Жаҳон банки делегацияси билан мулоқот қилинди
Бугун, 28 май куни Ўзбекистон мусулмонлари идораси идораси раиси ўринбосари Муҳаммадолим Муҳаммадсиддиқов Жаҳон банки хусусий сектор диагностикаси бўйича делегацияни қабул қилди.
Учрашув аввалида Муҳаммадолим домла меҳмонларни ташриф билан қутлаб, Муфтий Шайх Нуриддин Холиқназар ҳазратларининг салом ва тилакларини етказди. Сўнгра юртимизда кўплаб соҳалар қатори диний-маърифий соҳада бўлаётган янгиланишлар ҳақида сўзлаш баробарида Ўзбекистон мусулмонлари идораси фаолияти тўғрисида маълумот берди.
Ўз навбатида делегация аъзоси бўлган катта иқтисодчи Левент Карадай самимий қабул учун миннатдорчилик билдириб, ўзи фаолият юритаётган халқаро молия ташкилоти хусусий секторга сармоя киритиши, айни мақсадда жорий йил бошида ҳам келганлари, ўрганишлари натижасида Ўзбекистонда зиёрат туризми соҳаси истиқболли экани, шу боис ушбу йўналишга қизиқиш билдираётганларини айтиб ўтди.
Мулоқот давомида Диний идора тасарруфидаги зиёратгоҳлар, уларнинг фаолияти тўғрисида ҳам сўзлаб берилди. Шунингдек, хорижий делегация вакилларини қизиқтирган саволларга атрофлича жавоб қайтарилди.
Ўзбекистон мусулмонлари идораси
Матбуот хизмати
Бухорода диний соҳа ходимларига юксак эҳтиром кўрсатилди
Ватанимиз мустақиллигининг 35 йиллик байрами арафасида Бухоро вилоятида жамиятда миллий-диний қадриятларни мустаҳкамлаш, эл-юрт маънавияти ва осойишталигини таъминлаш йўлида фидокорона меҳнат қилаётган диний-маърифий соҳа ходимларини тақдирлашга бағишланган тантанали тадбирлар бўлиб ўтди.
Давлатимиз раҳбарининг тегишли фармонларига мувофиқ, диний соҳада самарали фаолият юритиб келаётган бир гуруҳ соҳа ходимлари юксак давлат мукофотлари билан тақдирландилар. Маросимда Бухоро вилояти ҳокимининг ўринбосари Азизбек Қаландаров иштирок этиб, йиғилганларни қутлуғ айём билан самимий қутлади ва давлат мукофотларини ўз эгаларига тантанали равишда топширди.
Шунингдек, байрам муносабати билан вилоят ҳокимлиги ташаббуси асосида соҳа фидойиларига махсус ваучерлар тақдим этилди. Тадбирда сўз олганлар давлатимиз томонидан маънавий-маърифий соҳа ходимларига қаратилаётган юксак эътибор ва ғамхўрлик учун миннатдорлик билдирдилар.
Бундан ташқари, Ўзбекистон мусулмонлари идораси Бухоро вилояти вакили, вилоят бош имом-хатиби Жобир домла Элов томонидан вилоят вакиллиги тасарруфида самарали хизмат кўрсатиб келаётган бир гуруҳ диний соҳа ходимларига ташаккурномалар топширилди.
Кўтаринки руҳда ўтган маросимларда бундай юксак эътибор ва эҳтиром соҳа фидойиларини эл-юрт фаровонлиги ва динимиз софлигини тарғиб этиш йўлидаги хайрли фаолиятга янада куч-ғайрат билан киришишга руҳлантириши таъкидланди.
Ўзбекистон мусулмонлари идораси
Матбуот хизмати
