Ҳаж мавсумидан сўнг Масжидул Ҳаромда Қуръон кўргазмаси очилди
Саудия Арабистони томонидан Маккадаги Масжидул Ҳаромнинг учинчи кенгайтирилишида Қуръонга йўналтирилган маълумот кўргазмаси очилди ва ташриф буюрувчиларга ноёб ва тарихий қўлёзмалардан фойдаланиш имкониятини тақдим этди.
Ташаббус дунёнинг турли бурчакларидан 1,6 миллиондан ортиқ зиёратчилар иштирокида якунланган 2025-йилги Ҳаж мавсумидан бир неча кун ўтиб амалга оширилди.
Дин ишлари раислиги томонидан Масжидул Ҳаром ва Масжидун Набавийда ташкил этилган кўргазма ташриф буюрувчиларга Қуръон йўл-йўриқлари, унинг маданий ва тарихий мазмуни ҳақида маълумот беришдан иборат.
Quran.uz
Индонезия Ҳаж ва Умра вазири Бухорога ташриф буюрди
7–8 сентабрь кунлари Индонезия Ҳаж ва Умра вазири Муҳаммад Ирфон Юсуф бошчилигидаги делегация Бухоро вилоятига ташриф буюрди.
Меҳмонларни темир йўл вокзалида вилоят ҳокими ўринбосари Б.Шаҳриёров, А.Қаландаровлар бошчилигидаги мутасаддилар кутиб олди.
Ҳоким ўринбосари Б.Шаҳриёров, А.Қаландаров , туризм бошқармаси бошлиғи А.Ражабов ва бош имом-хатиб Ж.Элов иштирокидаги учрашувда Бухоронинг ислом цивилизацияси тарихидаги ўрни, муқаддас қадамжолар ва алломалар меросини тарғиб қилиш, зиёратчилар оқимини ошириш ҳамда янги зиёрат туризми йўналишларини шакллантириш масалалари муҳокама қилинди.
Жакарта–Бухоро йўналишида чартер ва тўғридан-тўғри авиақатновлар йўлга қўйиш имкониятлари ҳам кўриб чиқилди.
Имом ал-Бухорий, Абдухолиқ Ғиждувоний ва Баҳоуддин Нақшбанд меросини Индонезияда тарғиб қилиш мақсадида Жакартадаги олий таълим муассасалари ва туристик компанияларда маъруза ҳамда тарғибот тадбирларини ташкил этиш таклиф қилинди.
Делегация Баҳоуддин Нақшбанд мажмуаси ва Бухоронинг тарихий марказлари билан танишиб, шаҳарнинг зиёрат туризми салоҳияти ҳақида маълумот олди.
Ташриф — Бухоро ва Индонезия ўртасидаги зиёрат туризми, диний-маърифий ҳамда маданий алоқаларни янги босқичга олиб чиқиш йўлидаги муҳим қадам бўлди.
Ўзбекистон мусулмонлари идораси Матбуот хизмати
