Ёшлар тарбияси барча жамиятларда доимо долзарб мавзу бўлган. Ҳозирги глобал даврда янада долзарб. Юртимизда ҳам бу борада доимий равишда тарғибот ва ташвиқот ишлари олиб борилмоқда. Ёшлар билан ишлаш бўйича чора ва тадбирлар ҳам ишлаб чиқарилмоқда.

Шу ўринда унутмаслигимиз керакки, ёшларни доимо инсоний туйғулар сари чорлаб, уларнинг шуъурларини аждодлар эътиқоди билан суғориш, турли иллатлардан огоҳлантириш барчамизнинг вазифамиз. Халқимизнинг доимий эъзозида бўлган имом хатибларимиз ҳаммадан ҳам кўра кўпроқ масъулдирлар.

Чунки ҳар қандай ахлоқсиз инсон ҳам имом домлаларимиз рўпарасида ўзларини иложи борича сипо тутади ва уларнинг сўзларини эътибор билан тинглайди. Аксар ҳолларда жон қалби билан қабул қилади.

Бу – ҳар қандай соҳа вакилига ҳам берилавермайдиган тенгсиз қадру-ҳурмат, эҳтиром ва шу билан бирга ўта юқори масъулият ҳамдир. Аслида имом домлаларимиз нафақат ёшлар, балки бутун жамият вакиллари ҳатто дини ва ирқидан, касбу-мансабидан қатъи назар, барчанинг эъзозидадирлар.

Ҳатто муҳтарам Президентимиз ҳам “Ижтимоий барқарорликни таъминлаш, муқаддас динимизнинг софлигини асраш – давр талаби” мавзусидаги анжуманда сўзлаган нутқида ҳам бу соҳа вакилларига юксак ишонч билдириб бундай деганлар: “Муҳтарам имом-хатибларимиз Худо йўлида холис хизмат қилишни ўз зиммаларига олганлар. Бу ҳам масъулият, ҳам улкан шараф. Шунинг учун соғлом эътиқод йўлини тарғиб қилишни аввало кимдан сўраймиз? Сиз, азизлардан сўраймиз. Шу борада барчамиз кимдан ибрат оламиз? Сиз, азизлардан. Шунинг учун ҳам сизларнинг катта билимингиз, обрў-эътиборингизни инобатга олиб, мен сизларга, барча дин аҳлларига, жамоатчилигимизга мурожаат қилмоқчиман: юртимизда тинчликни, осойишталикни сақлашда бизга ёрдам беринг. Агар маҳаллангизда бирорта бола зарарли диний оқимга кириб қолган бўлса, уни нотўғри йўлдан қайтаришга ҳаракат қилинг. Аввало, улар билан гаплашиб, бу – ота-боболаринг йўли эмас, бу йўлдан қайт, ҳақиқат мана бу ёқда, тинчлик ва эзгулик йўлидан бориб, ҳеч ким кам бўлмаган, деб уларни соғлом эътиқодга ишонтириш керак. Билим билан, ақл ва маърифат, намунали ишлар билан ишонтириш керак. Тарихдан, бугунги ҳаётимиздан олинган ҳаётий, таъсирчан мисоллар билан инонтириш керак. Бундай тарғибот, бундай ташвиқот сизларнинг қўлингиздан албатта келади. Йўлдан адашган болани дарров душманга чиқармасдан, уни ўзимизнинг фарзандимиз, деб билишимиз керак. Унга бутун қалбимиз, юрагимиз билан ачинаётганимизни шу бола билсин. Зора, шунда уларнинг ҳам қалб кўзи очилса, тўғри йўлга қадам қўйса...”.

Ҳа, бу ишонч учун дин соҳасининг ҳар бир вакили масъулдир. Инчунун, ёшлар тарбиясида доимгидан ҳам кўра кўпроқ ишлаш ва изланиш керак. Ёшларни ахлоқ жиҳатидан ҳам, маърифат жиҳатидан ҳам, бугунги кун талаблари жиҳатидан тўғри йўлга етаклаш учун етарли омилимиз бор. Бу – муқаддас Ислом таълимотлари. Агар биз бу таълимотларни ўз вақтида, ўрнида ва тўғри услубда етказа олсак, Юртбошимизнинг ишончини, бутун халқнинг ишончини оқлаган бўламиз ва келажак авлод олдидаги қарзимизни адо қилган бўламиз.

Улуғбек қори ЙЎЛДОШЕВ