Халқаро диний саммитда Ўзбекистондаги ислоҳотлар эътироф этилди
Шу йилнинг 14-17 октябрь кунларида Санкт-Петербург ва Россиянинг Шимоли-Ғарбий минтақаси мусулмонлари Диний идораси, Россиянинг Осиё қисми мусулмонларининг Диний идораси, Санкт-Петербург давлат университети, Ислом маданияти, илм-фан ва таълимни қўллаб-қувватлаш жамғармаси томонидан “Ҳозирги замонда маънавий ва ахлоқий қадриятлар” мавзусида I Халқаро диний саммит ташкил этилди. Унда Ўзбекистон мусулмонлари идораси вакили Иброҳимжон домла Иномов иштирок этди.
Конференцияда 55 дан зиёд давлатдан вазирлар ва вазир ўринбосарлари, муфтийлар, диний соҳа ходимлари, академия ва университет ректорлари, мутахассислар, илмий тадқиқотчилар, етакчи диншунос олимлар, илмий, сиёсий ва жамоат арбоблари, миллий диаспоралар вакиллари, талабалар ҳамжамияти ҳамда дипломатик корпус вакиллари қатнашди.
Нуфузли симпозиумда сўзга чиққан Ўзбекистон мусулмонлари идораси вакили Иброҳимжон домла Иномов томонидан I Халқаро диний саммит иштирокчиларига Ўзбекистон мусулмонлари идораси раиси, муфтий Шайх Нуриддин Холиқназар ҳазратларининг салом ва дуою хайрларини етказиб, юртимизда диний-маърифий соҳадаги ўзгаришлар ҳақида маълумот берди.
Саммит доирасида Ўзбекистондаги бу хайрли ишларга юксак баҳо берилди. Шунингдек, бир қатор юқори мартабали меҳмонлар Имом Бухорий, Имом Термизий, Имом Баҳоуддин Нақшбанд, Имом Мотуридийлар юртига бориш истакларини самимий изҳор этишди.
Анжуман давомида мавзу доирасида маърузалар қилиниб, фикр-мулоҳазалар билдирилди.
Ўзбекистон мусулмонлари идораси
Матбуот хизмати
Бухорода Қуръон мусобақаси ўтказилди
Ўзбекистон Республикаси Давлат мустақиллигининг 35 йиллиги муносабати билан Бухоро вилоятида фаолият олиб бораётган имом-хатиб ва имом-ноиблар ўртасида “Қуръон тинчликка буюради” шиори остида Қуръон мусобақаси ўтказилди.
Очилиш маросимида Бухоро вилояти бош имом-хатиби Жобир домла Элов сўзга чиқиб, мазкур маърифий тадбирнинг аҳамияти ҳақида сўзлаб, иштирокчиларга муваффақият тилади.
Мусобақани ўтказишдан кўзланган мақсад диний соҳа ходимларининг Қуръони карим бўйича билим ва маҳоратини янада ошириш, улар ўртасида ўзаро ҳамжиҳатлик муҳитини шакллантиришдир.
Беллашувда вилоятнинг туман ва шаҳарларида фаолият юритаётган 10 нафар имом-хатиб ва имом-ноиб иштирок этиб, Қуръони каримни ўқиш ва ёддан билиш борасидаги билим ва маҳоратини намойиш этишди.
Биринчи ўринга Пешку тумани “Чиқирчи” жоме масжиди имом-ноиби Афзал Шавкатов сазовор бўлди. Иккинчи ўрин Бухоро шаҳридаги “Волиди Абдулазизхон” жоме масжиди имом-ноиби Абдувоҳид Акрамовга, учинчи ўрин Жондор тумани “Работўғлон” жоме масжиди имом-хатиби Шуҳрат Шеровга насиб этди.
Ғолибларга диплом ва қимматбаҳо совғалар топширилди.
Ўзбекистон мусулмонлари идораси
Матбуот хизмати
