина мисоли тариқасида Бош Қомусимиз бўлган Конституциямизда ҳам ўз аксини топган, бундан ташқари Ўзбекистон Республикасининг биринчи Президенти И. Каримовнинг Фармойишларига биноан мана неча йилдан буён Қурбон ва Рамазон ҳайит байрамларини ва энг асосийси бўлган ота-боболаримизнинг азалий орзусига айланган муборак ҳаж зиёратини ҳам эмин-эркинликда адо этиб келмоқда. Буларнинг барчаси мустақилликнинг бизга берган улкан имконияти ва Аллоҳ таолонинг бизга берган инояти деб биламиз.
Шу асосда Ўзбекистон мусулмонлари идорасининг 2016 йил тўртинчи чоракка мўлжалланган иш режасига мувофиқ, жорий йилнинг 29 октябрь куни “Муҳаммад ибн Аҳмад ал-Беруний” ўрта махсус ислом билим юрти талабалари орасида «Диний соҳада мустақиллик йилларида эришилган ютуқларни ёритиб берувчи “Қувноқлар ва зукколар” (КВН)» мусобақаси ўтказилди.
Танловни Қорақалпоғистон мусулмонлари қозиёти қозиси, “Муҳаммад ибн Аҳмад ал-Беруний” ўрта махсус ислом билим юрти мудири Шамсуддин Баҳоуддинов кириш сўзи билан очиб берди ва танлов иштирокчиларига омад тилади.
Танловда билим юрти 1-курс талабаларининг “Ниҳол” жамоаси, 2-курс талабаларининг “Йигитлар”, 3-курс талабаларининг “Қувноқ талабалар” жамоаси ва 4-курс талабаларининг “Беруний авлодлари” жамоалари иштирок этишди.Улар тўртта шарт бўйича ўзаро беллашдилар.
Танловда Бердақ номидаги Қорақалпоқ давлат университети, Ажиниёз номидаги Нукус давлат педагогика институтидан келган билим юрти ўқитувчилари ҳамда маънавият ва маърифат ишлари бўйича мудир ўринбосари, билим юрти ўқитувчиларидан иборат беш киши танловга ҳакамлик қилди.
Биринчи шартда таништирув (саломнома) шарти бўлиб, жамоалар ўзлари жамоа номи, унга берилган таъриф ва жамоа аъзолари ҳақида қисқа маълумот бериб ўтдилар. Қўшимча слайд ҳамда видеоролик ишларидан фойдаланилди.
Иккинчи шарт “Интернетдаги таҳдидлардан ҳимоя” китоби асосида тайёрланган тезкор савол-жавоб ўтказилди.
Учинчи шартда жамоалар мустақиллик йилларида диний соҳадаги ютуқларни ёритиб берувчи баннерлар, фото-видеослайд, плакатлар, шеърият олами, маърузалар билан иштирок этишди.
Тўртинчи шартда жамоалар уйга вазифа қилиб берилган “Диннинг ёшлар турмушидаги тутган ўрни” мавзуси орқали ажойиб саҳна кўринишларини иштирокчиларга ҳавола этишди.
Қизғин ва муросасиз кечган беллашув натижаларига кўра, биринчи даражали диплом билан 2-курс талабаларининг “Йигитлар” жамоаси, иккинчи даражали диплом билан 1-курс талабаларининг “Ниҳол” жамоаси, учинчи даражали диплом билан 3-курс талабаларининг “Қувноқ талабалар” жамоаси ва “Энг фаол иштирок этган жамоа” йўналиши бўйича 4-курс талабаларининг “Беруний авлодлари” жамоаси тақдирландилар. Шунингдек, иштирокчиларга билим юрти томонидан қимматбаҳо эсдалик совғалари топширилди.
САЛАМАТ КУДАЙБЕРГЕНОВ,
“Муҳаммад ибн Аҳмад ал-Беруний”
ўрта махсус ислом билим юрти ўқитувчиси
Тарихни бузиб кўрсатмаслик учун
Вазирлар Маҳкамаси ҳузуридаги Имом Бухорий халқаро илмий-тадқиқот марказида "Ислом маърифати, ҳадис илми ва Имом Бухорий мероси" ўқув курси ўтказилди. Мутахассислар томонидан ёдгорлик мажмуаси гид-экскурсоводлари учун ўтказилган машғулотлар доирасида экскурсия фаолияти билан боғлиқ ҳуқуқий, назарий ва амалий масалалар кўриб чиқилди, хабар бермоқда “Самаркандский вестник” нашри.
- Бу ерга ташриф буюрган ҳар бир зиёратчи фақат ибодат қилиш учун эмас, балки маънавий "озиқ" олиш учун ҳам бориши керак, - дейди Имом Бухорий халқаро илмий-тадқиқот маркази директори Ш.Зиёдов. - Бу ерда фаолият юритаётган гидларнинг малакасини ошириш тизимини йўлга қўяр эканмиз, уларга Имом Бухорийнинг бизга қолдирган меросини, бу мероснинг тарихий манбаларини чуқур ўргатишимиз шарт.
Курс доирасида мажмуага биринчи марта ташриф буюрган меҳмонлар билан мулоқотнинг ўзига хос хусусиятлари муҳокама қилинди. Хорижлик зиёратчиларга нафақат Имом ал-Бухорий ҳаётидаги фактлар ва диний қадриятларимизни етказиш, балки бой маданий меросимизни асраб-авайлаш ва етказиш каби долзарб масалалар кўтарилди.
Гид-экскурсоводлар ҳам ўз тажрибалари билан ўртоқлашиб, келгусидаги ишларни ташкил этиш бўйича таклифлар бердилар. Бу бевосита экскурсияларни ўтказиш пайтида юзага келадиган масалаларни муҳокама қилиш имконини берди.
Курс Ўзбекистон Республикаси Вазирлар Маҳкамаси ҳузуридаги Дин ишлари бўйича қўмита, Диний таълим соҳасида кадрлар малакасини ошириш ва қайта тайёрлаш институти, Имом Бухорий халқаро илмий-тадқиқот маркази, вилоят ҳокимлиги ҳамда Имом Бухорий ёдгорлик мажмуасини сақлаш ва унинг атрофини ободонлаштириш департаменти томонидан ташкил этилди.
Тарихий обидалар ва зиёратгоҳлар туризм салоҳиятининг муҳим қисми бўлган Самарқанд вилояти учун малакали мутахассисларни тайёрлаш алоҳида аҳамиятга эга. Меҳмонга ташриф буюриладиган жойнинг тарихи қанчалик тўлиқ ва тушунарли очиб берилиши гиднинг профессионаллигига боғлиқ. Шунинг учун ҳам гид-экскурсоводларнинг малакасини мунтазам ошириб бориш, уларнинг касбий билим ва кўникмаларини такомиллаштириш ҳамда замонавий хизмат кўрсатиш стандартларини жорий этиш Самарқандда туризм хизматлари сифатини оширишда устувор йўналишлардан бири бўлиб қолмоқда.
Ўзбекистон мусулмонлари идораси Матбуот хизмати
- «
- »