Бир ҳадис шарҳи: Агар Аллоҳ таоло бандасини яхши кўрса
Абу Ҳурайра розияллоҳу анҳудан ривоят қилинади. Расулуллоҳ соллалоҳу алайҳи васаллам айтдилар: “Мўмин ва мўминага ўзи, фарзанди ва мол-дунёси борасида доим мусибат етиб туради (булар гуноҳларни ўчириб тураверганидан) ҳатто Аллоҳ таолога зиммасида бирор гуноҳсиз ҳолатда йўлиқади” (Имом Термизий ривоят қилган).
Ҳадис шарҳи: Аллоҳ таоло бандаларини мусибат ва балолар билан синашни уларнинг гуноҳларига каффорат ва хатолари ўчирилиши учун жорий қилди. Бунинг сабаби Аллоҳ таоло бандасини яхши кўрар экан, гуноҳларини мағфират қилиш учун уни синайди. Натижада банда Аллоҳ таолога зиммасида бирор гуноҳсиз йўлиқади.
Бу ҳадисда Расулуллоҳ соллаллоҳу алайҳи васаллам “Мўмин ва мўминага доим мусибат етиб туради” яъни: мўмин банда балолардан ажрамасдан доим мусибатда бўлиб, унга синовлар тушиши бардавом бўлади, “ўзида” яъни: руҳий ва жисмоний соғлиғида, “фарзандида”, яъни: фарзандларининг касал бўлиши, вафоти, оқ бўлиши ва бошқаларда, “молу дунёсида”, яъни: камбағаллик, тижоратини касодга учраши ва ризқ-рўзғоридаги қийинчиликларда бўлади, “ҳатто Аллоҳ таолога зиммасида бирор гуноҳсиз ҳолатда йўлиқади” дедилар, яъни Аллоҳ таоло бандадан бу синовлар сабабли барча гуноҳ ва хатоларини кечиради ва банда Аллоҳ таолога қилган барча гуноҳ ва хатоларидан пок ҳолатда йўлиқади. Бундай бандаларга қиёмат кунида гўзал мукофот бўлади.
Пайғамбаримиз соллаллоҳу алайҳи васаллам бундай деганлар: “Бу дунёдаги офиятда яшаганлар дунёда мусибатлар билан синалганларга Қиёмат куни мусибатлари эвазига кўп ажр-савоб берилганини кўриб ўзлари ҳам дунёда қайчилар билан терилари қийилишини ва эвазига мусибатдорлар қаторида бўлишни орзу қилиншади”.
Тоҳиржон СОБИРОВ,
Ҳадис илми мактаби талабаси.
Иордания ОАВ: Тошкентда Ислом цивилизациясига бағишланган халқаро медиафорум ўтказилади
Иорданиянинг нуфузли “Jordan News Agency” (Petra) ахборот агентлиги ҳамда “Hala Ahbar” нашрида 24–29 август кунлари Тошкент шаҳрида бўлиб ўтадиган “Ислом цивилизацияси: янги нигоҳ ва кашфиётлар” мавзусидаги халқаро медиафорумга бағишланган мақолалар эълон қилинди, деб хабар бермоқда “Дунё” АА.
Агентликда ёзилишича, мазкур йирик халқаро тадбир Ўзбекистоннинг жаҳон медиа ҳамжамияти билан алоқаларини янада кенгайтириш, журналистлар ва соҳа мутахассислари ўртасида тажриба алмашишни ривожлантириши билан аҳамиятлидир.
Шу билан бирга, форум давомида ислом цивилизациясининг бой илмий-маърифий ва маданий меросини замонавий медиа воситалари орқали кенг тарғиб этишга алоҳида эътибор қаратилади.
Форумнинг асосий тадбирлари Ўзбекистондаги Ислом цивилизацияси марказида ўтказилади. Унда хорижий оммавий ахборот воситалари вакиллари, халқаро экспертлар ҳамда медиа соҳаси мутахассислари иштирок этади.
Нашрлар форум дастурининг мазмун-моҳиятига алоҳида эътибор қаратган. Хусусан, тадбир доирасида ялпи мажлислар, ихтисослаштирилган медиа-кўргазмалар, матбуот брифинглари ва икки томонлама учрашувлар ташкил этилади.
Мунозараларда ҳужжатли фильмлар яратиш, тарихий хотирани асраш ва ёритиш, нашриёт лойиҳаларини ривожлантириш, замонавий технологиялардан медиа соҳасида самарали фойдаланиш ҳамда халқаро медиа лойиҳаларни амалга ошириш истиқболлари муҳокама қилинади.
Нашрнинг қайд этишича, тадбирнинг муҳим жиҳатларидан бири – Ўзбекистонлик талабалар учун халқаро медиа соҳасининг тажрибали мутахассислари иштирокида амалий мастер-класслар ўтказилишидир. Бу машғулотлар замонавий журналистика, медиамаҳсулотлар яратиш ва халқаро ахборот маконида самарали фаолият юритиш бўйича билим ва кўникмаларни оширишга хизмат қилади.
Иордания ОАВда форум доирасида иштирокчилар учун Самарқанд шаҳрига сафар ҳам режалаштирилгани қайд этилган. Хорижий журналистлар Имом Бухорий мажмуасини зиёрат қилиб, Самарқанднинг бой тарихий-маданий мероси билан танишадилар. Тошкент шаҳрида эса халқаро ОАВ вакиллари учун махсус медиатур ташкил этилади.
Бундай сафарлар форум иштирокчиларига Ўзбекистоннинг нафақат замонавий тараққиёти, балки унинг жаҳон цивилизацияси тарихидаги ўрни, илмий-маърифий анъаналари ва бой маданий мероси ҳақида бевосита тасаввур ҳосил қилиш имконини беради.
Мақолаларда халқаро медиафорумнинг 28 август куни якуний ялпи мажлис ва расмий ёпилиш маросими билан якунланиши ҳам маълум қилинган. Хорижий меҳмонлар Ўзбекистон Республикаси давлат мустақиллигининг 35 йиллигига бағишланган тадбирларда ҳам иштирок этади.
Ўзбекистон мусулмонлар идораси Матбуот хизмати
