БОҒ ЯРАТИБ АМАЛЛАР ДАФТАРИНИ БЕЗАЙЛИК!
Аллоҳ таоло инсониятни озодаликка, жисму имони, уй-жойи – Ватанини пок тутишга, боғу роғлар ўстирувчи ва Ер юзини обод қилувчилардан бўлишга чақиради.
Юқоридаги чақириққа монанд, айни кунларда ЎМИ Бухоро вилояти вакили Жобир домла Элов бошчилигида вилоятимиздаги барча масжид, мадраса ва зиёратгоҳларда яшил маконларни кўпайтириш ишлари уюшқоқлик билан ташкил этилиб, дин пешволари томонидан ҳудудларда яшил майдонлар барпо этилмоқда.
Зеро, ҳадис шарифларда: “Албатта, фаришталар экин ёки кўчат экувчининг ҳаққига, модомики, эккан нарсаси кўкариб тураркан, истиғфор айтиб туришади”, - дейилади.
Яратган Зот бу ҳайрли ишларни бардавом ва барокатли қилсин!
ЎМИ Бухоро вилояти вакиллиги
Матбуот хизмати
Мустақиллик туҳфаси: Жиззахда учта масжиднинг янги биноси фойдаланишга топширилди
Мустақиллигимизнинг 35 йиллиги муносабати билан Жиззах вилояти Шароф Рашидов туманидаги “Жиззахлик”, “Яккатут” ва “Ардахшон” жоме масжидларининг янги бинолари фойдаланишга топширилди.
Тантанали очилиш маросимида соҳа мутасаддилари, Жиззах вилояти бош имом-хатиби Меҳмонхон домла Жабборов, маҳаллий ҳокимлик вакиллари ҳамда намозхонлар иштирок этди.
Тадбирда сўз олганлар Аллоҳнинг уйларини обод этишнинг улуғ фазилати, масжид қурилишига ҳисса қўшган инсонларнинг ажру мукофотлари ҳақида тўхталиб ўтдилар. Шунингдек, масжидларни нафақат моддий, балки жамоат билан ибодатларни адо этиб, маънавий жиҳатдан обод қилиш ҳар бир мўмин учун муҳим экани таъкидланди.
Юртимизда истиқлол айёми муносабати билан эшикларини очган ушбу янги масжидлар намозхонлар учун замонавий ва қулай шароитларда ибодатларини адо этишга хизмат қилади.
Ўзбекистон мусулмонлари идораси
Жиззах вилояти
Матбуот хизмати
