Диний соҳа медиа вакиллари иштирокида ўқув-семинар
Бугун, 2 апрель куни Ўзбекистон мусулмонлари идорасида диний соҳада фаолият юритаётган матбуот ва ахборот хизмати ходимлари учун ўқув семинари ўтказилди. Унда Ўзбекистондаги ислом цивилизацияси маркази, Ўзбекистон халқаро ислом академияси, Имом Мотуридий халқаро илмий-тадқиқот маркази, Ўзбекистон мусулмонлари идораси Қорақалпоғистон қозиёти, вилоятлар ва Тошкент шаҳар вакилликлари матбуот котиблари ва ахборот хизмати ходимлари иштирок этди.
Анъанага мувофиқ, тадбир Қуръони карим тиловати билан бошланди. Дастлаб Ўзбекистон мусулмонлари идораси раисининг биринчи ўринбосари Ҳомиджон домла Ишматбеков семинар иштирокчиларига хайрли тилаклар билдирди. Шунингдек, бугунги ахборот ва технологиялар замонида диний соҳа фаолиятига оид материалларни оммага тақдим этиш, нохолис ахборотлардан огоҳлантириш ниҳоятда муҳим экани, бу эса соҳада ишлаётган матбуот котиблари ва мутахассислар зиммасига катта масъулият юклаши, шу боис улар ўзининг доимий малакасини ошириб бориши зарурлиги, бунда ўқув семинарларнинг алоҳида ўрни борлигини таъкидлади.
Шундан сўнг тўғридан-тўғри ва масофавий шаклда ўтган ўқув семинар тингловчилари Филология фанлари доктори Беруний Алимов, Дин ишлари бўйича қўмита бош мутахассиси Яҳёбек Ҳайиталиев, Алишер Навоий номидаги Тошкент давлат ўзбек тили ва адабиёти университети таянч докторанти Ориф Толиб каби соҳа мутахассисларининг дарсларини тинглади.
Ўқув-семинар давомида “Интернет тармоғида тарқалаётган ёт ғояларнинг таҳлили: муаммо ва ечимлар”, “Диний соҳа ходимларининг ОАВ ва ижтимоий тармоқларда чиқишлари тартиби бўйича тавсиялар”, “Замонавий ахборот технологияларда матнли материалларни тарқатиш усуллари” каби мавзуларда бир-биридан қизиқарли машғулотлар олиб борилди.
Ҳар бир дарс якунида тингловчилар ўзларини қизиқтирган саволларга атрофлича жавоб олишди.
Ўзбекистон мусулмонлари идораси
Матбуот хизмати
“Российская газета”: Ислом цивилизацияси маркази Янги Ўзбекистоннинг маънавий-интеллектуал юксалишига хизмат қилмоқда
“Российская газета”сида “Учинчи Ренессанс: Ислом цивилизацияси маркази Янги Ўзбекистоннинг маънавий-интеллектуал юксалишига хизмат қилмоқда” номли таҳлилий мақола чоп этилди, деб хабар бермоқда “Дунё” АА мухбири.
Нашрда Тошкентда барпо этилган Ислом цивилизацияси маркази илм-фан, таълим ва замонавий рақамли технологияларни бирлаштирган йирик маданий-маърифий платформа сифатида тақдим этилган. Пойтахтимизда қарийб 10 гектар майдонни эгаллаган ва VII асрга оид муқаддас Усмон Қуръонини сақлайдиган ушбу мажмуанинг ташкил этилиши Президент Шавкат Мирзиёев томонидан БМТ Бош Ассамблеясининг 72-сессиясида ислом динининг маърифий моҳиятини тарғиб қилиш бўйича илгари сурилган ташаббуси билан бевосита боғланади. Учинчи Ренессанс концепцияси ва Шарқнинг буюк алломалари мероси орқали мақолада мамлакат илмий тараққиётининг узвийлиги - қадимги кашфиётлардан тортиб сунъий интеллект, VR ва AR-технологиялари қўлланилган интерактив экспозицияларгача кенг ёритилган.
Шунингдек, нашрда Тошкент ва Самарқанд шаҳарларида бўлиб ўтган “Ислом цивилизацияси: янги нигоҳ — янги кашфиётлар” халқаро медиафоруми якунлари, унда 20 га яқин битимлар имзолангани таъкидланган. Улар орасида Халқаро медиаальянс тузиш, “Цивилизация овози” танловини таъсис этиш ҳамда миллий артефактларни хориждан қайтариш бўйича ишларни амалга ошириш тўғрисидаги қарорлар ўрин олган бўлиб, бу Ўзбекистон маданий меросини дунёда тизимли тарғиб қилиш учун мустаҳкам замин яратади.
Ўзбекистон мусулмонлари идораси Матбуот хизмати