Ўзбекистон элчиси Кувайт давлати амирига ишонч ёрлиқларини топширди
Ўзбекистоннинг Кувайтдаги фавқулодда ва мухтор элчиси Aйюбхон Юнусов Кувайт давлати амири шайх Мишал ал-Aҳмад ал-Жобир ас-Сабоҳга ишонч ёрлиқларини топширди, деб хабар беради “Дунё” ахборот агентлиги.
Расмий маросимдан сўнг бўлиб ўтган қисқа суҳбатда Шайх Мишал ал-Aҳмад ал-Жобир ас-Сабоҳ Ўзбекистон Президенти Шавкат Мирзиёев билан 2023 йил июль ойида Жидда шаҳрида “Кўрфаз араб давлатлари ҳамкорлик кенгаши – Марказий Осиё” стратегик мулоқотининг биринчи саммити доирасида бўлиб ўтган учрашувини илиқлик билан эслади.
Шунингдек, Қувайт амири 2025 йилда Самарқанд шаҳрида бўлиб ўтадиган Форс кўрфази ҳамкорлик кенгаши – Марказий Осиё стратегик мулоқотининг иккинчи саммитида иштирок этиш учун Ўзбекистонга таклиф этилди.
Ишонч ёрлиқларини топшириш маросими Қувайт оммавий ахборот воситаларида, хусусан, етакчи кундалик “ал-Жарида”, “ал-Ватан” газеталарида ҳамда “КУНA” давлат ахборот агентлиги сайтида кенг ёритилди.
Эслатиб ўтамиз, Ўзбекистоннинг янги элчиси Aйюбхон Юнусов 6 февраль куни Қувайтга ташриф буюрди. Қувайтга тайинланишидан олдин у Ташқи ишлар вазирлигининг консуллик-ҳуқуқий бошқармаси бошлиғи лавозимида ишлаган.
Ўзбекистон мусулмонлари идораси
Матбуот хизмати
Ахборот тарқатиш ва журналистнинг 6 одоби
Бисмиллаҳир Роҳманир Роҳийм
Биринчидан, тарқатилаётган ҳар бир маълумот ва ахборот инсонлар манфаатига хизмат қиладиган яхши сўз бўлиши лозим.
Аллоҳ таоло бундай марҳамат қилади: "Аллоҳ яхши сўзга қандай мисол келтирганини кўрмайсанми? У худди бир яхши дарахтга ўхшайдир. Унинг асли собит турадир. Шохлари эса, осмонда. Робби изни ила ҳар доим меваларини бериб турадир" (Иброҳим сураси, 24-25 – оятлар).
Иккинчидан, турли фаҳш ва беҳаё маълумотларни, бўхтон, ёлғон ҳамда миш-миш хабарларни тарқатишдан эҳтиёт бўлиш шарт.
Аллоҳ таоло бундай огоҳлантиради: "...фаҳш ишлар тарқалишини яхши кўрадиганларга бу дунёю охиратда аламли азоб бордир" (Нур сураси, 19-оят).
Учинчидан, тарқатилаётган ҳар қандай хабар ёки маълумот учун Қиёмат куни жавоб беришни ҳамда "Китобат ҳам хитобат кабидир (ёзиш – гапириш каби)", деган қоидани унутмаслик керак.
Аллоҳ таоло бундай марҳамат қилади: "Бугунги кунда уларнинг оғизларига муҳр урамиз. Нима касб қилганларини Бизга қўллари сўзлар ва оёқлари гувоҳлик берур" (Ёсин сураси, 65-оят).
Имом Шофиъий айтадилар: "Вафот этмайдиган ёзувчи йўқ. Аммо унинг қўллари ёзган нарсалар неча йиллар ўтсада сақланиб қолади. Шундай экан, Қиёматда кўрганингизда хурсанд бўладиган нарсадан бошқа ҳеч нарса ёзманг!”.
Тўртинчидан, ҳар бир ахборотнинг ишончли эканини текшириб, кейин тарқатиш.
Аллоҳ таоло шунга буюради: "Эй, иймон келтирганлар! Агар фосиқ хабар келтирса, аниқлаб кўринглар, бир қавмга билмасдан мусийбат етказиб қўйиб, қилганингизга надомат чекувчи бўлманглар” (Ҳужурот сураси, 6-оят).
Расулуллоҳ соллаллоҳу алайҳи васаллам: "Бир кишининг ёлғончи бўлиши учун эшитган нарсасини гапиравериши кифоя қилади”, деганлар (Имом Муслим ривояти).
Бешинчидан, муаллифлик ҳуқуқига амал қилиш. Ўзгаларнинг меҳнатини кўчириб, ўзлаштириб олмаслик.
Имом Шофиъий раҳимаҳуллоҳ: "Менга бу сўзни фалончи айтган”, деб айтувчисини аниқ шаклда гапирган киши ҳақиқий марддир”, деганлар.
Абдул Фаттоҳ Абу Ғудда айтадилар: "Жумла ёки сўзни нақл қилувчига нисбат бериш омонатдир”.
Олтинчидан, ҳар бир касб эгаси ўз мутахассислиги доирасида ахборот ёки маълумот тарқатиши лозим. Билими етмаган, мутахассислиги бўлмаган хабарни тарқатмаслик керак.
Расулуллоҳ соллаллоҳу алайҳи васаллам: "Қачон иш ўз аҳлидан бошқага топширилса, қиёматни кутавер", деганлар (Имом Бухорий ривояти).
Даврон НУРМУҲАММАД