Бош имом талабалар билан учрашди
Бугун, 19 февраль куни Имом Бухорий номидаги Тошкент ислом институтида модул таълим тизими асосида таълим олаётган бир гуруҳ талабалар пойтахтимиздаги «Шайх Зайниддин» жоме масжидига ташриф буюрди.
Тошкент шаҳар бош имом-хатиби Абдуқаҳҳор домла Юнусов талабалар билан учрашиб, уларга илмнинг фазилатлари, бугунги имом қандай бўлиши керак каби мавзуларда маъруза қилди.
Дарҳақиқат, имомлик шарафли, айни пайтда масъулиятли бурчдир. Зеро, ҳадиси шарифда: «Имом зомин (зиммасига олувчи), муаззин омонатдордир. Аллоҳим, имомларни тўғри йўлга бошлагин ва муаззинларни мағфират қилгин», (Имом Абу Довуд ривояти), дейилган.
Маърузани жон қулоғи билан тинглаб, бундай учрашувларни ташкил этган институт маъмуриятига ҳамда Тошкент шаҳар бош имом-хатибига талабалар ташаккур билдиришди.
Абдуқаҳҳор домла ёшларнинг саволларига атрофлича жавоб қайтардилар.
Талабаларга "Мавлиди шариф" китоби ҳадя этилди.
* * *
Тадбирдан сўнг талабалар «Шайх Зайниддин» қабристонига дафн этилган марҳум устозларнинг қабрларини зиёрат қилиб, Қуръони карим оятларидан тиловат қилдилар.
Хайрли дуолар билан ташриф ниҳоясига етди.
Ўзбекистон мусулмонлари идораси
Тошкент шаҳар вакиллиги
Матбуот хизмати
Башакшеҳирда имомлар юртдошларимизнинг ислом динига оид саволларига жавоб беришди
Ўзбекистон Бош консулхонаси дипломатлари Истанбул шаҳрининг Башакшеҳир туманида ҳамюртларимизнинг мурожаатларини тинглаш ва уларнинг масалаларига амалий кўмак кўрсатиш мақсадида сайёр қабул ўтказди, деб хабар бермоқда “Дунё” АА.
Ташрифдан асосий мақсад ушбу ҳудудда яшаб, фаолият юритаётган ватандошларимизга зарур консуллик-ҳуқуқий маслаҳатлар бериш ва уларни қизиқтирган саволлар юзасидан амалий кўмак кўрсатишдан иборат бўлди.
Сафар давомида дипломатларга Ўзбекистон Мусулмонлари идораси вакиллари ҳам ҳамроҳлик қилди. Улар юртдошларимизнинг ислом динига оид саволларига жавоб берди ва турли тақиқланган ҳамда ақидавий жиҳатдан нотўғри йўналишдаги ташкилотларга алданиб қолмаслик учун зарур маслаҳатлар берди.
Ҳамюртларимизнинг Туркия ҳудудида қонуний яшашига оид масалалар, уларнинг ҳуқуқий ҳолати, ҳужжатлари ҳамда консуллик ёрдами кўрсатиш имкониятлари юзасидан фикр алмашилди.
Бош консулхона вакиллари зарур ҳолларда Ўзбекистон фуқароларига ҳужжатларни расмийлаштириш ҳамда ватанга қайтиш билан боғлиқ масалаларда амалий кўмак беришга тайёр эканини билдирди.
Ўзбекистон мусулмонлари идораси Матбуот хизмати