Жисмонан соғлом, маънан баркамол авлодни тарбиялаш мақсадида шу йил 27-28 январь кунлари “Назарбек” талабалар турар жойида “Баркамол авлод” спорт мусобақаси ташкил этилди.
Мусобақа 3 та спорт тури — шахмат, стол тенниси ва ўзбек миллий кураши бўйича ўтказилди.
Эътиборлиси, беллашув нафақат талабалар ўртасида, балки устоз ва мураббийлар ўртасида ҳам стол тенниси бўйича ташкил қилинди.
Муросасиз кечган баҳсларда мусобақа ғолиблари аниқланди. Барча иштирокчилар спортда ўз кучини синаб кўриш баробарида бир-бири билан тажриба алмашиш, дўстона муҳитда кучли жамоа сифатида ҳаракат қилиш имкониятини берди. Шунингдек, ёшларнинг спортга бўлган қизиқишини янада оширди.
Ғолибларга таълим муассасасининг диплом ва қимматбаҳо эсдалик совғалари топширилди.
Саидазимхон САИДАКРАМОВ,
“Кўкалдош” ЎМИБЮ мударриси
Бугун, 27 февраль куни Хива шаҳрида Дин ишлари бўйича қўмита ҳузуридаги Конфессиялар ишлари кенгашининг сайёр йиғилиши бўлиб ўтмоқда. Унда юртимизда расмий фаолият олиб бораётган 16 та диний конфессия вакиллари иштирок этмоқда.
Мазкур Кенгаш 2004 йилда ташкил этилган бўлиб, охирги йилларда унинг фаолияти янада такомиллашди. Хусусан, 2018 йилга келиб, муҳтарам Президентимизнинг бевосита ташаббуслари билан Кенгаш таркибига барча диний конфессиялар вакиллари киритилиб, Кенгаш аъзоларининг умумий сони 17 нафарга етди. Таъкидлаш керак, сўнгги йилларда Кенгашнинг йиғилишлари Республиканинг турли ҳудудларида сайёр шаклда ўтказилиши яхши анъанага айланди.
Бу галги сайёр йиғилиш янгича формат ва ракурсда ташкил этилгани диққатга сазовор. Бу йилдан эътиборан Кенгаш аъзоларидан ташқари Республика парламенти, турли вазирлик ва идоралар ҳамда ташкилот вакиллари ҳам кузатувчи сифатида қатнашмоқда.
Эслатиб ўтамиз, мазкур Кенгаш республика ҳудудида фаолият олиб бораётган барча диний конфессиялар фаолиятини мувофиқлаштириб турувчи маслаҳат органидир. Унинг фаолияти динлараро мулоқотнинг ривожланиши, юзага келадиган масала ва муаммоларни ҳамжиҳатликда ҳал этишга қаратилган.
Ўзбекистон мусулмонлари идораси Матбуот хизмати