Малайзия делегацияси Диний идорага ташриф буюрди
Бугун, 11 ноябр куни Ўзбекистон мусулмонлари идорасида Малайзиянинг Тун Хуссейн Онн номидаги давлат университети ҳузуридаги Исломшунослик институти раҳбари Хаирун Низам бошчилигидаги делегация билан учрашув ўтказилди.
Меҳмонларни Ўзбекистон мусулмонлари идораси раиси ўринбосари Муҳаммадолим домла Муҳаммадсиддиқов қабул қилди ва ташриф билан қутлаб, Диний идора фаолияти, бўлимлари, хусусан, Таълим ва илмий тадқиқотлар бўлими ҳақида айтиб ўтди.
Меҳмонлар сўнгги йилларда юртимизда диний-маърифий, туризм ва бошқа соҳаларда бўлаётган янгиланишларни эътироф этиб, Ислом цивилизацияси маркази, қайта бунёд этилиб, янада чирой очган Имом Бухорий мажмуаси, Мир Араб, Имом Мотуридий, Имом Термизий ва бошқа диний олий таълим масканлари ташкил этилганидан мамнун бўлганликларини айтиб ўтишди.
Учрашувда таълим-фан, илмий тадқиқот ишларида ўзаро ҳамкорлик қилиш, илмий-маърифий тажриба алмашинувларни йўлга қўйиш масалалари ҳақида сўз борди.
Якунда томонлар бир-бирларига муваффақият тилаб, эсдалик учун суратга тушиб, эсдалик ҳадялари алмашишди.
Ўзбекистон мусулмонлари идораси
Матбуот хизмати
Анжуман қатнашчилари Ислом цивилизацияси марказига саёҳат қилишди
Хабар берганимиздек, 19-20 август кунлари Ислом цивилизацияси марказида Ўзбекистон мусулмонлари идораси тасарруфидаги олий ва ўрта махсус диний таълим муассасалари профессор-ўқитувчиларининг «Замонавий диний таълим: педагогика, илм-маърифат ва инновация» номли I илмий-амалий анжумани бўлиб ўтмоқда.
Бугун, 19 август куни иштирокчилар кутиб олиниб, уларнинг Ислом цивилизацияси марказига саёҳати ташкил этилди. Ташриф давомида меҳмонлар марказнинг бой экспозициялари, Қуръони карим зали, нодир қўлёзмалар ҳамда буюк аждодларимизнинг илмий меросига бағишланган бўлимлар билан яқиндан танишди. Айниқса, замонавий мультимедиа лойиҳалари ва тарихий экспонатлар уларда чуқур таассурот қолдирди.
Устозлар Марказда амалга оширилаётган кенг кўламли ишлар ислом маърифатини тарғиб қилиш ҳамда ёш авлодни миллий-диний қадриятларга ҳурмат руҳида тарбиялашда муҳим аҳамият касб этишини эътироф этишди.
Шунингдек, иштирокчилар Ўзбекистон мусулмонлари идорасида ҳам бўлишди. Ҳазрати Имом мажмуасидаги тарихий қадамжо ва обидаларни зиёрат қилишди.
Оқшомда Ислом цивилизацияси маркази биносида маърифий дастур – mapping намойиш қилинди.
Мазкур тадбирлар ислом цивилизацияси меросини тарғиб этиш, диний таълим тизимини янада такомиллаштириб, янги босқичга олиб чиқишда салмоқли ҳисса бўлиб қўшилади.
Ўзбекистон мусулмонлари идораси Матбуот хизмати
- «
- »