Рамазон туҳфалари эҳтиёжманд оилаларга етказилди
Ўзбекистон мусулмонлари идораси ҳузуридаги “Вақф” хайрия жамоат фонди ва Саудия подшоҳлиги ўртасидаги ҳамкорлик доирасида рамазон ойи муносабати билан эҳтиёжманд аҳоли қатлами учун хайрия ёрдамлари тақдим этилди. Подшоҳ Салмон кўмак ва хайрия ишлари маркази томонидан хурмо, озиқ-овқат маҳсулотлари ҳамда Қуръон китоблари ҳадя қилинди.
Жорий йилда озиқ-овқат маҳсулотлари солинган 6 150 дона қути тайёрланиб, 2 февраль куни қабул қилиниб, манзилли равишда тақсимлаш ишлари бошланди.
Тадбирда Саудия Арабистонининг Ўзбекистондаги фавқулодда ва мухтор элчиси Саъд ибн Носир Абу Ҳаймад, Подшоҳ Салмон марказининг Ўзбекистондаги координатори Носир ас-Субайъий, Ўзбекистон мусулмонлари идораси раисининг биринчи ўринбосари Ҳомиджон домла Ишматбеков, “Вақф” фонди раҳбари вазифасини бажарувчи Жаҳонгир Саламов ҳамда кенг жамоатчилик вакиллари иштирок этди.
Тадбир давомида хайрия маҳсулотларини ҳақиқий эҳтиёжмандларга етказишда ҳамкорлик қилаётган ташкилотларга миннатдорлик билдирилди ва тарқатиш жараёнига расман старт берилди.
Маълумот ўрнида, хайрия ёрдамлари республика бўйлаб Ижтимоий ҳимоя миллий агентлигининг ҳудудий бошқармалари ва фонд филиаллари орқали кам таъминланган оилалар, ногиронлиги бор шахслар парваришига муҳтож хонадонларга етказилади.
Рамазон ойи давомида ижтимоий ҳимояга муҳтож аҳолини қўллаб-қувватлашга қаратилган хайрия тадбирлари изчил давом эттирилади.
Ўзбекистон мусулмонлари идораси
Матбуот хизмати
“Azzaman” газетаси: Янги Ўзбекистонда кенг қамровли ислоҳотлар амалга оширилмоқда
Ироқнинг “Azzaman” газетасида “Ўзбекистон мустақиллигининг ўттиз беш йиллиги: Давлат барпо этишдан Учинчи Ренессанс сари” номли мақола эълон қилинди, деб хабар бермоқда “Дунё” АА.
Мақолада таъкидланишича, Ўзбекистоннинг мустақиллик йилларида босиб ўтган тараққиёт йўли, амалга оширилган кенг кўламли ислоҳотлар ҳамда мамлакатнинг халқаро майдондаги нуфузи тобора юксалиб бормоқда.
1991 йилда қўлга киритилган мустақиллик Ўзбекистон халқи ҳаётида тарихий бурилиш ясаб, миллий давлатчилик асосларини шакллантириш, иқтисодий тараққиёт пойдеворини яратиш ва ижтимоий барқарорликни таъминлаш жараёнини бошлаб берди.
2016 йилдан бошлаб Президент Шавкат Мирзиёев раҳбарлигида мамлакатда “Янги Ўзбекистон” тамойили асосида кенг қамровли ислоҳотлар амалга оширилмоқда. Ушбу жараёнда Ўзбекистон Марказий Осиёда изчил ва мувозанатли ривожланиш йўлидан бораётган давлат сифатида эътироф этилмоқда.
Муаллиф Ўзбекистонда сўнгги йилларда иқтисодиётни либераллаштириш, инвестицияларни жалб этиш, савдо-иқтисодий алоқаларни кенгайтириш, инфратузилмани модернизация қилиш, рақамлаштириш ва тадбиркорлик муҳитини яхшилаш борасида амалга оширилган чора-тадбирларга эътибор қаратган.
Мақолада аҳолини ижтимоий ҳимоя қилиш тизимини такомиллаштириш, таълим ва соғлиқни сақлаш хизматлари сифатини ошириш, ёшлар ҳамда хотин-қизларнинг жамиятдаги фаоллигини кучайтиришга қаратилган ислоҳотлар ҳақида ҳам алоҳида фикр юритилган.
Нашрда Президент Шавкат Мирзиёев томонидан илгари сурилган “Учинчи Ренессанс” ғояси Ўзбекистон тараққиётининг муҳим стратегик йўналишларидан бири сифатида баҳоланган. Унда Хоразмий, Беруний, Ибн Сино, Имом Бухорий ва Имом Термизий каби буюк алломалар етишиб чиққан юрт бугунги кунда илм-фан, инновация, технология ва инсон капиталини ривожлантириш орқали янги уйғониш даврини яратишга интилаётгани қайд этилган.
Ироқ матбуоти Ўзбекистоннинг ислом цивилизацияси тарихидаги ўрнига ҳам тўхталиб, мамлакатда бой илмий-маърифий меросни ўрганиш ва тарғиб қилишга қаратилган лойиҳалар амалга оширилаётганини таъкидлаган. Жумладан, Тошкент шаҳрида бунёд этилган Ислом цивилизацияси маркази Мовароуннаҳр алломаларининг жаҳон тамаддунига қўшган улкан ҳиссасини намойиш этувчи муҳим илмий-маданий маскан сифатида қайд этилган.
Ўзбекистон мусулмонлари идораси Матбуот хизмати