Хотин-қизларнинг малака ошириш ўқувлари якунланди
Ўзбекистон халқаро ислом академияси Малака ошириш марказида жорий йилнинг 22-27 январь кунлари "Хотин-қизлар ўртасида ижтимоий-маънавий муҳитни соғломлаштиришнинг долзарб масалалари" мавзусида малака ошириш ўқув курслари ўтказилди.
Олий Мажлис Сенати, Оила ва хотин-қизлар қўмитаси, Дин ишлари бойича қўмита, Ўзбекистон мусулмонлари идораси ҳамда Ўзбекистон халқаро ислом академияси ҳамкорлигида ташкил этилган семинарларда тингловчилар соҳа мутахассисларидан турли мавзулардаги маърузаларни тинглашди.
Шу йил 27 январь куни мазкур ўқувларнинг якунига бағишланган тақдирлаш маросими ўтказилди. Унда Ўзбекистон халқаро ислом академияси ректори Музаффар Комилов, Дин ишлари бўйича қўмита раисининг ўринбосари Матлуба Қаҳҳорова, "Оила ва гендер" илмий-тадқиқот институти бўлим бошлиғи Фарида Йўлдошева, Малака ошириш маркази директори Ҳусниддин Ахмедов ҳамда тингловчилар иштирок этишди.
Академия ректори тадбирда сўз олар экан, бу каби ўқувларни ташкил этишдан мақсад мазкур соҳадаги фаолиятни янада ривожлантириш, тизимда ишни тўғри ва самарали ташкил этиш, жойларда хотин-қизлар соҳасидаги муаммоларни ечиш ва уларни ҳар томонлама қўллаб-қувватлаш юзасидан тайинланган масъул ходимларнинг кўникма ва малакаларини ошириш эканини таъкидлади.
Якунда тингловчиларга сертификатлар топширилди.
Ўзбекистон мусулмонлари идораси
Матбуот хизмати
Диний таълим соҳасида илк бор Республика анжумани бўлиб ўтади
Жорий йилнинг 19-20 август кунлари Ўзбекистон мусулмонлари идораси тасарруфидаги олий ва ўрта махсус диний таълим муассасалари профессор-ўқитувчиларининг «Замонавий диний таълим: педагогика, илм-маърифат ва инновация» номли I илмий-амалий анжумани Ислом цивилизацияси марказида бўлиб ўтади.
Давлатимиз Раҳбари томонидан ҳар жабҳада олиб борилаётган янгиланиш ва ислоҳотларга ҳамоҳанг тарзда Диний идора тарихида илк бор ўтказилаётган ушбу тадбирда жами 700 нафар педагог ва соҳа мутахассиси, жумладан, 300 нафар иштирокчи бевосита анжуман залида, 400 нафар иштирокчи эса ҳудудлардан видеоселектор орқали қатнашади.
Анжумандан кўзланган мақсад соҳадаги истиқболли режаларни муҳокама қилиш, диний таълимда педагогик ва касбий маҳоратни ошириш, таълим жараёнига замонавий технологияларни янада кенг татбиқ этиш ҳамда диний таълимни янги босқичга олиб чиқишдир.
Дастур доирасида соҳа раҳбарлари иштирокида таҳлилий маърузалар, таниқли профессорлар томонидан маҳорат дарслари, илмий-методик машғулотлар бўлиб ўтади. Шунингдек, иштирокчилар Ўзбекистон мусулмонлари идораси, Ислом цивилизацияси маркази билан яқиндан танишиб, Ҳазрати Имом мажмуасидаги тарихий қадамжо ва обидаларни зиёрат қилишади.
Ўзбекистон мусулмонлари идораси Матбуот хизмати
