Бухоро имомларининг навбатдаги сайёр йиғилиши ўтказилди
Шу йил 23 январь куни Ўзбекистон мусулмонлари идораси раиси, муфтий Шайх Нуриддин Холиқназар ҳазратларининг Уламолар Кенгаши йиғилишида ҳожиларнинг “Янги Ўзбекистоннинг фидойиси бўлиб, маънавият тарғиботчисига айланамиз” ташаббуси доирасидаги кўрсатмасига асосан ўтказиб келинаётган намунавий-амалий тадбирларнинг навбатдагиси Бухоро вилояти Пешкў туманида ўтказилди.
Шу куни Бухоро вилояти бош имом-хатиби Жобир домла Элов раҳбарлигида Пешку туманида фаолият кўрсатаётган масжидлар имом-хатиб, имом-ноиб, маҳалла домлалари, отинойилар, мутаваллилар ва нуроний отахонлар иштирокида сайёр йиғилиш бўлиб ўтди. Унда имомлар маҳаллалардаги ёшлар тарбиясига катта эътибор қаратиш, илм-маърифатга қизиқтириш алоҳида таъкидланди.
Шундан сўнг 8 та масжид имом-хатиблари нуронийлар билан ўзларига бириктирилган 37 та маҳаллага чиқиб, 80 дан ортиқ хонадон ҳолидан хабар олди. Жумладан, “Садр” маҳалласида яшовчи юз ёшни қаршилаган меҳнат фахрийси Иброҳим бобо Тоҳировни зиёрат қилди. Сўнг “Мустақиллик” маҳалласида истиқомат қилувчи биринчи гуруҳ ногирони, тадбиркор Барчиной Авезова ва бошқа ижтимоий кўмакка муҳтожларлар ҳолидан хабар олиниб, ҳомийлар иштирокида моддий жиҳатдан кўмак берилди.
Шунингдек, тумандаги замонавий лойиҳалар асосида қурилган 130 ўринли “Махтобой” мактабгача таълим масканида жажжи болалар билан учрашиб, уларга хурсандчилик улашилди.
Сўнгра “Янги бозор” маҳалласида жойлашган “TJS МED” шифохонсида даволанаётган беморлардан кўнгил сўралиб, даволаниш ва дори-дармон учун моддий ёрдамлар кўрсатилди.
Куннинг иккинчи ярмида вилоят бош имом-хатиби Жобир домла Элов тумандаги Хўжа Рушнои жоме масжидида, туман имом хатиблари ўзларига бириктирилган масжидларда пешин намозини адо қилиб, қавмга муҳим мавзуларда маъвиза қилиш баробарида жамоат билан эл-юртимиз ҳаққига дуои хайрлар қилинди.
Ўзбекистон мусулмонлари идораси
Бухоро вилояти вакиллиги
Матбуот хизмати
Малайзия телеканалида Ўзбекистоннинг зиёрат туризми имкониятлари кенг ёритилди
Малайзиянинг “Berita RTM” телеканалида Ўзбекистонда зиёрат туризми соҳасида амалга оширилаётган ислоҳотларга бағишланган махсус дастур намойиш этилди, деб хабар бермоқда “Дунё” АА.
Мамлакатимиз мустақиллигининг 35 йиллиги арафасида эфирга узатилган ушбу кўрсатувда малайзиялик профессорлар – Бадрул Иса ва Норфадилаҳ Камаруддин томонидан ишлаб чиқилган “Ўзбекистон–Малайзия: креатив туризм” номли лойиҳа тақдим этилди.
Олимлар ташаббуси билан яратилган мазкур лойиҳа мамлакатимизнинг Малайзиядаги элчихонаси, Туризм қўмитаси ва Ислом цивилизацияси маркази ҳамкорлигида амалга оширилди.
Ташаббус Ўзбекистоннинг туризм имкониятлари ҳақида “Visual storytelling” форматида профессионал рақамли контент яратишни назарда тутади.
Лойиҳага кўра, 17–31 август кунлари Малайзия UiTM технология университетининг профессионал фотографлари ва дизайнерларидан иборат ижодий жамоа Тошкент, Самарқанд, Бухоро ва Хоразмда суратга олиш ишларини олиб боради.
Малайзиялик ижодкорлар юртимиз ҳақида тайёрлаган фото ва видеоматериаллар “Instagram”, “Facebook”, “TikTok”, “YouTube” каби интернет платформаларда жойлаштирилиши режалаштирилган. Лойиҳада юртимиз олий ўқув юртларининг дизайн, санъат, туризм ва меҳмонхона бизнеси йўналишидаги талабалари ҳам иштирок этади. Бу академик, туризм ва ижодий соҳаларда тажриба алмашишни ташкил этиш имконини беради.
Дастурда фикр билдирган Бадрул Иса лойиҳа АСЕАН мамлакатлари ва мусулмон оламида Ўзбекистонни янада кенгроқ танитишга хизмат қилишини таъкидлади. Унинг фикрича, рақамли платформалар орқали мамлакатимиз тарихий мероси, зиёрат туризми ва амалга оширилаётган сўнгги ўзгаришлари кенг ёритилади.
“Биз бой тарихий мерос, юксак маданият ва меҳмондўст халққа эга бўлган Ўзбекистонни АСЕАН минтақаси аҳолиси томонидан қайта кашф этилишини истаймиз”, – деди профессор.
Шунингдек, у Ўзбекистон халқини мустақилликнинг 35 йиллиги билан табриклаб, лойиҳа натижалари ушбу санага муносиб совға бўлишини қайд этди.
Ушбу ташаббус Ўзбекистоннинг зиёрат туризмини оммалаштириш ва АСЕАН мамлакатларидан кўпроқ сайёҳларни жалб қилишга хизмат қилиши кутилмоқда.
Ўзбекистон мусулмонлари идораси Матбуот хизмати
