Илм йўлидаги ёшларга эътибор ва эътироф
Имом Бухорий номидаги Тошкент ислом институтида Наманган вилоятидан келиб таҳсил олаётган талабалар учун “Масофаларни яқин қилувчи мулоқот” шиори остида давра суҳбати ўтказилди.
Тадбир Ўзбекистон мусулмонлари идораси Наманган вилояти вакиллиги ташаббуси билан ташкил этилди.Наманган вилояти бош имом-хатибининг биринчи ўринбосари Обидхон домла Икромов 30 нафар талаба билан юзма-юз суҳбатлашиб, одоб-ахлоқ, устозга ҳурмат ва илм йўлида олий ҳимматли бўлиш ҳақида маънавий-ҳаётий насиҳатлар берди.
Тадбир якунида 30 нафар талабага эсдалик совғалари топширилди. Шунингдек, энг фаол 4 нафар талабага тўлов-шартномаларини қоплаш учун 10 миллион сўмдан махсус сертификатлар тақдим этилди.
***
22-январь куни «Кўкалдош» ўрта махсус ислом билим юртида Наманган вилоятидан келиб таҳсил олаётган талабалар учун «Масофаларни яқин қилувчи мулоқот» шиори остида давра суҳбати ўтказилди.
ЎМИ Наманган вилояти бош имом-хатибининг ўринбосари Акмалхон домла Аҳмедов 12 нафар талаба билан очиқ мулоқот ўтказиб, илм олишда тўғри ният, исломий одоб-ахлоқ ва устозларга ҳурмат масалаларига эътибор қаратди.
Тадбир якунида талабаларга эсдалик совғалари топширилди.
Бу каби учрашувлар ёшлар учун моддий-маънавий мадад ва юрт равнақи йўлида хизмат қилишга катта рағбат бўлиб хизмат қилади.
Ўзбекистон мусулмонлари идораси
Матбуот хизмати
Байрам шукуҳи хонадонларга кириб боряпти
Энг улуғ, энг азиз байрам – Мустақиллик шодиёналарига саноқли кунлар қолди. Айём арафасида кам таъминланган, боқувчисини йўқотган, ўзгалар кўмагига муҳтож беморлар, кексалар ҳолидан хабар олиниб, уларга байрам туҳфалари етказиб бериляпти.
Бугун Тошкент шаҳар бош имом-хатиби Абдуқаҳҳор домла Юнусов бошчиликларида имом-домлалар, ҳомийлар пойтахтимизнинг Олмазор туманидаги "Исломобод" масжидида йиғилиб, эҳтиёжманд оилалар ҳолидан хабар олишди.
«Вақф» хайрия жамоат фонди Тошкент шаҳар филиали ҳамда ҳомийлар кўмагида тайёрланган озиқ-овқатлар жамланмаси, ширинликлардан иборат эҳсонлар билан хонадонларга кириб борилди.
Кўнгли ўксик инсонлар байрам туҳфаларини олиб, азиз юртимизда ҳеч ким меҳр ва эътибордан четда эмаслигига яна бир карра амин бўлишди.
Аллоҳ таоло эҳсонларни қабул қилсин. Савобларини кўпайтириб берсин!
Тошкент шаҳар вакиллиги
Матбуот хизмати
