Абу Ҳурайра розияллоҳу анҳудан ривоят қилинади. Расулуллоҳ соллаллоҳу алайҳи васаллам: "Мўминнинг руҳи унинг қарзи тўланмагунча ушлаб турилади", дедилар (Имом Термизий ривояти).

Ҳадисдан олинадиган фойдалар:
1. Мусулмон инсон вафотидан олдин қарзларини тўлашга ҳаракат қилиши лозим. Агар бунга қодир бўлмаса, унинг қарзини ворислари меросдан тўлайди. Мерос бўлмаса, ўз ёнларидан тўласалар ҳам бўлади. Агар улар ҳам қодир бўлмаса, мусулмонлардан имкони бор инсонлардан бирортаси бунга ҳаракат қилиши керак.

2. Шариат одамларга бўлган ҳақларга эътиборсизлик қилишдан, хусусан, қарзни ўз вақтида бермасликдан огоҳлантирган. Мусулмон инсон Аллоҳдан ёрдам сўраб, ўз қарзларини имкон қадар тезроқ узишга ҳаракат қилиши керак, шунда у вафот этганида зиммасида ҳеч кимнинг ҳаққи қолмайди.

Абдулмуқсид Пўлатов,
Ҳадис илми мактаби талабаси.