Ойша розияллоҳу анҳодан ривоят қилинади. Расулуллоҳ соллаллоҳу алайҳи васаллам “Албатта, Аллоҳ сизлардан бирингиз иш қилганда уни яхшилаб қилишини севади”, дедилар (Имом Байҳақий ривояти).

Мусулмон ҳар ишни пухта, чиройли ва мукаммал қилиши лозим. Чала, сифатсиз, “биздан кетгунча, эгасига етгунча” қабилида иш қилиш мусулмон инсонга мутлақо муносиб эмас. Сифатсиз иш қилган одам ўзича оз иш қилиб, кўп нарса топганга ўхшайди.

Аслида эса у ўзига зарар қилган бўлади. Ўзи бажармаган ишини бажарган қилиб кўрсатиш, сифатсиз ишини сифатли иш сифатида тақдим этиш, хом-ашёнинг арзонини ишлатиб, қимматидан фойдаланганини даъво қилиш кабилар ёлғончилик, мунофиқлик ҳисобланади. Булар “қўшиб ёзиш”, “қаллоблик” каби номлар билан ҳам ҳаммамизга таниш.

Ишдаги бу нуқсонларни давлат, халқаро ташкилот ва ширкатлар, хусусий ширкат ва шахслар қўлида иш бажарётганлар содир этишади. Бунга масъул ҳисобчиларнинг бажарилмаган режанинг ортиғи билан бажарилгани ҳақида ҳисобот тайёрлашларидан тортиб, сувоқчи устанинг сувалган деворнинг ўлчовига йўқ нарсани қўшиб ҳақ олишигача мисол келтириш мумкин. Бундай кўзбўямачиликлар амалга оширилаётган пайтда осон кўринса ҳам, аслида кони зарардир. Бу дунёда ҳам, охиратда ҳам шармандаликдир.

Шунинг учун Расулуллоҳ соллаллоҳу алайҳи васаллам бундан қайтарганлар. Абу Ҳурайра розияллоҳу анҳудан ривоят қилинади: Набий соллаллоҳу алайҳи васаллам: “Ким бизга нисбатан алдамчилик қилса, биздан эмас”, дедилар.

“Ҳалол касб-ҳунар – қут-барака келтирар” китобидан