Қўлимиздаги мол бизники эмас
Бисмиллаҳир Роҳманир Роҳийм
Бисмиллаҳир Роҳманир Роҳийм.
Аллоҳ таолога битмас-туганмас ҳамду санолар бўлсин.
Пайғамбаримизга мукаммал ва батамом салавоту дурудлар бўлсин.
Набий соллаллоҳу алайҳи васалламнинг уйларида қўй сўйилди. Уни садақа қилиб юборишни буюрдилар. Сўнгра бир иш билан уйдан чиқиб кетдилар. Қайтиб келгач, Оиша розияллоҳу анҳодан сўрадилар:
- Ундан нима қолди?
Оиша онамиз розияллоҳу анҳо дедилар:
- Фақат қўли қолди.
Шунда Набий соллаллоҳу алайҳи васаллам:
غير كتفها بقى كلها
- Қўлидан бошқа ҳамма жойи қолибди! дедилар (Имом Термизий ривояти).
Буюк инсоннинг буюк жавоби!
Расулуллоҳ соллаллоҳу алайҳи васаллам доимо инсонларга дунёнинг охират экинзори эканини таъкидлар эдилар. Бугун фақат экиш бор. Ҳосил олиш йўқ. Охиратда эса ҳосил йиғиштириш бор, экиш йўқ!
Расулуллоҳ соллаллоҳу алайҳи васаллам имкон туғилгани заҳоти дарров пайтни ғанимат билиб, дунёнинг фонийлигини, охиратнинг боқийлигини инсонларга сингдиришга ҳаракат қилар эдилар. Юқоридаги савол-жавоб ҳам барча уйларда бўлиб турадиган оилавий суҳбат эди. Эр хотинидан уйдаги чиқим ва овқат ҳақида сўраяпти. Набий соллаллоҳу алайҳи васаллам оддий суҳбатни ғайриоддий дарсга айлантиряптилар! У киши Оиша онамиз розияллоҳу анҳодан дунё саволини сўраяптилар:
- Ундан нима қолди?
Оиша онамиз ҳам дунё жавобини беряптилар
- Фақат қўли қолди.
Оиша розияллоҳу анҳонинг жавобларидан сўнг Расулуллоҳ соллаллоҳу алайҳи васаллам дарров охират дарсларидан муҳим бир дарсни беряптилар:
- Қўлидан бошқа ҳамма жойи қолибди!
Қўлимиздаги мол бизники эмас.
Бизнинг ҳақиқий молимиз эрта қиёматда топишимиз учун бугун Аллоҳнинг ҳузурида захира қилаётган молимиздир!
Қўйнинг қўли еб тугатилади. Аммо ундан чиқарилган садақа Аллоҳнинг ҳузурида сақланиб қолади. Аллоҳ Ўзининг карами билан эътибор берадиган охиратдаги «банк»да сақланади!
Бу ҳақда Расулуллоҳ соллаллоҳу алайҳи васаллам яна бундай деганлар:
من تصدق بعدل تمرة من كسب طيب - ولا يقبل الله إلا الطيب - فإن الله يقبلها بيمينه ثم يربيها لصاحبها كما يربى أحدكم فلوه حتى تكون مثل الجبل
«Ким ҳалол топган молидан хурмо миқдорича садақа қилса — Аллоҳ таоло фақат ҳалол, пок нарсани қабул қилади - албатта, Аллоҳ уни ўнги билан қабул қилиб, сизлар кичкина тойчоқни парвариш қилганингиз каби ўстириб парваришлайди. Ҳатто ўша садақаси тоғ баробар бўлиб кетади» (Имом Бухорий ва Имом Муслим ривояти).
«Банк»нинг ажойиблигини қаранг! Захиранинг баракасини қаранг! Аллоҳнинг розилигини истаб қилинган хурмо миқдоридаги садақангизни Аллоҳнинг Ўзи қабул қилиб олиб, уни ўстирар экан. Эртага охират кунида Аллоҳнинг ҳузурига борсангиз, уни худди тоғ каби катталашиб кетган ҳолда топар экансиз!
