Яхши...
Муҳаббатни уйғотувчи ва бошқаларга меҳр улашувчи гўзал табассумингиз яхши.
Шаръий дўстликни бино қилиб, нафратни кетказадиган ширин сўзингиз яхши.
Мискинни шодлантирадиган, фақирни хурсанд этадиган ва очни тўйдирадиган мақбул садақангиз яхши.
Қуръонни тиловат қилиб, уни тадаббур этиб, унга амал қилиб, зикр ва истиғфор айтиб ўтиришингиз яхши.
Фарзандларингизни динимизга мувофиқ қилишингиз, суннатни ўргатишингиз ва манфаат нарсалар томон уларни йўналтиришингиз яхши.
Ибоингиз ва Аллоҳ буюрган сатри авратингиз яхши.
Аллоҳдан қўрқадиган, динини севадиган ва қадр-қимматини биладиган аёллар ила суҳбатингиз яхши.
Ота-онага яхшилик қилишингиз, қариндошлар билан алоқани мустаҳкамлашингиз, қўшниларга яхшилик қилишингиз ва етимларни кафолатингизга олишингиз яхши. Манфаатли китоб ўқишингиз яхши.
Доктор Оиз Қарнийнинг
"Дунёдаги энг бахтли аёл" китобидан
Тошкентда Ўзбекистон ва Покистон туризм соҳаси вакилларининг B2B форматидаги учрашуви бўлиб ўтди
Тошкентда Ўзбекистон ва Покистоннинг Карачи шаҳри туристик бизнеси вакиллари иштирокида B2B форматидаги учрашув бўлиб ўтди, деб хабар бермоқда “Дунё” АА мухбири.
Икки мамлакат туроператорлари ўртасидаги бевосита алоқаларни кенгайтириш, янги туризм маҳсулотларини яратишга бағишланган тадбир “Centrum Air” авиакомпанияси томонидан ташкил этилди. Учрашув Тошкент–Карачи йўналишида тўғридан-тўғри авиақатнов йўлга қўйилиши муносабати билан “FAM Trip” таништирув тури доирасида ўтказилди.
Жорий йилнинг 10–12 сентябрь кунлари бўлиб ўтган ташриф давомида Карачи туризм бизнесининг 10 нафар вакили Ўзбекистонга келди. Делегация Тошкент ва Самарқанднинг тарихий, маданий ва диққатга сазовор сайёҳлик масканлари ҳамда мамлакатнинг замонавий туризм инфратузилмаси билан танишди.
B2B форматидаги учрашувда Ўзбекистоннинг туризм салоҳияти ва ҳамкорликнинг истиқболли йўналишлари тақдимоти ўтказилди. Унда Покистон бозорида Тошкент, Самарқанд, Бухоро ва Хивани қамраб олувчи тарихий-маданий йўналишлар, Буюк Ипак йўли йўналишлари, гастрономик, экологик ва зиёрат туризмини тарғиб қилишга алоҳида эътибор қаратилди.
Икки мамлакат туризм соҳаси вакиллари қўшма турпакетларни ишлаб чиқиш, янги йўналишларни шакллантириш ҳамда Ўзбекистон ва Покистон бозорларида туристик маҳсулотларни илгари суриш масалаларини муҳокама қилди.
Таъкидланганидек, Карачи ва Тошкент ўртасида тўғридан-тўғри авиақатновнинг йўлга қўйилиши туризм йўналишлари, жумладан, “Карачи–Тошкент–Самарқанд” йўналишини ривожлантириш учун қўшимча имкониятлар яратади ва келгусида Ўзбекистоннинг бошқа сайёҳлик марказларини ҳам қамраб олиш имконини беради.
Ўзбекистон мусулмонлари идораси Матбуот хизмати
