Сурхондарё имомлари иштирокида “яшил белбоғ” барпо этилмоқда
#яшил_макон #янгилик
Ободлик кўнгилдан бошланади. Буни яхши англаган меҳнатсевар халқимиз ҳамиша бу заминни обод қилишга интилади. Атрофнинг гўзаллиги, яшилликка бурканиши, кишиларда баҳорий кайфият уйғотади. Бундай хайрли амаллар, аввало, инсонлар саломатлиги ва руҳиятига ижобий таъсир қилади.
Муҳтарам Президентимиз 2025 йилнинг 26 декабрь куни Олий Мажлис ва Ўзбекистон халқига қилган Мурожаатномасида экологик мувозанатни таъминлаш, “яшил” энергетикани ривожлантириш ва сув ресурсларидан оқилона фойдаланиш масалаларига алоҳида эътибор қаратилиб, Сурхондарё вилоятида чанг-тўзонларнинг олдини олиш мақсадида ўн минг гектар майдонда яшил макон барпо этиш борасидаги топшириқлари ҳам шу йўналишдаги эзгу ташаббусларнинг мантиқий давоми бўлди.
Сурхондарё вилояти ҳокимлиги ҳамда Ўзбекистон мусулмонлари идораси Сурхондарё вилояти вакиллиги юртбошимизнинг хайрли ташаббусларини қўллаб-қувватлаган ҳолда вилоятда мунтазам эсадиган чангли шамолларнинг салбий таъсирини камайтириш, яшил белбоғлар барпо этишга киришди. Вилоятнинг Ангор ва Термиз туманларини боғловчи М-39 халқаро автомагистраль йўли бўйида жойлашган уч гектар ер майдонда кўкаламзорлаштириш ишлари олиб борилмоқда. Ушбу тадбир олди жонлиқ сўйилиб, хайрли дуолар қилинди. Сўнг ҳудудда япон тути, жийда, катальпа ва сосна каби мевали ва манзарали кўчатлар экилиб, “яшил белбоғ” барпо этилмоқда.
Ана шундай хайрли ишларга барчамиз ўз ҳиссамизни қўшиб, юртимиз ободлигига ҳисса қўшайлик, азизлар.
Ўзбекистон мусулмонлари идораси
Матбуот хизмати
“Azzaman” газетаси: Янги Ўзбекистонда кенг қамровли ислоҳотлар амалга оширилмоқда
Ироқнинг “Azzaman” газетасида “Ўзбекистон мустақиллигининг ўттиз беш йиллиги: Давлат барпо этишдан Учинчи Ренессанс сари” номли мақола эълон қилинди, деб хабар бермоқда “Дунё” АА.
Мақолада таъкидланишича, Ўзбекистоннинг мустақиллик йилларида босиб ўтган тараққиёт йўли, амалга оширилган кенг кўламли ислоҳотлар ҳамда мамлакатнинг халқаро майдондаги нуфузи тобора юксалиб бормоқда.
1991 йилда қўлга киритилган мустақиллик Ўзбекистон халқи ҳаётида тарихий бурилиш ясаб, миллий давлатчилик асосларини шакллантириш, иқтисодий тараққиёт пойдеворини яратиш ва ижтимоий барқарорликни таъминлаш жараёнини бошлаб берди.
2016 йилдан бошлаб Президент Шавкат Мирзиёев раҳбарлигида мамлакатда “Янги Ўзбекистон” тамойили асосида кенг қамровли ислоҳотлар амалга оширилмоқда. Ушбу жараёнда Ўзбекистон Марказий Осиёда изчил ва мувозанатли ривожланиш йўлидан бораётган давлат сифатида эътироф этилмоқда.
Муаллиф Ўзбекистонда сўнгги йилларда иқтисодиётни либераллаштириш, инвестицияларни жалб этиш, савдо-иқтисодий алоқаларни кенгайтириш, инфратузилмани модернизация қилиш, рақамлаштириш ва тадбиркорлик муҳитини яхшилаш борасида амалга оширилган чора-тадбирларга эътибор қаратган.
Мақолада аҳолини ижтимоий ҳимоя қилиш тизимини такомиллаштириш, таълим ва соғлиқни сақлаш хизматлари сифатини ошириш, ёшлар ҳамда хотин-қизларнинг жамиятдаги фаоллигини кучайтиришга қаратилган ислоҳотлар ҳақида ҳам алоҳида фикр юритилган.
Нашрда Президент Шавкат Мирзиёев томонидан илгари сурилган “Учинчи Ренессанс” ғояси Ўзбекистон тараққиётининг муҳим стратегик йўналишларидан бири сифатида баҳоланган. Унда Хоразмий, Беруний, Ибн Сино, Имом Бухорий ва Имом Термизий каби буюк алломалар етишиб чиққан юрт бугунги кунда илм-фан, инновация, технология ва инсон капиталини ривожлантириш орқали янги уйғониш даврини яратишга интилаётгани қайд этилган.
Ироқ матбуоти Ўзбекистоннинг ислом цивилизацияси тарихидаги ўрнига ҳам тўхталиб, мамлакатда бой илмий-маърифий меросни ўрганиш ва тарғиб қилишга қаратилган лойиҳалар амалга оширилаётганини таъкидлаган. Жумладан, Тошкент шаҳрида бунёд этилган Ислом цивилизацияси маркази Мовароуннаҳр алломаларининг жаҳон тамаддунига қўшган улкан ҳиссасини намойиш этувчи муҳим илмий-маданий маскан сифатида қайд этилган.
Ўзбекистон мусулмонлари идораси Матбуот хизмати