“Бисмиллаҳ” деган сўзни кўп ишлатамизу, аммо унинг жуда кўплаб фазилатларидан хабардор эмасмиз. Уйга кирганда ва уйдан чиққанда, овқатланишдан, ичимлик ичишдан олдин ёки бирор нарса ёзганда шу каби кўплаб ҳолатларда “Бисмиллаҳ”ни айтиш Расулуллоҳ соллаллоҳу алайҳи васалламнинг суннатларидир.

Расулуллоҳ соллаллоҳу алайҳи васаллам: “Ҳар бир аҳамиятли иш “Бисмиллаҳир роҳманир роҳийм” билан бошланмас экан, унинг охири кесикдир”, деганлар.

Бошқа бир ҳадис шарифда: “Қайси иш “Бисмиллаҳир роҳманир роҳийм” билан бошланмас экан, у ишда барака бўлмайди” дейилган.

Демак, “Бисмиллаҳир роҳманир роҳийм” деб бошланган ишда барака бўлар экан. Қолаверса, “бисмиллаҳ” айтилган ишдан шайтон қочади.

Агар “бисмиллаҳ”ни айтиб деразани ёпсангиз шайтон уйингизга кира олмайди.

Агар уйга “бисмиллаҳ” деб кирсангиз, шайтон уйингизга кира олмайди.

Агар кўчага “бисмиллаҳ”ни айтиб чиқсангиз, шайтон сизга ҳамроҳ бўла олмайди.

Агар “бисмиллаҳ”ни айтиб деразани очсангиз, шайтон уйингизга кира олмайди.

Агар овқат қилишни “бисмиллаҳ” билан бошласангиз, шайтон овқатингизга шерик бўла олмайди.

Агар таҳоратни “бисмиллаҳ валҳамду лиллааҳ” деб бошласангиз, таҳоратингиз сингунича фаришталар сизга яхшилик, мукофот ва савоблар ёзиб турадилар.

“Бисмиллаҳир роҳманир роҳийм” Аллоҳ таолонинг Китоби – Қуръони каримдан бир оят бўлгани учун ҳам уни кўп айтиш билан улкан ажрларга эга бўлинади. Қолаверса, ҳар бир ҳарф учун 10 дан 700 гача савоб берилади.

“Бисмиллаҳир роҳманир роҳийм” 19 ҳарфдан иборат, бир айтиш 190 савобга тенг бўлади. Ҳар бир ҳарф Аллоҳнинг марҳамати билан кўпайтирилиб, 700 минг баробарга етади ва Аллоҳнинг фазли ила яна ҳам кўпаятирилади. Агар бир кунда ҳеч бўлмаганда 50, 100 марта “Бисмиллаҳ”ни айтишга одат қилсак, қанча савобга ҳамда Аллоҳни зикр қилишга муваффақ бўлишимиз мумкин.

Даврон НУРМУҲАММАД