Қозиётда ҳисобот йиғилиши
25 сентябрь куни Қорақалпоғистон мусулмонлари қозиёти мажлислар залида республикамиздаги масжид имом-хатиблари иштирокида 2025 йилнинг 9 ойлик якуни бўйича йиғилиш бўлиб ўтди.
Йиғилишда диний соҳа ходимларига тегишли бўлган вазифалар, ютуқларимиз билан бирга камчиликларимиз ҳам борлиги, келгусида қилинадиган ишлар, имом-хатиблар фаолиятини янада ошириш, куз-қиш мавсумига пухта тайёргарлик кўриш, имом-хатибларнинг ўзларига бириктирилган маҳаллалар билан яқин алоқада бўлиш, бидъат-хурофотларга чек қўйиш, шунингдек, ёшлар орасида таълим-тарбия масалалари, кийиниш маданияти, жаҳолатга қарши маърифат билан жавоб беришимиз, меҳнат мигрантлари билан биргаликда иш олиб бориш ва бошқа муҳим масалалар ҳақида сўз юритилди.
Йиғилишни Қорақалпоғистон мусулмонлари қозиёти қозиси Б.Разов бошқариб борди.
Б.АББАЗОВ,
Қорақалпоғистон мусулмонлари қозиёти ходими.
Шаҳрисабздаги "Оқ масжид" жомесининг янги биноси қурилиши бошланди
Қашқадарё вилояти Шаҳрисабз туманидаги «Оқ масжид» жоме масжидининг янги биноси пойдеворига илк ғишт қўйиш маросими бўлиб ўтди.
Хайрли тадбирда Ўзбекистон мусулмонлари идорасининг Қашқадарё вилоятидаги вакили, вилоят бош имом-хатиби Раҳматилло домла Усмонов, туман имом-хатиблари, маҳалла фаоллари ва кўп сонли намозхонлар иштирок этди.
Йиғилганлар мазкур эзгу ташаббуснинг бардавом бўлишини, қурилиш ишларининг кўнгилдагидек, бехатар ва тез фурсатларда якунланишини тилаб, Аллоҳ таолодан хайр-барака сўраб дуолар қилдилар.
Таъкидланганидек, янги бино қад ростлаши натижасида ҳудуд аҳолиси ва масжид қавми учун янада кенг, қулай ва замонавий шароитлар яратилади.
Шунингдек, масжид қурилишига холис ҳисса қўшаётган барча саховатпеша юртдошларимиз ҳамда қурувчи-мутахассислар ҳаққига эзгу дуолар қилинди.
Ўзбекистон мусулмонлари идораси
Матбуот хизмати
