Меҳмет Гўрмез
Бисмиллаҳир Роҳманир Роҳийм
Анқарадаги Ислом тафаккури институти директори Меҳмет Гўрмез 1959 йилда Туркиянинг Газиантеп вилояти Низип туманида туғилган. Бошланғич таълимни Низипда, ўрта таълимни Газиантеп Имом Хатиб ўрта мактабида тамомлаган.
1983-1987 йилларда Aнқара университетининг илоҳиёт факультетида таълим олган. Ўша йили “Aсосий Ислом фанлари” факультети “Ҳадис” кафедрасида магистратурада ўқишни бошлади.
1988 йили Туркия Республикаси Миллий таълим вазирлиги томонидан ажратилган стипендия билан Қоҳира университетида бир йил давомида таълим ва илмий изланишлар олиб борди.
1995 йилда докторлик диссертациясини “Суннат ва ҳадисларни тушуниш ва талқин қилишда методология муаммоси” мавзусида ҳимоя қилган.
1995-1997 йилларда Қозоғистондаги Аҳмад Яссавий университетининг илоҳиёт факультетида фаолият юритган.
1999 йилда доцент илмий унвонига эга бўлди.
2001-2003 йиллар давомида Ҳаcеттепе университетида дарс берди.
2003 йил Дин ишлари бўйича вице-президент этиб тайинланди.
2006 йилда профессор унвонини қўлга киритди.
2010-2017 йилларда Дин ишлари бўйича раиси лавозимида фаолият юритди.
Меҳмет Гўрмезнинг “Ҳадис илмининг асосий масалалари”, “Қалб давоси”, “Ғаззолий асарларида Суннат ва Ҳадис ҳамда уларнинг шарҳлари”, “Суннат ва ҳадиснинг ҳақиқий қиймати”, “Суннат ва ҳадисларни тушуниш ва шарҳлашда методология муаммоси” ва бошқа кўплаб асарлари нашр этилган.
Ҳозирда ўзи асос солган Ислом тафаккур институти ва Халқаро Ислом тафаккур жамғармаси президенти сифатида фаолият олиб бормоқда.
Ўзбекистон мусулмонлари идораси
Матбуот хизмати
Ўзбекистон ва Индонезия зиёрат туризми соҳасида ҳамкорликни кенгайтирмоқда
Туризм қўмитаси раиси Абдулазиз Аққулов Индонезия Республикаси Ҳаж ва Умра вазири Муҳаммад Ирфан Юсуф билан учрашди.
Учрашувда туристик алмашинувни кенгайтириш, зиёрат туризмини ривожлантириш, тўғридан-тўғри авиақатновларни йўлга қўйиш ва туроператорлар ҳамкорлигини кучайтириш масалалари муҳокама қилинди.
Туристик оқимни ошириш мақсадида Тошкент–Жакарта, шунингдек, тарихий шаҳарларни тўғридан-тўғри боғловчи авиақатновларни йўлга қўйиш масаласи муҳокама қилинди.
Мулоқот давомида Давлат раҳбари томонидан илгари сурилган янги авиақатновларни субсидиялаш бўйича механизмларни қўллаш мумкинлиги қайд этилди. Шунингдек, Индонезиядан сайёҳ жалб қилган маҳаллий туроператорларга ҳар бир сайёҳ учун 100 АҚШ доллари миқдорида субсидия ажратилиши ҳам таъкидланди.
Индонезияда ҳар йили 2 миллиондан ортиқ фуқаро Ҳаж ва Умра зиёратига йўл олади. Ўзбекистондаги 1 200 дан зиёд зиёрат маскани, жумладан, Имом Бухорий, Имом Мотуридий, Имом Термизий ва Баҳоуддин Нақшбанд мероси Индонезия бозори учун муҳим туристик салоҳият ҳисобланади.
Индонезия Ҳаж ва Умра вазирининг ташрифи доирасида Самарқанд ва Бухородаги зиёрат масканлари билан танишув ташкил этилди. Бухоро ва Самарқандни Индонезия бозорида зиёрат туризми йўналишлари сифатида тарғиб қилиш, махсус турлар ишлаб чиқиш, Ҳаж ва Умра операторлари билан B2B учрашувлар ўтказиш бўйича келишувларга эришилди.
Имом Бухорий мажмуаси ҳудудида индонезиялик инвесторлар иштирокида “Hadith Hotel” беш юлдузли меҳмонхонасининг ишга туширилиши ҳам икки мамлакат туризм соҳасидаги ҳамкорликнинг амалий натижаларидан бири бўлди.
Тўғридан-тўғри авиақатновлар, “Умра плюс” дастури, туроператорлар ўртасидаги ҳамкорлик ва зиёрат туризми инфратузилмасини ривожлантириш Ўзбекистоннинг Индонезия бозоридаги мавқеини мустаҳкамлаш ҳамда туристик оқимни оширишга хизмат қилади.
Ўзбекистон мусулмонлари идораси Матбуот хизмати