РАМАЗОНГА ГЎЗАЛ ТУҲФА
Бошимизга ойлар султони, уммат учун улкан имкониятлар ойи – Моҳи Рамазон соя солиб турибди. Айни кунларда республикамизнинг барча ҳудудларида бўлгани сингари Тошкент вилоятида ҳам муборак ойга пухта тайёргарлик кўриляпти. Раҳмат ойи арафасида масжидларнинг янги бинолари фойдаланишга топширилиши хайрли анъанага айланиб қолди.
Бугун – саййидул айём жума куни Зангиота туманидаги "Умир" жоме масжидининг янги биноси Рамазонга гўзал туҳфа сифатида мўмин-мусулмонлар ихтиёрига топширилди.
Қуръони карим тиловати билан бошланган очилиш маросимида Тошкент вилояти бош имом-хатиби Жасурбек домла Раупов, туман бош имоми, нуроний отахонлар, маҳалла фаолари иштирок этди.
Масжиднинг эски биноси таъмирталаб, намозхонлар учун тор бўлиб қолган эди. 2021 йилнинг 15 март куни жоменинг янги биносига илк ғишт қўйилган эди. Орадан уч йил ўтиб барча шарт-шароитга эга замонавий байтуллоҳ қад ростлади.
Янги жоме биносида, ертўла билан қўшиб ҳисоблаганда, бир вақтнинг ўзида уч минг киши бемалол ибодатларни адо этиши мумкин.
Гўзал иморатга монанд тарзда замонавий таҳоратхона ҳам бунёд этилгани мўмин-мусулмонларни беҳад қувонтирди. Масжиднинг шундоқ ёнгинасида автотураргоҳ ҳам барпо этилгани айни муддао бўлди.
Эндиликда намозхонлар ёзнинг жазирамасида ҳам, қишнинг қаҳратонида ҳам бемалол жомега келиб, уловларни автотураргоҳга қўйиб, эмин-эркин ибодатларни адо этишлари мумкин. Чунки масжидга кондиционерлар ўрнатилган, илиқ пол ётқизилган.
Очилиш маросими сўнгида Набий соллаллоҳу алайҳи ва саламнинг «Ким Аллоҳ таоло учун бир масжид қурса, Аллоҳ унинг учун жаннатда бир уй қуради» (Имом Муслим ривояти), деган муборак ҳадислари Аллоҳнинг байтини обод қилишга ҳисса қўшган барча азиз инсонларга мужда тарзида айтилиб, уларнинг ҳақларига хайрли дуолар қилинди.
Эслатиб ўтамиз, Рамазон ойи бошлангунга қадар Тошкент вилоятида яна 2–3 та масжиднинг янги биноларини фойдаланишга топширали, иншоаллоҳ.
Тошкент вилояти вакиллиги
Матбуот хизмати
Тошкентда Ўзбекистон ва Покистон туризм соҳаси вакилларининг B2B форматидаги учрашуви бўлиб ўтди
Тошкентда Ўзбекистон ва Покистоннинг Карачи шаҳри туристик бизнеси вакиллари иштирокида B2B форматидаги учрашув бўлиб ўтди, деб хабар бермоқда “Дунё” АА мухбири.
Икки мамлакат туроператорлари ўртасидаги бевосита алоқаларни кенгайтириш, янги туризм маҳсулотларини яратишга бағишланган тадбир “Centrum Air” авиакомпанияси томонидан ташкил этилди. Учрашув Тошкент–Карачи йўналишида тўғридан-тўғри авиақатнов йўлга қўйилиши муносабати билан “FAM Trip” таништирув тури доирасида ўтказилди.
Жорий йилнинг 10–12 сентябрь кунлари бўлиб ўтган ташриф давомида Карачи туризм бизнесининг 10 нафар вакили Ўзбекистонга келди. Делегация Тошкент ва Самарқанднинг тарихий, маданий ва диққатга сазовор сайёҳлик масканлари ҳамда мамлакатнинг замонавий туризм инфратузилмаси билан танишди.
B2B форматидаги учрашувда Ўзбекистоннинг туризм салоҳияти ва ҳамкорликнинг истиқболли йўналишлари тақдимоти ўтказилди. Унда Покистон бозорида Тошкент, Самарқанд, Бухоро ва Хивани қамраб олувчи тарихий-маданий йўналишлар, Буюк Ипак йўли йўналишлари, гастрономик, экологик ва зиёрат туризмини тарғиб қилишга алоҳида эътибор қаратилди.
Икки мамлакат туризм соҳаси вакиллари қўшма турпакетларни ишлаб чиқиш, янги йўналишларни шакллантириш ҳамда Ўзбекистон ва Покистон бозорларида туристик маҳсулотларни илгари суриш масалаларини муҳокама қилди.
Таъкидланганидек, Карачи ва Тошкент ўртасида тўғридан-тўғри авиақатновнинг йўлга қўйилиши туризм йўналишлари, жумладан, “Карачи–Тошкент–Самарқанд” йўналишини ривожлантириш учун қўшимча имкониятлар яратади ва келгусида Ўзбекистоннинг бошқа сайёҳлик марказларини ҳам қамраб олиш имконини беради.
Ўзбекистон мусулмонлари идораси Матбуот хизмати
