Энди Макка ва Мадинадан кўчмас мулк сотиб олса бўлади
Саудия Арабистони хорижий фуқароларга Макка ва Мадинада кўчмас мулкка сармоя киритишга рухсат бергани ҳақида “Al-Arabiya” сайти хабар қилди.
Капитал бозорлари бошқармаси таъкидлашича, ушбу қадам мамлакат иқтисодиётига хорижий сармояларни жалб қилиш ва исломнинг муқаддас шаҳарларида инфратузилмани ривожлантириш учун маблағ оқимини таъминлаш мақсадида амалга оширилган.
“IslamNews” маълумотига кўра, Саудия Арабистони 2030 йилгача ҳаж ва умра ибодатларини бажариш учун тахминан 30 миллион зиёратчини қабул қилишга умид билдирмоқда. 2019 йилда мамлакат ҳукумати зиёрат ишларидан 12 миллиард АҚШ доллари миқдорида даромад олган. Ҳаж ва умра мамлакат иқтисодиётининг муҳим сектори ҳисобланади ва Саудия Арабистони бу соҳани янада кенгайтиришга интилаётганини қайд этди.
Макка ва Мадинада кўчмас мулкка сармоя киритиш бўйича қарор эълон қилинганидан сўнг Маккадаги қурилиш компаниялари акциялари нархи 10 фоизга ошди. Шунга қарамай кўчмас мулк сотиб олишда баъзи чекловлар бўлади. Саудия Арабистони фуқаролигини олмаган шахслар кўчмас мулк объектларининг 49 фоизидан ортиғини ўз мулки сифатида эгаллай олмайди.
Ўзбекистон мусулмонлари идораси
Матбуот хизмати
Бухорода икки янги жоме масжиди қурилиши кўздан кечирилди
Бухоро вилоятида янги жоме масжидларини барпо этиш ва ободонлаштириш ишлари изчил давом этмоқда. Шу муносабат билан Ўзбекистон мусулмонлари идораси Бухоро вилояти вакили, вилоят бош имом-хатиби Жобир домла Элов Когон шаҳри ва Когон туманида қурилаётган икки масжидда бўлиб, қурилиш ишларининг бориши билан танишди.
Дастлаб Когон туманидаги “Хўжа Каъбул Ахбор Вали” жоме масжидининг янги биносида олиб борилаётган қурилиш ишлари кўздан кечирилди. Ташриф давомида масъуллар билан қурилиш жараёни муҳокама қилиниб, ишларни белгиланган муддатларда ва сифатли амалга ошириш юзасидан тегишли тавсия ҳамда таклифлар берилди.
Лойиҳага кўра, янги масжид хонақоҳи ва кенг ҳовлиси билан биргаликда 1000 нафардан зиёд намозхонни қабул қилиш имкониятига эга бўлади. Мажмуа таркибида муҳташам гумбаз, замонавий таҳоратхоналар, маъмурий бинолар, янги дарвоза, автотураргоҳ ҳамда кўкаламзорлаштирилган ҳудудлар барпо этилади. Шунингдек, масжид ҳудудидаги тарихий ҳовуз ва қадимий қудуқни реставрация қилиш ишлари ҳам амалга оширилиши режалаштирилган.
Шундан сўнг Когон шаҳрида барпо этилаётган “Ҳазрати Билол” жоме масжидида ҳам қурилиш ишларининг бориши ўрганилди. Масъулларга қурилиш сифатини янада ошириш, меъморий ечимларга алоҳида эътибор қаратиш ва ишларни ўз вақтида якунлаш бўйича тегишли кўрсатмалар берилди.
Лойиҳага мувофиқ, мазкур масжид шарқона миллий меъморий услубда қурилиб, 900 нафар намозхонга мўлжалланади. Мажмуада кутубхона, омборхона, 20 кишилик таҳоратхона, маъмурий хоналар, баланд гумбаз, икки пештоқли кириш дарвозаси ҳамда баландлиги 33 метр бўлган минора барпо этилади. Шунингдек, автотураргоҳ, ҳовуз ва яшил ҳудудлар ташкил этилиши режалаштирилган.
Қайд этилганидек, қурилиш ишлари масжидларнинг ҳисоб рақамларига тушаётган маблағлар ҳамда саховатпеша ҳомийларнинг хайриялари асосида амалга оширилмоқда.
Янги масжидлар юртимизда диний-маърифий муҳитни янада мустаҳкамлаш, аҳолига муносиб ибодат шароитларини яратиш ва миллий меъморчилик анъаналарини асраб-авайлашга хизмат қилиши билан аҳамиятлидир.
Аллоҳ таоло ушбу хайрли бунёдкорлик ишларини баракали қилиб, уларнинг муваффақиятли якун топишини насиб этсин.
Ўзбекистон мусулмонлари идораси
Бухоро вилояти вакиллиги
Матбуот хизмати
