Ҳожилар хонадонларга чуқурроқ кириб бормоқда
Шу йил 28 июль куни пойтахтимизнинг Сергели туманидаги «Нурул ислом» жоме масжидида сайёр йиғилиш ўтказилди.
Туманлар бош имом-хатиблари, имом-домлалар, уламолар, «Ҳаж 2025» ҳожилари, маҳалла фаоллари қатнашган тадбирни Тошкент шаҳар бош имом-хатиби Абдуқаҳҳор домла Юнусов олиб бордилар.
Йиғилишдан сўнг маҳаллаларга чиқилиб, ёши улуғ инсонлар, ўзгалар кўмагига муҳтож кишилар, эҳтиёжманд, кам таъминланган, боқувчисини йўқотган, ажирим ёқасида турган 120 дан ортиқ оилалар ҳолидан хабар олинди.
Ҳудуддаги таъмирталаб аҳволга келиб қолган бир уй Сергели тумани имомлари, ҳомийлар кўмагида қайта қуриб берилиши тадбирнинг аҳамияти нақадар улуғ эканини кўрсатади.
Тумандаги 350-умумий ўрта таълим мактаби учун ҳожатхона қуриб бериш масаласи ҳам ҳомийларни жалб қилган ҳолда ҳал этилди.
Пешин намозидан сўнг Абдуқаҳҳор домла Юнусов «Нурул ислом» масжиди қавмига «Ўзгаларга яхшилик қилиш» мавзусида мавъиза қилиб бердилар.
Тадбир кўтаринки руҳда бўлиб ўтди. Хайрли дуолар йиғилишга ўзгача файз бағишлади.
MuslimShosh.uz
Сиз энг бой одамсиз!
Инсоннинг феъли қизиқ: биз кўпинча ўзимизда йўқ нарсалар ҳақида қайғуриб, қўлимиздаги бебаҳо неъматларни одатдаги ҳолдек қабул қиламиз. Ваҳоланки, биз оддий деб билган қулайликлар, соғлиқ ва бошқа имкониятлар сайёрамизнинг миллионлаб аҳолиси учун энг катта орзу ҳисобланади.
Жумладан, бугунги тонгни дунё бўйича 174 мингга яқин инсон қарши ололмади. Айни дамда 50 миллиондан ортиқ одам саратон касаллиги билан курашмоқда. 300 миллион инсон ранглар жилосини кўриш бахтидан маҳрум. 400 миллионга яқин киши эса эшитиш мосламаларисиз дунё товушларини эшита олмайди. 770 миллиондан ортиқ катта ёшдаги инсон ҳанузгача ўқиш ва ёзишни билмайди. 2,5 миллиарддан зиёд аҳоли глобал ахборот ва интернет имкониятларидан узилган ҳолда яшамоқда. 6,5 миллиард инсон эса самолётда умуман учиб кўрмаган...
Бу рақамлар шунчаки қуруқ кўрсаткичлар эмас. Улар ортида миллионлаб инсонларнинг ана шундай аянчли тақдири ётибди.
Агар сиз ҳозир ушбу матнни ўқий олаётган, атрофдаги ранглар ва товушларни ҳис қилаётган, энг муҳими, янги кунни соғ-омон яшаётган бўлсангиз, демак, сиз сайёрадаги энг бахтли инсонлардан бирисиз. Шундай экан, турмуш ташвишларидан нолишни тўхтатинг. Ён-атрофга боқинг: сиз яшаётган бугунги кунга кимлардир етмади. Демак, ҳар бир хотиржам олинган нафас, ҳар тинч отган тонг учун Яратганга ҳамдлар айтиб, шукроналик кайфияти билан яшанг. Чунки сиз энг бой одамсиз!
Акбаршоҳ РАСУЛОВ