Юрт равнақи ва дин ривожи йўлида фахрий имом-хатиблар самарали ва фидойилик билан меҳнат қилганлар. Айниқса, ёшларни Ватанга садоқат, элу юртга меҳр-муҳаббат руҳида тарбиялаш, эътиқоди мустаҳкам комил инсон сифатида етиштиришда ушбу уламоларнинг хизмати ва ўрни беқисдир.
Фарғона вилоятидаги устозлардан Абдували домла Ҳафизов, Саидваққос домла Минаваров, Абдураҳим домла Мўминовлар ва “Ширмонпазлик” масжиди имом-хатиби Юсуфбурҳон домла Қодировлар ҳам ана шундай масъулиятли йўлда фаолият олиб боришган.
Мамлакатимиз мустақиллигининг ўттиз уч йиллиги муносабати билан Фарғона вилояти вакиллиги томонидан ташкил этилган тадбирда соҳада узоқ йиллар самарали меҳнат қилган устозлар ҳолидан хабар олиниб, хизматлари эътибор ва эътирофда экани билдирилди.
Фарғона вилояти бош имом-хатиби Убайдуллоҳ домла Абдуллаев устозлар билан самимий мулоқот қилди. Унда диний-маърифий соҳадаги ўзгариш ва ислоҳотлар ҳақида гапирилди, ўтган кунлар хотирланиб, бугунги кун учун шукрона келтирилди.
Якунда юрт тинчлиги, халқ фаровонлиги, мустақиллигимиз барқарор бўлишини сўраб, дуога қўл очилди. Устозларга эсдалик совғалари топширилди.
Фарғона вилояти вакиллиги
Матбуот хизмати
Устоз – жамиятни олға бошловчи ва унинг эртанги кунини таъминловчи, таъбир жоиз бўлса, бир йўлчи юлдузлардир. Устозсиз ҳеч бир жамият камолга етмаган. Шунинг учун ҳам халқимизда “Устоз отангдек улуғ” деган чиройли иборалар бор. Шундай экан, устознинг ҳам ота-онадек ҳақлари бор.
Пайғамбаримиз соллаллоҳу алайҳи ва саллам мураббийларга олимларни ҳурматлаш, муаллим ва устозларни улуғлаш борасида кўпгина қимматли кўрсатмалар берганлар.
Имом Аҳмад, Имом Табароний ва Ҳоким Убода ибн Сомитдан розийаллоҳу анҳу ривоят қилади. Расулуллоҳ соллаллоҳу алайҳи ва саллам: “Кексаларимизни улуғламаган, кичикларимизга меҳрибон бўлмаган ва олимларимизни (ҳақини) билмаган менинг умматимдан эмас”, дедилар.
1-октябрь – ўқитувчи ва мураббийлар куни муносабати билан қорақалпоғистонлик диний соҳа ходимларимиз Қорақалпоғистон мусулмонлари қозиёти тизимидаги масжидларда кўп йиллар давомида хизмат қилган, бугунги кунда нафақада бўлган нуроний имом домлалар ҳолидан хабар олиб, байрам билан қутлади.
Қорақалпоғистон мусулмонлари қозиёти
Матбуот хизмати