Бисмиллаҳир Роҳманир Роҳийм
Аллоҳ таоло Бақара сурасининг 269-оятида шундай марҳамат қилади: "У зот кимни хоҳласа, ўшанга ҳикматни беради. Кимга ҳикмат берилса, унга кўп яхшилик берилган бўлади. Фақат ақл эгаларигина эсларлар".
Муфассир уламолар айтадилар: "Оятдаги ҳикматдан мурод илмдур". Айнан мана шу маънони қўллаб-қувватлайдиган ҳадиси шариф бор. Муовия ибн Абу Суфён розияллоҳу анҳу ривоят қилганлар. У зот: Пайғамбаримиз соллаллоҳу алайҳи васалламнинг: "Кимга Аллоҳ яхшиликни ирода қилса, уни динда фақиҳ (шариат илмларига моҳир) қилиб қўяди", деганларини эшитдим, дедилар. Қолаверса, илмнинг, олимларнинг фазилати хусусида мазкур ҳадисдан бошқа яна бир нечта ҳадиси шарифларни келтиришимиз мумкин. Бу ҳақида сўз очишимиз бежиз эмас. Чунки бугунги кунда айнан Аллоҳ таоло улуғлаган мана шундай илм соҳибларини, алалхусус, дин пешволаримизни ижтимоий тармоқларда баъзи бир кимсалар истеҳзо қилинаёттанини гувоҳ бўляпмиз. Буларнинг оқибати ҳақида тўхталиб ўтиш ниятимиз йўқ. Чунки олимни таҳқирлаган одамнинг оқибати барчамизга маълум. Фақатгина бир эслатма ўлароқ улуғларимизнинг сўзларидан бир иқтибос келтириб, сиз азизларга ўзингиз учун керак бўладиган хулосаларни олишингиз мақсадида тақдим этмоқчимиз.
Замонамиз олимларидан бири айтадилар: "Қачонки инсон ким биландир банд бўлса, одамларни кузатиб, камчиликларини ахтариб, ҳаёти фақатгина ўзгалардан кир қидириш билан ўтса, у энг аввало, ўзлигини, ўзини унутиб қўяди. Чунки бошқалар билан машғул бўлгани боис, ўзи билан шуғулланишга, ҳаётини ислоҳ қилишга вақти етмайди. Улгурмай қолади ва ўзини йўқотиб қўяди. Бу эса айнан шайтоннинг йўлидир. Зеро, шайтон одамлар билан кўп машғул бўлгани учун, уларнинг камчиликларини ипидан игнасигача билади. Унинг муаммоси шундаки, у ўзини эсидан чиқариб қўйган. Яъни, у одамзод билан шунчалар овораки, ўзи ҳақида ўйлашга вақти ҳам йўқ. Айтмоқчи бўлганимиз, қачон биз ҳам одамларни камчилигини қидириб, уларни истеҳзо қилиб, ишимиз фақат ғийбат ва фисқу-фужур бўлса, демак биз ҳам шайтоннинг улфати ўлароқ, унинг йўлидан кетяпмиз. Шайтоний услубни қўллаётган бўламиз. Бу эса оқибатимиз учун ўта хатарлидир". Иқтибос тугади. Менимча, барчамиз ўзимиз учун керакли хулосани олдик. Аллоҳ таоло оқибатимизни хайрли қилсин!
Қодиржон Умурзақов
Поп тумани "Муҳаммаджон қори"
жоме масжиди имом-хатиби
Ўзбекистон Республикаси Президенти Шавкат Мирзиёев энг азиз умуммиллий байрамимиз – Ватанимиз мустақиллиги эълон қилинганининг ўттиз уч йиллигини нишонлаш арафасида давлатимиз томонидан олиб борилаётган гуманистик сиёсатнинг амалий тасдиғи сифатида “Жазо муддатини ўтаётган, қилмишига чин кўнгилдан пушаймон бўлган ва тузалиш йўлига қатъий ўтган бир гуруҳ шахсларни афв этиш тўғрисида”ги Фармонни имзолади.
Фармонга мувофиқ, Ўзбекистон Республикаси Конституциясининг 109-моддаси 23-бандига асосан жазо муддатини ўтаётган ҳамда қилмишига чин кўнгилдан пушаймон бўлган ва тузалиш йўлига қатъий ўтган 522 нафар шахс афв этилди.
Афв этилган шахсларнинг 159 нафари асосий жазодан озод этилди, 303 нафари жазони ўташдан муддатидан илгари шартли озод қилинди, 60 нафарининг озодликдан маҳрум этиш жазоси енгилроқ жазо билан алмаштирилди.
Афв этилганларнинг 19 нафарини чет эл фуқаролари, 56 нафарини аёл, 25 нафарини 60 ёшдан ошган эркак, 233 нафарини ёшлар (шулардан, 1 нафари вояга етмаган) ҳамда 27 нафарини тақиқланган ташкилотлар фаолиятида қатнашган шахслар ташкил этади.
Фармон ижроси юзасидан афв этилган шахсларни оиласи ва яқинлари бағрига қайтариш, ижтимоий ҳаётга мослашиб, фойдали меҳнат билан шуғулланишлари, соғлом турмуш тарзини йўлга қўйиб, жамиятда муносиб ўрин топишлари учун уларга кўмак бериш бўйича масъул вазирлик ва идораларга тегишли топшириқлар берилди.
ЎзА