Ўзбек ва қозоқ халқлари азалдан яхши қўшни, дўст бўлиб яшаб келган. Бугун мамлакатларимиз ўртасидаги ўзаро ҳамкорлик ана шу тамойиллар асосида ривожланмоқда. Халқаро вазият тез ўзгариб, тобора мураккаблашиб бораётган ҳозирги кунда бундай дўстлик, ўзаро англашув янада муҳим аҳамият касб этмоқда. Икки мамлакат ўртасидаги диний соҳадаги ҳамкорликни янада мустаҳкамлаш, ўзаро фикр-мулоҳаза алмашиш мақсадида Қозоғистон Республикаси делегациясининг Юртимизга қилган ташрифи ҳам соҳа ривожи учун муҳим омил бўлиб хизмат қилади.

Юртимизга ташриф буюрган меҳмонлар бир неча юз йиллардан бери икки халқнинг ўзаро дўстлик рамзи сифатида пойтахтимиз марказида қад ростлаган “Шайх Хованди Тоҳур” ва “Тўлабий” мақбараларини зиёрат қилиш билан сафарларини бошлашди. Бир сўз билан айтганда, зиёрат уларга кўтаринки кайфият ва ўзгача руҳ бағишлади.

Қалблари зиёга тўлган меҳмонлар Тошкент ислом университетига ташриф буюришар экан, олийгоҳнинг тарих ва ҳозирни уйғунлаштирган ажойиб бинолари, талабалар учун яратилган шароитларни кўриб, тасаннолар айтишди. Шунингдек, университетда 200 дан ортиқ турли мавзулардаги ўзбек, рус ва қорақалпоқ тилларидаги китоблар, журнал ҳамда газеталардан иборат кўргазмадан баҳраманд бўлишди. Айниқса, “Қуръони карим маъноларининг ўзбекча таржимаси”, “Оилада фарзанд тарбияси”, “Дунё уламолари мурожаати”, “ИШИД фитнаси”, “Интернетдаги таҳдидлардан ҳимоя”, “Ислом ва ақидапараст оқимлар” каби юртимиз олимлари ҳамда тадқиқотчиларининг турли тиллардаги китоб ва қўлланмалари меҳмонларда чуқур қизиқиш уйғотди.

Шунингдек, меҳмонлар пойтахтимизнинг диққатга сазовор жойларини ҳам зиёрат қилишди. Жумладан, бир қатор меҳмонлар Ўзбекистон мусулмонлари идорасига ташриф буюришди. Уларни Ўзбекистон мусулмонлари идора раиси, муфтий Усмонхон Алимов ташриф билан қизғин қутлаб, икки қардош халқ азалдан дўсту биродар экани, ота-боболаримиз аҳил-иноқ бўлиб яшашгани, мамлакатларимиз раҳбарлари ҳам ушбу дўстликни ривожлантириш йўлида жуда улкан ишларни амалга оширишганини айтиб ўтди.

Ташриф доирасида бўлиб ўтган учрашувда мустақиллик йилларида Республикамизда дин соҳаси амалга оширилган ислоҳотлар, муҳтарам Биринчи Президентимиз Ислом Каримов раҳнамолигида бажарилган ишлар ҳақида алоҳида тўхтаб ўтилди. Меҳмонлар ўзларини қизиқтирган барча саволларга тўлақонли жавоб олишди. Мулоқот якунида меҳмонлар Ўзбекистон мусулмонлари идораси тизимида амалга оширилган ишларга ҳавас қилса арзийдиган даражада ташкил этилганини, бундан фақат ибрат олиш кераклигини таъкидлашди.

Юртимизга ташриф буюрган меҳмонлар Тошкент ислом институтига ҳам ташриф буюришди. Институт талабаларининг олийгоҳ, унда яратилган шарт-шароитлар тўғрисида рус, қозоқ, араб ва инглиз тилларида эркин гапириб беришлари, делегация аъзоларида жуда яхши таассурот қолдирди.

Маълумки, бугунги кунда мамлакатимизда янгидан-янги масжидлар қурилмоқда, айримлари таъмирланиб, чиройли ҳолатга келтирилмоқда. Жумладан, Тошкент шаҳрида қад ростлаган маҳобатли “Минор” жоме масжиди, яқинда намозхонлар ихтиёрига топширилган “Ислом ота” жоме масжидлари шулар жумласидандир. Пойтахтимизнинг кўркига кўрк қўшиб турган “Минор” жоме масжидига ташриф буюрган меҳмонлар, Мустақиллигимиз асосчиси Ислом Каримовнинг бевосита тавсиялари ва ташаббуслари билан қисқа муддат ичида ўзига хос меъморий услубда бунёд этилган ушбу жоме масжидни бетакрор бунёдкорлик рамзи сифатида эътироф этдилар.

Қардош Қозоғистон делегациясининг ташрифи икки мамлакат дўстона ҳамкорлик ришталари янада мустаҳкамланишига ўз ҳиссасини қўшади.

ЎМИ Масжидлар бўлими