Илм ва маърифат йўлида кечган умр
“Кўкалдош” ўрта махсус ислом билим юртида таниқли диний уламо Шайх Юсуфхон тўра Шокиров таваллудининг 100 йиллиги муносабати билан маънавий-маърифий тадбир ташкил этилди.
Тадбир бошида билим юрти талабалари томонидан тайёрланган Шайх Юсуфхон тўра Шокиров ҳаёти ва илмий фаолиятига бағишланган “Илм ва маърифат йўлида кечган умр” мавзусидаги видео ролик намойиш этилди.
Мазкур тадбирга алломанинг ўғли, Ўзбекистон мусулмонлари идорасида узоқ йиллар самарали хизмат қилган Муҳаммад Акмалхон Шокиров фахрий меҳмон сифатида таклиф этилди.
Тадбирни билим юрти маънавий ва маърифий ишлар бўйича мудир ўринбосари А.Ғаниев кириш сўзи билан очиб берди. У ўз нутқида Шайх Юсуфхон тўра Шокировнинг илм-маърифат ривожидаги ўрни ва диний соҳадаги фидокорона хизматларини алоҳида таъкидлади.
Муҳаммад Акмалхон Шокиров ўз нутқида оталари — Шайх Юсуфхон тўра Шокировнинг ҳаёт йўллари, илмга бўлган муҳаббати ва ибратли фаолиятлари ҳақида қимматли хотиралар билан ўртоқлашди. Шунингдек, толиби илмлар учун илм олишнинг фазилати, одоб-ахлоқ ва масъулият масалаларида муҳим маслаҳатлар бердилар.
Муҳаммад Акмалхон домланинг нутқидан сўнг билим юрти катта ўқитувчиси Ж.Холмўминов сўзга чиқиб, Шайх Юсуфхон тўра Шокировнинг илм йўлидаги машаққатли фаолияти, шунингдек, у зотнинг шогирдлари томонидан билдирилган эътирофлар ҳақида атрофлича тўхталиб ўтди.
Тадбир якунида Қуръони карим тиловат қилиниб, юртимизда илм йўлида умрларини бағишлаб ўтган алломалар ҳаққига, шунингдек, Ватанимизда тинчлик ва осойишталик бардавом бўлишини сўраб дуо-хайрлар қилинди.
Ўзбекистонда жаҳон хаттотлар танлови 26 августда эълон қилинади
Ўзбекистонда ноёб Қуръон яратиш бўйича жаҳон хаттотлар танлови 26 август куни Ўзбекистондаги Ислом цивилизацияси марказида эълон қилинади. Танлов «Ислом цивилизацияси: янги нигоҳ — янги кашфиётлар» халқаро медиафоруми доирасида ўтказилади, хабар бермоқда UzDaily.uz.
«Дунё Қуръони: хаттотлик анъаналаридан — келажак мероси сари» лойиҳасини хаттот ва Ислом цивилизацияси маркази ҳузуридаги Хаттотлик мактаби директори Ҳабибулло Солиҳ тақдим этади. Бу ҳақда тадбир ташкилотчиси хабар берди.
Танлов доирасида турли мамлакатлар ва хаттотлик мактабларининг исломий хаттотликдаги энг яхши анъаналарини бирлаштирган ноёб Қуръон яратиш кўзда тутилган.
Танловнинг тантанали эълони «Асрларни бирлаштирувчи мерос. Ислом цивилизациясининг маънавий мазмунлари» мавзусидаги ялпи сессиянинг якуний қисми бўлади. Сессия 26 август куни соат 09:30 дан 12:00 гача ўтказилади.
Тадбир доирасида оммавий ахборот воситаларининг стереотиплар ва исломофобияни енгишдаги ролига бағишланган халқаро муҳокама ҳам бўлиб ўтади. Унда Ислом ҳамкорлик ташкилоти, Жазоир, Уммон, Покистон, Саудия Арабистони, Ироқ, Мали ва Ўзбекистоннинг давлат тузилмалари ҳамда ОАВ вакиллари иштирок этади.
Форум дастуридан Қуръоний ва қўлёзма меросга бағишланган лойиҳалар ҳам ўрин олган. Улар орасида «114 Қуръон: ислом оламининг 114 хаттотлик дурдонаси», «Катта Лангар Қуръони: ҳақиқат ва ривоятлар» халқаро лойиҳаси ҳамда «Сунъий интеллект — қадимий қўлёзмаларни ўқишнинг рақамли калити» лойиҳаси бор.
Ўзбекистонда хаттотликни ривожлантиришга институционал даражада ҳам эътибор қаратилмоқда. Ислом цивилизацияси маркази ҳузурида Президент Шавкат Мирзиёев ташаббуси билан ташкил этилган Хаттотлик мактаби фаолият юритмоқда. Мактабда сулс, насх, настаълиқ, руқъа, девоний ва куфий каби анъанавий ёзув услубларини ўргатиш режалаштирилган.
Хаттотлик санъати Самарқанд вилоятидаги янги Имом ал-Бухорий мажмуасида ҳам намоён этилган. Мажмуа пештоқлари ва айвонлари деворлари «Саҳиҳ ал-Бухорий»дан олинган ҳадислар битилган ёзувлар билан безатилган. Мажмуа ҳузурида Имом Бухорий халқаро илмий-тадқиқот маркази ва Ҳадис илмий мактаби ҳам фаолият юритади.
Халқаро медиафорумнинг асосий майдони Ўзбекистондаги Ислом цивилизацияси маркази бўлади.
Тадбирда қарийб 50 мамлакатдан медиа ва экспертлар ҳамжамиятининг 300 га яқин вакили иштирок этади. Улар орасида медиакомпаниялар, ахборот агентликлари ва телеканаллар раҳбарлари, журналистлар, продюсерлар, олимлар ҳамда креатив индустрия мутахассислари бор.
Ўзбекистон мусулмонлари идораси матбуот хизмати