#xabar #tayinlov
23 август куни Ўзбекистон мусулмонлари идораси раиси, муфтий Шайх Нуриддин Холиқназар ҳазратлари раислигида Навоий вилояти имом-хатиблари навбатдаги йиғилиши бўлиб ўтди.
Муфтий ҳазратлари сўнгги йилларда юртимизда амалга оширилаётган диний-маърифий ислоҳотлар, мўмин-мусулмонлар эҳтиёжларини қондириш йўлидаги ишлар ва имом-хатиблар олдида турган муҳим вазифалар тўғрисида нутқ қилдилар.
Йиғилишда ташкилий масала ҳам кўрилди. Навоий вилояти бош имом-хатиби Тоир домла Рўзиев бошқа вазифага ўтаётгани сабабли лавозимидан озод этилиб, Навоий вилояти бош имом-хатиби ўринбосари Темуржон домла Атоев Ўзбекистон мусулмонлари идорасининг Навоий вилоятидаги вакили, вилоят бош имом-хатиби лавозимига тайинланди.
Маълумот ўрнида айтиш мумкинки, Темуржон домла Атоев Тошкент шаҳридаги “Кўкалдош” мадрасаси ва Миср Араб Республикасидаги ал-Азҳар университетида таҳсил олган. Меҳнат фаолияти давомида Навоий вилояти Нурота тумани “Чил устун” жоме масжиди имом ноиби, вилоят бош имом-хатиби ўринбосари вазифаларида меҳнат қилган.
Аллоҳ таолодан янги тайинланган бош имом-хатибнинг масъулиятли ва шарафли фаолиятига муваффақиятлар тилаймиз.
Ўзбекистон мусулмонлари идораси
Матбуот хизмати
Бугун, чоршанба куни Ўзбекистон мусулмонлари идорасида фуқароларнинг навбатдаги қабули бўлиб ўтди. Унда раис ўринбосари Муҳаммадолим домла Муҳаммадсиддиқов юртимизнинг турли ҳудудларидан ташриф буюрган юртдошларимизнинг мурожаатлари, фикр ва мулоҳазаларини тинглади.
Қабул давомида шаръий ҳукмлар, оилавий масалалар, моддий ёрдам сўровлари каби мавзулар тегишли тартибда кўриб чиқилиши белгиланди. Шунингдек, фуқаролар томонидан масжидларни ободонлаштириш, ёшлар ўртасида илмий-маърифий тарғибот ишларини кучайтириш юзасидан билдирилган таклифлар ҳам қайд этилди.
Ваколат доирасидаги масалалар бўйича масъул ходимларга топшириқлар берилди ва фуқаролар мурожаатларини ҳал этиш бўйича чоралар кўрилди.
Ўзбекистон мусулмонлари идораси
Матбуот хизмати