Ўзбек ёшлари Малайзиянинг етакчи университетида тўлиқ грант асосида таълим олишни бошлади
27 нафар ўзбеистонлик талаба Малайзиянинг Ал-Бухорий халқаро университетига танловлардан муваффақиятли ўтиб, тўлиқ грант асосида бакалавр босқичида таълим олиш учун қабул қилинди, деб хабар бермоқда “Дунё” АА мухбири.
Талабаларни Куала-Лумпур халқаро аэропортида Ўзбекистоннинг Малайзиядаги элчихонаси вакиллари ва университет раҳбарияти тантанали кутиб олди.
Мазкур танлов олий таълим олиш учун етарли имкониятга эга бўлмаган ёшлар ўртасида ўтказилди. Улар тўрт йил давомида Малайзия олий таълим вазирлиги томонидан тасдиқланган ва халқаро таълим стандартларига мос келадиган дастурлар бўйича замонавий инфратузилма билан жиҳозланган йирик кампусда таҳсил олади.
Лойиҳа Ўзбекистон Мусулмонлар идораси ҳузуридаги “Вақф” хайрия жамоат жамғармаси ва Малайзиянинг Ал-Бухорий жамғармаси ва шу номдаги халқаро университет раҳбарияти ўртасида эришилган келишув асосида амалга ошириб келинмоқда.
Бунда “Вақф” хайрия жамғармаси томонидан жорий йилнинг 31 майига қадар келгуси ўқув йили учун танловда иштирок этиш истагини билдирган кам таъминланган оилалар фарзандлари орасидан номзодлар рўйхати шакллантирилади.
Бирламчи ҳужжатлар текширувидан ўтган ёшлар Ал-Бухорий халқаро университети қабул комиссияси томонидан суҳбатдан ўтказилади ва муваффақиятли ўтган номзодлар грант асосида талаба бўлишлари мумкин.
Ал-Бухорий халқаро университети 2010 йилда ташкил этилган бўлиб, Ал-Бухорий жамғармаси томонидан хайрия асосида молиялаштириладиган хусусий олий таълим муассасасидир. Университет Кедах штатининг Алор Сетар шаҳрида жойлашган.
Айни пайтда олийгоҳда дунёнинг 60 дан ортиқ давлатидан 1572 нафар талаба таҳсил олмоқда. Кам таъминланган оилаларга мансуб талабалар учун бизнес бошқаруви, халқаро муносабатлар, иқтисодиёт, ислом молияси ва педагогика каби 12 та бакалавриат, шунингдек, 3 та магистратура ва 2 та докторантура (PhD) таълим йўналишлари бўйича ўқув дастурлари амалга оширилади.
Ўзбекистон мусулмонлари идораси
Матбуот хизмати
Имом-хатиблар: «Ислом цивилизацияси маркази Учинчи Ренессанс ғоясининг амалий ифодаси»
Ўзбекистонда Учинчи Ренессанс ғоясини ҳаётга татбиқ этиш, миллий ва диний меросни чуқур ўрганиш ҳамда маънавий-маърифий билимларни кенгайтиришга қаратилган ташаббуслар доирасида Фарғона, Қашқадарё ва бошқа ҳудудлардан келган имом-хатиблар Ўзбекистондаги Ислом цивилизацияси марказида бўлдилар. Улар Марказдаги музей экспозициялари, ноёб қўлёзмалар, Ренессанс даврларига бағишланган бўлимлар ва замонавий интерактив ечимлар билан танишиб, ушбу масканни илм, таълим ва маънавиятни уйғунлаштирган муҳим миллий платформа сифатида баҳоладилар, хабар бермоқда iccu.uz.
Фарғона вилояти Бувайда тумани «Катта маҳалла» масжиди имом-хатиби Раҳматуллоҳ Ғойибназаров Президент Шавкат Мирзиёев ташаббуси билан барпо этилган мазкур Марказни ёш авлод учун муҳим маърифат маскани сифатида баҳолади.
«Бу ерда Биринчи ва Иккинчи Ренессанс даврлари, буюк алломаларимиз қолдирган илмий мерос ва мамлакатимиз тараққиёти ҳақидаги экспозицияларни кўриб катта таассурот олдик. Бу ерга келган ҳар бир инсон ўз тарихини чуқурроқ англайди, ёшлар эса илмга ва ватанпарварликка янада кўпроқ интилади. Бу ерда олган билим ва таассуротларимизни халқимизга етказишни ўзимизга вазифа деб биламиз», — деди у.
Фарғона вилояти Қўштепа тумани бош имом-хатиби, «Муборак» жоме масжиди имом-хатиби Отабек Холмуродов Марказ кутубхонасида илмий изланишлар учун яратилган шароитларга эътибор қаратди.
Унинг таъкидлашича, электрон китоблар фонди, Брайл алифбосидаги адабиётлар, махсус тадқиқот хоналари ва ноёб манбаларнинг бир жойда жамлангани Марказни нафақат музей, балки кенг қамровли илмий ресурс марказига айлантирган.
«Бу кутубхона илмий изланиш билан шуғулланувчилар учун ҳақиқий билим маскани экан. Бу ерда яратилган шароитлар илм аҳлини янада кўпроқ изланишга ундайди. Биз бу имкониятлар ҳақида ёшларимизга албатта тарғибот олиб борамиз», — деди у.
Фарғона вилояти Бағдод тумани бош имом-хатиби Аҳмадхон Низомов эса Марказнинг илмий концепциясига алоҳида тўхталди.
Унинг фикрича, ҳар бир экспозиция ортида кенг кўламли тадқиқотлар ва илмий изланишлар мужассам бўлиб, бу ердаги интерактив муҳит ташриф буюрувчиларни фақат томошабин эмас, балки изланувчига айлантиради.
«Бу ерга бир марта келиб барчасини тўлиқ англаш қийин. Ҳар бир экспозиция ортида катта илмий меҳнат мужассам. Айниқса, алломаларимиз мероси, тадқиқот марказлари ва интерактив имкониятлар инсонни янада чуқур изланишга чорлайди. Бу маскан келажак авлод учун улкан маънавий бойлик ва Янги Ўзбекистоннинг илм-фан тараққиётига хизмат қиладиган муҳим пойдевордир», — деди у.
Ташриф якунида иштирокчилар Марказда жамланган бой илмий ва маданий мерос, рақамли экспозициялар ҳамда таълим имкониятларини кенг жамоатчилик, айниқса ёшлар ўртасида тарғиб қилиш Учинчи Ренессанс ғояларини ҳаётга татбиқ этиш, миллий ўзликни англаш ва илмий меросга қизиқишни янада кучайтиришга хизмат қилишини қайд этдилар.
Ўзбекистон мусулмонлари идораси Матбуот хизмати
