“Хўжа Аҳмад Яссавий” номидаги Ислом институти очилади
Бу ҳақда Қозоғистон мусулмонлари диний идораси раиси, Бош муфтий Наврузбай ҳожи Тағанули 2025 йилги вазифаларга доир маърузасида маълум қилди, дея хабар беради muftyat.kz.
“Имомларнинг билим ва малакасини ошириш – замон талабидир. Бу йўналишдаги иш доимий назоратда. Имомларга чуқур диний билим бериш мақсадида Остона шаҳрида Хусамуддин ас-Сиғоний номидаги Ислом институтини очдик ва унга хориждан тажрибали устозлар ҳамда олимларни таклиф қилдик.
Бу йил Аллоҳнинг изни билан институтнинг биринчи битирувчиларига дипломлар топширамиз ва уларни масъулиятли диний лавозимларга тайинлаймиз. Ушбу хайрли ишлар давоми сифатида Аллоҳнинг иродаси билан бу йил Туркистон шаҳрида “Хўжа Аҳмад Яссавий” номидаги Ислом институтини очиш тараддудидамиз. Унинг асосий мақсади жанубий ҳудуддаги имомларнинг малакасини оширишдан иборат бўлади. Шунингдек, мазкур ўқув муассасаси ҳузурида “Ижоза” бериш маркази ҳам ташкил этилади. Бу жанубий ҳудуд имомларининг билим даражасини оширишга янги туртки беради», – деди Бош муфтий.
Ўзбекистон мусулмонлари идораси
Матбуот хизмати
Бухорода диний соҳа ходимларига юксак эҳтиром кўрсатилди
Ватанимиз мустақиллигининг 35 йиллик байрами арафасида Бухоро вилоятида жамиятда миллий-диний қадриятларни мустаҳкамлаш, эл-юрт маънавияти ва осойишталигини таъминлаш йўлида фидокорона меҳнат қилаётган диний-маърифий соҳа ходимларини тақдирлашга бағишланган тантанали тадбирлар бўлиб ўтди.
Давлатимиз раҳбарининг тегишли фармонларига мувофиқ, диний соҳада самарали фаолият юритиб келаётган бир гуруҳ соҳа ходимлари юксак давлат мукофотлари билан тақдирландилар. Маросимда Бухоро вилояти ҳокимининг ўринбосари Азизбек Қаландаров иштирок этиб, йиғилганларни қутлуғ айём билан самимий қутлади ва давлат мукофотларини ўз эгаларига тантанали равишда топширди.
Шунингдек, байрам муносабати билан вилоят ҳокимлиги ташаббуси асосида соҳа фидойиларига махсус ваучерлар тақдим этилди. Тадбирда сўз олганлар давлатимиз томонидан маънавий-маърифий соҳа ходимларига қаратилаётган юксак эътибор ва ғамхўрлик учун миннатдорлик билдирдилар.
Бундан ташқари, Ўзбекистон мусулмонлари идораси Бухоро вилояти вакили, вилоят бош имом-хатиби Жобир домла Элов томонидан вилоят вакиллиги тасарруфида самарали хизмат кўрсатиб келаётган бир гуруҳ диний соҳа ходимларига ташаккурномалар топширилди.
Кўтаринки руҳда ўтган маросимларда бундай юксак эътибор ва эҳтиром соҳа фидойиларини эл-юрт фаровонлиги ва динимиз софлигини тарғиб этиш йўлидаги хайрли фаолиятга янада куч-ғайрат билан киришишга руҳлантириши таъкидланди.
Ўзбекистон мусулмонлари идораси
Матбуот хизмати
