Бебаҳоларингиз бўлса...
Қийин вазиятларга тушиб қолганда ёрдам берадиган одам бўлса, бу сиз учун бебаҳо инъомдир. Биз кўпинча энг қийин дамларда ёнимизда қоладиган одамларнинг борлигини ёки қадрини сезмаймиз. Улар қўлимиздан тутиб, бизни қўллаб-қувватлаб, ўзимизга ишонмай қолсак ҳам, ҳаммаси яхши бўлишига бизни ишонтириб, далда берган бўлишади.
Ўзаро муносабатларнинг ҳақиқий кучи айнан шундай пайтларда қийин бўлганда намоён бўлади. Демак, муҳаббат нафақат қувончли дамларда бирга қувониш, балки ҳар қандай синовдан ўтишда елкадош бўлиш, матонат ва ғамхўрлик кўрсатишдир. Бу сўз билан ўлчанмайдиган, балки ҳаракатларда намоён бўладиган ҳақиқий ҳиссиётдир. Хўш, сизнинг ана шундай бебаҳо яқинларингиз борми? Бор бўлса, ҳаётдаги майда муаммолар олдида ҳечам ғам еманг. Билсангиз, сиз энг бахтиёр бандалардан экансиз!..
Акбаршоҳ Расулов
Ар-Риёзда ўзбек миниатюра санъати кўргазмаси очилди
Саудия Арабистони пойтахтида Ўзбекистон Мустақиллигининг 35 йиллигига бағишланган “Миниатюра санъати: Бухородан Арабистон ярим оролигача. Муқаддас қадамжолар йўлидаги тарих” номли маданий кеча ва кўргазманинг очилиш маросими бўлиб ўтди, деб хабар бермоқда “Дунё” АА мухбири.
Тадбир Ўзбекистон элчихонаси томонидан ташкил этилди. Унда дипломатик корпус, давлат идоралари, оммавий ахборот воситалари вакиллари, маданият ва санъат арбоблари иштирок этди.
Кўргазмада ўзбек усталарининг 35 та ижодий иши намойиш этилиб, улар ташриф буюрувчиларни Ўзбекистон миниатюра рангтасвири тарихи, бадиий хусусиятлари ва анъаналари билан таништиради.
Ўзбекистон элчиси Нодиржон Турғунов халқлар ўртасидаги ўзаро англашувни мустаҳкамлаш ва ўзбек-саудия маданий-гуманитар алоқаларини ривожлантиришда маданиятнинг ўрнини таъкидлади.
“AlMashtal” креатив маркази раҳбари, малака Нура бинт Сауд бин Наиф Ал Сауд Ўзбекистонни мустақилликнинг 35 йиллиги билан табриклаб, миниатюра санъатини ислом бадиий меросининг бир қисми сифатида сақлаб қолиш аҳамиятини алоҳида қайд этди.
Тадбир доирасида таълим ва санъат соҳасидаги ҳамкорлик истиқболлари ҳам муҳокама қилинди. Саудия университетлари вакиллари Камолиддин Беҳзод номидаги Миллий рассомлик ва дизайн институти билан академик алмашинувлар, қўшма тадқиқотлар ва касбий алоқаларни ўз ичига олган шерикликни йўлга қўйишдан манфаатдор эканликларини билдирдилар.
Кўргазма ташриф буюрувчилар учун икки кун давомида очиқ бўлади. Шунингдек, ўзбек мутахассислари раҳбарлигида 35 нафар саудиялик ҳаваскор рассомлар ва ёш усталар учун амалий маҳорат сабоқлари ўтказилади.
Ўзбекистон мусулмонлари идораси Матбуот хизмати