Айни кунларда юртимизнинг барча ҳудудларида ҳожиларимиз имом-хатиб ва мутасаддилар билан биргаликда “Янги Ўзбекистоннинг фидойиси бўлиб, маънавият тарғиботчисига айланамиз” деган эзгу шиор остида маънавий-маърифий тарғибот тадбирларида фаол иштирок этмоқда.
Ҳожи ота ва ҳожи оналар имом-хатиб ва маҳалла фаоллари билан бирга маҳаллаларда истиқомат қилувчи ижтимоий ҳимояга муҳтож, боқувчисини йўқотган, нотинч, ажрим ёқасида турган ҳамда моддий ва маънавий кўмак зарур бўлган оилалар ҳолидан хабар олиб, қимматли ваъз-насиҳатлар билан уларнинг кўнгилларига илиқлик олиб кириш баробарида хайрия ва эҳсонлар улашмоқда.
Бугунга қадар юртимизда 6 мингдан зиёд ана шундай маърифий ва хайрия тадбирлари ўтказилди. Уларда 22 мингдан ортиқ ижтимоий ҳимояга муҳтож аҳоли вакиллари қамраб олинди. Натижада оилавий низоларни бартараф этиш, ажрим ёқасидаги оилаларни яраштириш, нотўғри йўлга кириб қолган ёшларга тўғри йўл кўрсатиш каби мингдан зиёд масала ижобий ҳал этилди. Ишсиз фуқаролар ишга жойланди. Уйи таъмирталаб бўлганларнинг хонадонлари обод қилинди. Эҳтиёжманд оилаларга қарийб 550 миллион сўмдан зиёд моддий ёрдам кўрсатилиб, озиқ-овқат маҳсулотлари тақдим этилди.
Мазкур эзгу ташаббуслардан аҳолимиз вакиллари миннатдор бўлиб, ўз ташаккурларини изҳор этишмоқда.
Шу каби тадбирлар юртимиз бўйлаб давом этмоқда.
Ўзбекистон мусулмонлари идораси Матбуот хизмати
Устоз – жамиятни олға бошловчи ва унинг эртанги кунини таъминловчи, таъбир жоиз бўлса, бир йўлчи юлдузлардир. Устозсиз ҳеч бир жамият камолга етмаган. Шунинг учун ҳам халқимизда “Устоз отангдек улуғ” деган чиройли иборалар бор. Шундай экан, устознинг ҳам ота-онадек ҳақлари бор.
Пайғамбаримиз соллаллоҳу алайҳи ва саллам мураббийларга олимларни ҳурматлаш, муаллим ва устозларни улуғлаш борасида кўпгина қимматли кўрсатмалар берганлар.
Имом Аҳмад, Имом Табароний ва Ҳоким Убода ибн Сомитдан розийаллоҳу анҳу ривоят қилади. Расулуллоҳ соллаллоҳу алайҳи ва саллам: “Кексаларимизни улуғламаган, кичикларимизга меҳрибон бўлмаган ва олимларимизни (ҳақини) билмаган менинг умматимдан эмас”, дедилар.
1-октябрь – ўқитувчи ва мураббийлар куни муносабати билан қорақалпоғистонлик диний соҳа ходимларимиз Қорақалпоғистон мусулмонлари қозиёти тизимидаги масжидларда кўп йиллар давомида хизмат қилган, бугунги кунда нафақада бўлган нуроний имом домлалар ҳолидан хабар олиб, байрам билан қутлади.
Қорақалпоғистон мусулмонлари қозиёти
Матбуот хизмати