Эркаклар ва аёллар учун Ҳатимда намоз ўқиш вақтлари
Ҳатим ёки бошқача номи Ҳижри Исмоил, Макка шаҳридаги Масжиди Ҳарамда жойлашган ярим ой шаклидаги ҳудуд бўлиб, Қаъбанинг бир қисми ҳисобланади.
Пайғамбаримиз алайҳиссаломнинг йигитлик даврида Каъба қайта қурилганда, маблағ етмай қолади ва Каъба пойдевори аввалги ҳолатида кичик қилиб тикланади. Ҳозирда ўша қурилмай қолган жой, одам бўйи қадар ярим доира шаклида девор билан ўраб қўйилган.
Ҳатим ҳам Каъба таркибига киради, у ерда ўқилган намоз Каъба ичида ибодат қилгандек бир хил. Шунинг учун ҳам зиёратчилар Ҳатимда намоз ўқишга интиладилар.
Ҳатим ҳудудига кириш эркаклар ва аёллар учун алоҳида вақтларда ташкил этилган бўлиб, зиёратчиларнинг тартибли ва хотиржам ибодат қилиши таъминланган.
Эркаклар учун намоз вақтлари, тунда: 22:00 дан 02:00 гача.
Эркаклар Ҳатимда кечки пайт соат 22:00 дан 02:00 гача намоз ўқишлари мумкин. Бу вақтларда гавжумлик нисбатан кам бўлади.
Аёллар учун намоз вақтлари, кундузи: 07:30 дан 11:00 гача.
Аёлларга Ҳатимда намоз ўқиш учун махсус вақт, соат 07:30 дан 11:00 гача.
Зиёратчилар Ҳатим ҳудудига ғарбий томондаги эшикдан кирадилар. Ҳатимда 10 дақиқа бўлиш тавсия этилади.
Ҳатим Иброҳим ва Исмоил алайҳумуссалом томонидан қурилган илк Каъба биносидан бир қисми сифатида қадрланади. У ерда намоз ўқиш савобли амал ҳисобланади ва кўплаб ҳожилар ҳамда умра зиёратчилари Ҳатимга кириб ибодат қилишга интиладилар.
Баъзи пайтларда тозалаш ёки техник сабабларга кўра вақтларда кичик ўзгариш бўлиши мумкин. Зиёратга бораётганлар Ҳатимга кириш вақтлари ҳақидаги сўнгги маълумотларни олдиндан текшириб олишлари тавсия этилади.
Т.Азимов
тайёрлади
"Имом Бухорий" ордени — юксак эҳтиром рамзи!
Куни кеча мамлакатимиз мустақиллигининг 35 йиллиги муносабати билан муҳтарам Президентимиз томонидан юксак давлат мукофотларига сазовор бўлган бир гуруҳ ватандошларимиз тақдирланди.
Энг қувончлиси шуки, тадбирда диний-маърифий соҳада фидокорона хизмат қилиб келаётган, халқимизнинг маънавий юксалишига беқиёс ҳисса қўшаётган таниқли уламоларимиз ва фахрийларимизнинг заҳматли меҳнатлари юксак даражада эътироф этилди!
Хусусан, Диний идора тизимида узоқ йиллардан бери самарали хизмат қилиб келаётган устозлардан Ўзбекистон мусулмонлари идораси раисининг биринчи ўринбосари Ҳомиджон домла Ишматбеков, Ўзбекистон мусулмонлари идораси Фахрийлар кенгаши раиси Шайх Абдулазиз Мансур, Самарқанд вилояти Пайариқ тумани "Имом ал-Бухорий" жоме масжиди фахрий имоми Маҳмуджон домла Ибодуллаев, Бухоро вилояти Когон тумани "Баҳоуддин Нақшбанд" жоме масжиди имом-хатиби Абдуғофур домла Раззоқов "Имом Бухорий" орденини Давлатимиз Раҳбаридан қабул қилиб олишди.
Устозларнинг илмий-маърифий фаолияти, халқ ичида маърифат улашишдаги фидойиликлари давлатимиз томонидан юксак қадрлангани бутун диний-маърифий соҳада меҳнат қилаётганлар учун катта фахр ва шарафдир.
Ушбу воқеа Янги Ўзбекистонда диний-маърифий соҳага, миллий қадриятларимизни авайлаб-асраш ҳамда ривожлантиришга қаратилаётган изчил ва хайрли сиёсатнинг амалий ифодасидир.
Халқимизда қадимдан маърифат аҳлини улуғлаш, уларнинг заҳматли меҳнатини қадрлаш эзгу анъана саналади. Ислом таълимотида ҳам илм эгаларига алоҳида мақом ва ҳурмат билан қаралади. Зеро, Имом Термизий бобомиз ривоят қилган ҳадиси шарифда: «Уламолар пайғамбарларнинг меросхўрларидир», дейилган.
Уламоларга кўрсатилаётган бундай эътиборнинг нечоғли хайрли экани қуйидаги ҳикматда ҳам ўз ифодасини топган. Улуғ зотлардан бири Товус раҳматуллоҳи алайҳ отасидан қуйидагича ривоят қилган: «Тўрт кишини ҳурмат қилиш суннатдир: олим, ёши улуғ инсон, подшоҳ ва ота» (Имом Абдураззоқ ривояти).
Мазкур юксак мукофот миллий ва диний қадриятларимизни тиклаш, Ислом маърифатини кенг тарғиб этиш, жамиятда бағрикенглик ва тинчлик-омонликни бардавом сақлаш йўлидаги кўп йиллик хайрли хизматларнинг муносиб эътирофидир.
Давлатимизнинг бундай эътибори диний соҳа ходимларига янада улкан масъулият юклайди, маънавий юксалиш йўлидаги хайрли хизматлар кўламини янада кенгайтиришга хизмат қилади, инша Аллоҳ.
Ўзбекистон мусулмонлари идораси Матбуот хизмати
- «
- »