Ислом таълим муассасалари битирувчилари билан учрашув
Самарқанд вилояти бош имом-хатибининг ўринбосарлари Хайрулло домла Саттаров ҳамда Нурсултонхон домла Абдуманноновлар 2024–2025 ўқув йилида ислом таълим муассасаларини муваффақиятли тамомлаган 28 нафар битирувчи билан учрашув ўтказди.
Учрашувда битирувчиларнинг бандлигини таъминлаш, уларни муносиб иш жойлари билан таъминлаш ҳамда зарур меҳнат шароитларини яратиш масалалари муҳокама қилинди.
Шунингдек, ёш имом-хатиблар ва имом-ноиблар билан бўлиб ўтган самимий суҳбатда келгусидаги хизмат фаолиятида масъулият, садоқат ва доимий равишда билим ва малака ошириб бориш муҳим экани алоҳида таъкидланди.
Учрашув ўзаро фикр алмашув ҳамда амалий тавсиялар билан якунланди.
Sammuslim.uz
Аҳоли билан очиқ мулоқот: мурожаатлар ечим топмоқда
Ўзбекистон мусулмонлари идораси томонидан аҳоли билан йўлга қўйилган очиқ ва самимий мулоқот тизими фуқароларнинг мурожаатларини атрофлича ўрганиш ҳамда уларга тезкор ечим топишда муҳим омил бўлмоқда.
12 август куни Диний идора раиси ўринбосари Зайниддин домла Эшонқулов навбатдаги фуқаролар қабулини ўтказиб, юртдошларимизнинг арз, таклиф ва мурожаатларини тингладилар. Юзма-юз суҳбат жараёнида масжидлар ҳолати ва фаолияти, имом-хатиблар иши, Ҳаж ва Умра зиёратларини ташкил этиш, оилавий муносабатларни тартибга солиш ҳамда моддий ёрдам кўрсатишга оид кўплаб масалалар чуқур таҳлил қилиниб, уларнинг аксарияти жойида ижобий ҳал этилди.
Эслатиб ўтамиз, бу каби қабуллар ва фуқаролар билан мулоқот тадбирлари Диний идоранинг ҳудудий вакилликлари ҳамда юртимиздаги барча жоме масжидларда ҳар ҳафтанинг чоршанба куни имом-хатиблар томонидан ўтказиб келинмоқда.
Ўзбекистон мусулмонлари идораси
Матбуот хизмати
