Эрон элчихонаси маслаҳатчиси билан учрашув ўтказилди
Бугун, 6 январь куни Ўзбекистон мусулмонлари идораси раисининг биринчи ўринбосари Ҳомиджон домла Ишматбеков Эрон Ислом Республикасининг Ўзбекистондаги элчихонаси маслаҳатчиси Ҳасан Сафархонийни қабул қилди.
Самимий мулоқот чоғида Ҳомиджон домла Ишматбеков юртимизда диний-маърифий соҳада амалга оширилаётган ислоҳотлар, Ўзбекистон ва Эрон ўртасидаги дўстона муносабатлар изчил ривожланиб бораётганини таъкидлади. Икки халқни ягона дин ва муштарак қадриятлар бирлаштириб келаётгани, сўнгги йилларда ўзаро ҳамкорлик янги босқичга кўтарилгани қайд этилди.
Учрашувда илмий-маърифий ва маданий йўналишларда ҳамкорликни янада кенгайтириш икки томон учун ҳам самарали бўлиши алоҳида таъкидланди.
Ўз навбатида, Ҳасан Сафархоний Ўзбекистондаги барқарор тараққиётни юқори баҳолаб, мамлакатнинг мусулмон оламидаги нуфузи ортиб бораётганини эътироф этди. Шунингдек, диний-маърифий соҳада алоқаларни ривожлантириш, қўлёзмаларни қўшма тарзда тадқиқ этиш, Қуръони карим таълими ва тафсири, ҳаж ва умра тадбирларини ташкил этиш ҳамда қатор қўшма лойиҳаларни амалга ошириш имкониятлари муҳокама қилинди.
Учрашув якунида меҳмон самимий қабул ва эсдалик совға учун миннатдорлик билдирди.
Ўзбекистон мусулмонлари идораси
Матбуот хизмати
Ўзбекистонда жаҳон хаттотлар танлови 26 августда эълон қилинади
Ўзбекистонда ноёб Қуръон яратиш бўйича жаҳон хаттотлар танлови 26 август куни Ўзбекистондаги Ислом цивилизацияси марказида эълон қилинади. Танлов «Ислом цивилизацияси: янги нигоҳ — янги кашфиётлар» халқаро медиафоруми доирасида ўтказилади, хабар бермоқда UzDaily.uz.
«Дунё Қуръони: хаттотлик анъаналаридан — келажак мероси сари» лойиҳасини хаттот ва Ислом цивилизацияси маркази ҳузуридаги Хаттотлик мактаби директори Ҳабибулло Солиҳ тақдим этади. Бу ҳақда тадбир ташкилотчиси хабар берди.
Танлов доирасида турли мамлакатлар ва хаттотлик мактабларининг исломий хаттотликдаги энг яхши анъаналарини бирлаштирган ноёб Қуръон яратиш кўзда тутилган.
Танловнинг тантанали эълони «Асрларни бирлаштирувчи мерос. Ислом цивилизациясининг маънавий мазмунлари» мавзусидаги ялпи сессиянинг якуний қисми бўлади. Сессия 26 август куни соат 09:30 дан 12:00 гача ўтказилади.
Тадбир доирасида оммавий ахборот воситаларининг стереотиплар ва исломофобияни енгишдаги ролига бағишланган халқаро муҳокама ҳам бўлиб ўтади. Унда Ислом ҳамкорлик ташкилоти, Жазоир, Уммон, Покистон, Саудия Арабистони, Ироқ, Мали ва Ўзбекистоннинг давлат тузилмалари ҳамда ОАВ вакиллари иштирок этади.
Форум дастуридан Қуръоний ва қўлёзма меросга бағишланган лойиҳалар ҳам ўрин олган. Улар орасида «114 Қуръон: ислом оламининг 114 хаттотлик дурдонаси», «Катта Лангар Қуръони: ҳақиқат ва ривоятлар» халқаро лойиҳаси ҳамда «Сунъий интеллект — қадимий қўлёзмаларни ўқишнинг рақамли калити» лойиҳаси бор.
Ўзбекистонда хаттотликни ривожлантиришга институционал даражада ҳам эътибор қаратилмоқда. Ислом цивилизацияси маркази ҳузурида Президент Шавкат Мирзиёев ташаббуси билан ташкил этилган Хаттотлик мактаби фаолият юритмоқда. Мактабда сулс, насх, настаълиқ, руқъа, девоний ва куфий каби анъанавий ёзув услубларини ўргатиш режалаштирилган.
Хаттотлик санъати Самарқанд вилоятидаги янги Имом ал-Бухорий мажмуасида ҳам намоён этилган. Мажмуа пештоқлари ва айвонлари деворлари «Саҳиҳ ал-Бухорий»дан олинган ҳадислар битилган ёзувлар билан безатилган. Мажмуа ҳузурида Имом Бухорий халқаро илмий-тадқиқот маркази ва Ҳадис илмий мактаби ҳам фаолият юритади.
Халқаро медиафорумнинг асосий майдони Ўзбекистондаги Ислом цивилизацияси маркази бўлади.
Тадбирда қарийб 50 мамлакатдан медиа ва экспертлар ҳамжамиятининг 300 га яқин вакили иштирок этади. Улар орасида медиакомпаниялар, ахборот агентликлари ва телеканаллар раҳбарлари, журналистлар, продюсерлар, олимлар ҳамда креатив индустрия мутахассислари бор.
Ўзбекистон мусулмонлари идораси матбуот хизмати