Ҳамдардлик билдирамиз
Ўзбекистон мусулмонлари идораси жамоаси Фарғона вилояти бош имом-хатиби ўринбосари, Қувасой шаҳар бош имом-хатиби Алишер домла Наимовнинг волидаи муҳтарамалари вафоти муносабати билан у кишининг оила аъзолари ва яқинларига чуқур таъзия изҳор этади.
Аллоҳ таоло марҳума онахонни Ўз мағфиратига олсин, иймонлари ва солиҳ амалларини ўзларига ҳамроҳ айласин. Охиратларини обод этиб, жойларини Фирдавс жаннатларидан қилсин!
Охират сафарига кузатилган онахон эл-юрт корига ярайдиган, дину диёнат йўлида хизмат қиладиган фарзанд ва невараларни ўстирдилар, чиройли тарбия қилдилар.
Ҳақ таоло марҳума онахоннинг аҳли оиласи, фарзанду аржумандлари ва яқинларига чиройли сабр бериб, бу мусибатларини яхшиликлар ила тўлдирсин.
Ўзбекистон мусулмонлари идораси жамоаси, уламолари, имом-домлалари ва ўқитувчи-мударрислари номидан марҳума онахоннинг яқинларига, хусусан, Алишер домла Наимовга ҳамдардлик билдирамиз.
Жаноза намози эртага, 25 сентябрь куни соат 10:00 да Қувасой шаҳар Боғбон МФЙ, Маърифат кўчиси, 50-уйда марҳуманинг хонадонида ўқилади.
Ўзбекистон мусулмонлари идораси
Мурожаатлар тезкор ва манзилли ҳал этилмоқда
Ўзбекистон мусулмонлари идораси раҳбарияти томонидан аҳоли билан ўтказилаётган очиқ мулоқотлар фуқаролар масалаларини жойида ва ижобий ҳал этишда муҳим омил бўлмоқда.
Хусусан, бугун, 9 сентябрь куни Диний идора раиси ўринбосари Муҳаммадолим домла Муҳаммадсиддиқов навбатдаги фуқаролар қабулини ўтказди.
Унда масжидлар очилиши, диний таълим, хайрия, ишга жойлашиш, оилавий ва уй-жой масалалари ҳамда моддий ёрдам сўраб қилинган мурожаатлар атрофлича кўриб чиқилди.
Мулоқотлар жараёнида оилавий масалалар юзасидан шаръий ечим ва зарур маслаҳатлар берилган бўлса, моддий кўмакка муҳтож юртдошларимизга белгиланган тартибда амалий ёрдам кўрсатилди. Шунингдек, бошқа масалалар ҳам ваколат доирасида кўриб чиқилиб, масъуллар тегишли кўрсатма ва топшириқлар олишди.
Бу каби қабуллар аҳолининг диний ва ижтимоий муаммоларини тезкор ҳамда манзилли ҳал этишга хизмат қилмоқда.
Ўзбекистон мусулмонлари идораси
Матбуот хизмати
