Индонезияда Ўзбекистоннинг бой илмий ва маънавий мероси эътироф этилди
Жакарта шаҳридаги Шариф Ҳидоятуллаҳ университети ҳамда Имом Бухорий халқаро илмий-тадқиқот маркази ҳамкорлигида нуфузли халқаро анжуман ташкил этилди.
Мазкур анжуманда Дин ишлари бўйича қўмита раиси ўринбосари Д.Махсудов, Ўзбекистон мусулмонлари идораси раиси ўринбосари Обиджон Қодиров иштирок этди.
Учрашувда Ўзбекистоннинг бой маънавий мероси алоҳида таъкидланди.
Ўзбекистон ва Индонезия ўзининг диний бағрикенглиги, илмий салоҳияти ва маданий хилма-хиллиги мисолларда кўрсатиб ўтилди.
Хусусан, Индонезия Дин ишлари вазирлиги вакили, доктор А.Салим:
"Ислом илми биргина жумла орқали чексиз маъноларни очиб бера олади. Бу унинг ҳаётийлиги ва доимо ривожланиб боришидаги кучидир," – дея таъкидлади.
Шунингдек, анжуманда Индонезия ва Марказий Осиё ўртасидаги тарихий ришталар, жумладан, Президент Сокарнонинг Имом Бухорий мақбарасини қайта кашф этишдаги роли, Валисонго орқали исломнинг тарқалиши каби мавзулар кенг ёритилди.
Сурхондарёда отинойилар учун семинар-тренинг ўтказилди
Жорий йилнинг 7-8 сентябрь кунлари Сурхондарё вилоятининг Имом Термизий халқаро илмий-тадқиқот маркази мажлислар залида икки кунлик ўқув-семинари доирасида "Мафкуравий хатарларга қарши курашишда отинойиларнинг ўрни ҳамда масъулияти" мавзусида семинар-тренинг бўлиб ўтди.
Тадбирда Ўзбекистон мусулмонлари идораси Сурхондарё вилояти вакилининг хотин-қизлар бўйича ўринбосари, вилоят ҳокимлиги мутасаддилари ҳамда диний соха ходимлари иштирок этишди. Иштирокчиларга семинарнинг аҳамияти, "Ақида илмининг мохияти ва мотуридийлик таълимоти", "Ёт оқимлар ғояларига раддиялар" - Имом Мотуридий халқаро илмий- тадқиқот маркази катта илмий ходими И.Абдурахмонов, "Глобаллашув асрида аёлларни ғоявий тахдидлардан асраш" - Имом Мотуридий халқаро илмий- тадқиқот маркази бўлим бошлиғи Ш.Жўраев ҳамда "Хотин-қизлар билан ишлашда услубий тавсиялар" - Ўзбекистон халқаро исломшунослик академияси доценти Д.Турдиевалар мавзуларида сўз юритдилар.
Семинар давомида бугунги кунда учраётган мафкуравий таҳдидлар, уларнинг олдини олиш, жамиятда соғлом маънавий муҳитни шакллантириш, айниқса хотин-қизлар ўртасида маърифий фаолиятни кучайтиришда отинойиларнинг ўрни ва масъулияти ҳақида атрофлича маълумотлар берилди.
Шунингдек, иштирокчилар билан очиқ мулоқот ташкил этилиб, мавзу юзасидан фикр ва таклифлар муҳокама қилинди ҳамда қизиқтирган саволларга мутахассислар томонидан жавоблар берилди.
Семинар-тренинг ўз ишини якунлади.
Ўзбекистон мусулмонлари идораси Матбуот хизмати