Имом ва ҳожилар эзгу ишда ҳамкор
Инсонлар билан яқин бўлиб, уларнинг муаммоларини ечиш, камчиликларини тўғирлаш, эҳтиёжмандларга кўмакдош бўлиш мақсадида Самарқанд вилояти вакиллиги, шаҳар ва туман бош имом-хатиблари ва иқтидорли имом-хатиблар ҳамда 18 нафар хожи оталар Самарқанд туманида йиғилди.
Ушбу тумандаги 6 та масжид имом-хатиблари билан ҳамкорликда 18 та маҳалладаги 60 дан зиёд хонадонга бориб, низоли ва муаммоли ҳолатларни маҳалла иштирокида бартараф этиш, кўмакка муҳтож бўлганларга моддий ёрдамлар кўрсатиш ва пешин намозида жамоат билан диний-маърифий суҳбатлар ўтказиш режа қилинди.
Мазкур тадбирлар олдидан вилоят вакиллиги масъул ходими Ҳасанхон домла Темиров имом-хатиблар билан учрашиб, раҳбариятнинг кўрсатма ва топшириқларини етказди. Шундан сўнг имом-хатиблар ўзлари бириктирилган жойларга тарқалдилар.
Аллоҳ таоло бу хайрли ишларни бардавом ва манфаатли қилсин.
Ўзбекистон мусулмонлари идораси
Матбуот хизмати
Тошкентда тарих ва замонавий санъат уйғунлашган янги маданий макон очилмоқда
Жорий йил 6 сентябрь куни пойтахтимизда Тошкент замонавий санъат маркази — CCA Tashkent ўз эшикларини очади. Бу шунчаки янги музей ёки кўргазма зали эмас, балки бир асрдан зиёд тарихга эга иншоотга янги ҳаёт бағишланган йирик маданий лойиҳадир.
Маълумот ўрнида: 1912 йилда меъмор Вилгелм Гейнзелман лойиҳаси асосида барпо этилган бино дастлаб трамвай депоси, кейинчалик дизель электр станцияси сифатида фойдаланилган. Бугун эса унинг тарихий қиёфаси ва индустриал руҳини сақлаган ҳолда, замонавий санъат, таълим, тадқиқот ва маданий мулоқот марказига айлантирилди.
Давлатимиз раҳбари ташаббуси билан амалга оширилаётган ушбу лойиҳа тарихий меросни асраб-авайлаш ва унга замонавий мазмун беришнинг ёрқин намунасидир.
Франциянинг машҳур Studio KO бюроси томонидан ишлаб чиқилган архитектура концепцияси тарихий мерос ва замонавий инфратузилмани уйғунлаштирган. Марказда кўргазма заллари, таълим ва жамоат майдонлари, кутубхона ҳамда тадқиқот инфратузилмаси фаолият юритади.
Энг муҳими — бу ерда нафақат тарих сақлаб қолинди, балки унга янги мазмун берилди. Илгари энергия ишлаб чиқарилган маконда бугун ижод, янги ғоялар, санъат ва инсонлар мулоқотининг янги энергияси юзага келади.
CCA Tashkent нафақат Тошкентнинг, балки Марказий Осиёнинг янги маданий жозиба нуқталаридан бирига айланиши кутилмоқда.
Бу ерда замонавий санъат билан бир қаторда маърузалар, кинонамойишлар, тадқиқотлар, мунозаралар, концертлар, перформанслар ва турли маданий-таълим тадбирлари ўтказилади.
