Кўрик-танловнинг республика босқичи ғолиби аниқланди
Қорақалпоғистон мусулмонлари қозиётига қарашли масжидларда хизмат қилиб келаётган имом-хатиб ва имом-ноиблари иштирокида “Йил имоми –2024” кўрик-танловининг республика босқичи бўлиб ўтди. Унда қозиёт қозиси Б.Разов, қозиёт ходимлари, Нукус Муҳаммад ибн Аҳмад ал-Беруний мадрасаси ходимлари, барча масжид имом-хатиблари ва имом-ноиблари иштирок этди.
Ўзбекистон мусулмонлари идораси тарафидан ҳар йили ташкиллаштириладиган “Йил имоми” кўрик-танловида ижодий изланишлари, халқимизнинг турмуш ободонлиги ва Ислом дини ривожига ҳисса қўшган, шунингдек, имом-хатибларнинг диний ва дунёвий билимлари, ўз ҳудудида олиб бораётган тарғибот ишлари, ахборот воситаларида чиқишлари бўйича фаоллик кўрсатган, танловнинг биринчи босқичида ғолиб бўлган имом-хатиб ва имом-ноиблар беллашди.
Якуний натижаларга кўра, Қўнғирот тумани “Мўлла Исхоқ” жоме масжиди имом-хатиби Алтинбек Зинуллаев кўрик-танловнинг иккинчи босқичи ғолиби бўлди. У Қорақалпоғистон мусулмонлари қозиёти тарафидан диплом ва эсдалик совғалари билан тағдирланди ва Тошкент шаҳрида бўлиб ўтадиган республика босқичига йўлланма олди.
Қорақалпоғистон мусулмонлари қозиёти
Матбуот хизмати
Ўзбекистонда жаҳон хаттотлар танлови 26 августда эълон қилинади
Ўзбекистонда ноёб Қуръон яратиш бўйича жаҳон хаттотлар танлови 26 август куни Ўзбекистондаги Ислом цивилизацияси марказида эълон қилинади. Танлов «Ислом цивилизацияси: янги нигоҳ — янги кашфиётлар» халқаро медиафоруми доирасида ўтказилади, хабар бермоқда UzDaily.uz.
«Дунё Қуръони: хаттотлик анъаналаридан — келажак мероси сари» лойиҳасини хаттот ва Ислом цивилизацияси маркази ҳузуридаги Хаттотлик мактаби директори Ҳабибулло Солиҳ тақдим этади. Бу ҳақда тадбир ташкилотчиси хабар берди.
Танлов доирасида турли мамлакатлар ва хаттотлик мактабларининг исломий хаттотликдаги энг яхши анъаналарини бирлаштирган ноёб Қуръон яратиш кўзда тутилган.
Танловнинг тантанали эълони «Асрларни бирлаштирувчи мерос. Ислом цивилизациясининг маънавий мазмунлари» мавзусидаги ялпи сессиянинг якуний қисми бўлади. Сессия 26 август куни соат 09:30 дан 12:00 гача ўтказилади.
Тадбир доирасида оммавий ахборот воситаларининг стереотиплар ва исломофобияни енгишдаги ролига бағишланган халқаро муҳокама ҳам бўлиб ўтади. Унда Ислом ҳамкорлик ташкилоти, Жазоир, Уммон, Покистон, Саудия Арабистони, Ироқ, Мали ва Ўзбекистоннинг давлат тузилмалари ҳамда ОАВ вакиллари иштирок этади.
Форум дастуридан Қуръоний ва қўлёзма меросга бағишланган лойиҳалар ҳам ўрин олган. Улар орасида «114 Қуръон: ислом оламининг 114 хаттотлик дурдонаси», «Катта Лангар Қуръони: ҳақиқат ва ривоятлар» халқаро лойиҳаси ҳамда «Сунъий интеллект — қадимий қўлёзмаларни ўқишнинг рақамли калити» лойиҳаси бор.
Ўзбекистонда хаттотликни ривожлантиришга институционал даражада ҳам эътибор қаратилмоқда. Ислом цивилизацияси маркази ҳузурида Президент Шавкат Мирзиёев ташаббуси билан ташкил этилган Хаттотлик мактаби фаолият юритмоқда. Мактабда сулс, насх, настаълиқ, руқъа, девоний ва куфий каби анъанавий ёзув услубларини ўргатиш режалаштирилган.
Хаттотлик санъати Самарқанд вилоятидаги янги Имом ал-Бухорий мажмуасида ҳам намоён этилган. Мажмуа пештоқлари ва айвонлари деворлари «Саҳиҳ ал-Бухорий»дан олинган ҳадислар битилган ёзувлар билан безатилган. Мажмуа ҳузурида Имом Бухорий халқаро илмий-тадқиқот маркази ва Ҳадис илмий мактаби ҳам фаолият юритади.
Халқаро медиафорумнинг асосий майдони Ўзбекистондаги Ислом цивилизацияси маркази бўлади.
Тадбирда қарийб 50 мамлакатдан медиа ва экспертлар ҳамжамиятининг 300 га яқин вакили иштирок этади. Улар орасида медиакомпаниялар, ахборот агентликлари ва телеканаллар раҳбарлари, журналистлар, продюсерлар, олимлар ҳамда креатив индустрия мутахассислари бор.
Ўзбекистон мусулмонлари идораси матбуот хизмати
