Аждодларимиз меросидан янги бир дурдона – “Муснади Шоший” асари ўзбек тилида нашр этилди
Ҳадис илмига оид қадимий манбалардан бири – машҳур муҳаддис, Мовароуннаҳр уламоларидан, ҳофиз, имом Ҳайсам ибн Кулайб Шоший (ваф. 947) қаламига мансуб “Муснад” асари илк бор араб тилидан ўзбек тилига таржима қилиниб, нашр этилди.
Асарга Ўзбекистон мусулмонлари идораси раиси, муфтий Шайх Нуриддин Холиқназар ҳазратларининг, Фатво маркази уламоси Муҳаммад Айюб домла Ҳомидовнинг ҳамда Ражаб Тоййиб Эрдўғон университети илоҳиёт факультети, ҳадисшунослик кафедраси профессори Доктор Явуз Кўктошнинг тақризлари олинган.
Ушбу асар фақат таржима бўлибгина қолмай, балки тадқиқ ва таҳқиқдир. Кириш қисмида Ҳайсам ибн Кулайб Шоший раҳимаҳуллоҳнинг ҳаёти ва илмий мероси, сўнгра “Муснади Шоший” асарининг ягона қўлёзма нусхаси ҳақида маълумотлар берилган.
Таржима қўлёзма нусхадан фойдаланилган ҳолда нашр этилган замонавий нашрлар асосида амалга оширилган. Таржимада ҳадис ровийлари мавзуларга ажратилиб, дастлаб араб тилидаги матн, сўнг унинг ўзбек тилидаги таржимаси берилган. Жумлалар ўзбек тилидаги ифодаси равон ва тушунарли шаклда баён қилинган. Керакли ўринларда изоҳ ва шарҳлар келтирилган.
Асар илмий ва кенг китобхонлар учун ҳам муҳим манба бўлиб, уни соҳа мутахассислари, талабалардан ташқари оддий китобхонлар, ҳадис илмига қизиқувчилар ҳам қийналмасдан ўқиб, тушуна оладилар. Бу эса таржиманинг қийматини, таржимоннинг маҳоратини кўрсатиб берувчи жиҳатлардан биридир.
Аллоҳ таоло ушбу янги нашрни Ўзи қабул айлаб, барча учун манфаатли қилсин!
#Musnad #Haysam #Kulayb #Shoshiy #Hadis
Ўзбекистон мусулмонлари идораси
Матбуот хизмати
“Em Insight”: Тошкентдаги халқаро медиафорум ислом цивилизациясининг замонавий қиёфасини намоён этди
Британиянинг “Em Insight” журналида Ўзбекистонда бўлиб ўтган “Ислом цивилизацияси: янги нигоҳ, янги кашфиётлар” мавзусидаги халқаро медиафорумга бағишланган мақола эълон қилинди, деб хабар бермоқда “Дунё” АА.
Нашрда ёзилишича, Ўзбекистон Ислом цивилизацияси маркази томонидан ташкил этилган “Ислом цивилизацияси: янги нигоҳ, янги кашфиётлар” халқаро медиафоруми хорижлик ОАВда катта қизиқиш уйғотган.
Рақамли платформалар, сунъий интеллект ва ахборот хуружлари авж олган ҳозирги замонда оммавий ахборот воситаларининг мамлакатлар, маданиятлар ва цивилизациялар ҳақидаги тасаввурларни шакллантиришдаги ўрни тобора ортиб бормоқда.
Мақолада таъкидланишича, Ал-Хоразмий, Ибн Сино, Беруний, Имом Бухорий, Имом Термизий ва Мирзо Улуғбек каби жаҳон илм-фани ривожига беқиёс ҳисса қўшган буюк мутафаккирлар юрти бўлмиш Ўзбекистон бу каби глобал муҳокамалар учун энг мақбул майдондир.
Қатарнинг “The Peninsula” газетаси масъул муҳаррири Муҳаммад Осмон форумнинг рақамли ахборот асридаги аҳамиятига тўхталиб, Имом Бухорийнинг ҳадисларни тўплаш ва уларнинг ҳаққонийлигини текширишдаги қатъий ёндашувини тилга олди.
У ушбу методологияни манбаларни чуқур ўрганиш ва верификация қилишнинг ўчмас намунаси деб атади ва бу тамойиллар фейк хабарлар ҳамда сунъий интеллект маҳсулотлари кўпайган ҳозирги даврда жуда аҳамиятли эканини билдирди.
Ўзбекистон Миллий ахборот агентлиги муҳаррири Ўткир Алимов форумнинг Мустақилликнинг 35 йиллиги остонасида ўтказилаётганига эътибор қаратган. У 50 мамлакатдан 300 га яқин ОАВ вакилларининг Тошкентда жамлангани Ўзбекистоннинг цивилизациялар чорраҳаси сифатидаги ўрни ортиб бораётганидан далолат беришини таъкидлади.
Мақолада Тошкентдаги халқаро медиафорум журналистика масъулияти, тарихий тадқиқотлар чуқурлиги ва замонавий технологиялар имкониятларини бирлаштирган ҳолда Ислом цивилизациясини янги, замонавий қиёфада дунёга танитишга хизмат қилиши баён этилган.
Ўзбекистон мусулмонлари идораси Матбуот хизмати