Султон Сулаймон Қонуний ўлим тўшагида ётганида атрофидагиларга: «Агар вафот қилсам, қўлимни тобутдан чиқариб қўйинглар. Инсонлар кўрсинки, султон дунёдан икки қўли бўш ҳолатда кетмоқда!» деб тайинлаган экан.
Садақа қилайлик! Кафаннинг чўнтаги йўқ!
«Набавий тарбия» китоби асосида тайёрланди
“Azzaman” газетаси: Янги Ўзбекистонда кенг қамровли ислоҳотлар амалга оширилмоқда
Ироқнинг “Azzaman” газетасида “Ўзбекистон мустақиллигининг ўттиз беш йиллиги: Давлат барпо этишдан Учинчи Ренессанс сари” номли мақола эълон қилинди, деб хабар бермоқда “Дунё” АА.
Мақолада таъкидланишича, Ўзбекистоннинг мустақиллик йилларида босиб ўтган тараққиёт йўли, амалга оширилган кенг кўламли ислоҳотлар ҳамда мамлакатнинг халқаро майдондаги нуфузи тобора юксалиб бормоқда.
1991 йилда қўлга киритилган мустақиллик Ўзбекистон халқи ҳаётида тарихий бурилиш ясаб, миллий давлатчилик асосларини шакллантириш, иқтисодий тараққиёт пойдеворини яратиш ва ижтимоий барқарорликни таъминлаш жараёнини бошлаб берди.
2016 йилдан бошлаб Президент Шавкат Мирзиёев раҳбарлигида мамлакатда “Янги Ўзбекистон” тамойили асосида кенг қамровли ислоҳотлар амалга оширилмоқда. Ушбу жараёнда Ўзбекистон Марказий Осиёда изчил ва мувозанатли ривожланиш йўлидан бораётган давлат сифатида эътироф этилмоқда.
Муаллиф Ўзбекистонда сўнгги йилларда иқтисодиётни либераллаштириш, инвестицияларни жалб этиш, савдо-иқтисодий алоқаларни кенгайтириш, инфратузилмани модернизация қилиш, рақамлаштириш ва тадбиркорлик муҳитини яхшилаш борасида амалга оширилган чора-тадбирларга эътибор қаратган.
Мақолада аҳолини ижтимоий ҳимоя қилиш тизимини такомиллаштириш, таълим ва соғлиқни сақлаш хизматлари сифатини ошириш, ёшлар ҳамда хотин-қизларнинг жамиятдаги фаоллигини кучайтиришга қаратилган ислоҳотлар ҳақида ҳам алоҳида фикр юритилган.
Нашрда Президент Шавкат Мирзиёев томонидан илгари сурилган “Учинчи Ренессанс” ғояси Ўзбекистон тараққиётининг муҳим стратегик йўналишларидан бири сифатида баҳоланган. Унда Хоразмий, Беруний, Ибн Сино, Имом Бухорий ва Имом Термизий каби буюк алломалар етишиб чиққан юрт бугунги кунда илм-фан, инновация, технология ва инсон капиталини ривожлантириш орқали янги уйғониш даврини яратишга интилаётгани қайд этилган.
Ироқ матбуоти Ўзбекистоннинг ислом цивилизацияси тарихидаги ўрнига ҳам тўхталиб, мамлакатда бой илмий-маърифий меросни ўрганиш ва тарғиб қилишга қаратилган лойиҳалар амалга оширилаётганини таъкидлаган. Жумладан, Тошкент шаҳрида бунёд этилган Ислом цивилизацияси маркази Мовароуннаҳр алломаларининг жаҳон тамаддунига қўшган улкан ҳиссасини намойиш этувчи муҳим илмий-маданий маскан сифатида қайд этилган.
Ўзбекистон мусулмонлари идораси Матбуот хизмати
