Жиззахда қайта бунёд этилган масжид фойдаланишга топширилди
#xabar #jizzax #masjid
Бугун, 12 февраль куни Ўзбекистон мусулмонлари идораси раиси, муфтий Шайх Нуриддин Холиқназар ҳазратлари Жиззах вилояти Ғаллаорол туманида қайта қурилган “Файзуллоҳ Махдум” масжиди янги биносининг очилиш маросимида қатнашдилар.
Муфтий ҳазратлари масжид қавмини яқинлашиб келаётган Рамазони шариф ҳамда қайта қурилган гўзал ва шинам масжид билан қутлаб, муборакбод этдилар. Бугунги кунда обод бўлаётган масжидларда мўмин-мусулмонларга яратилган қулайликлар ҳақида гапирар эканлар, буларнинг барчаси тараққиётимизнинг янги даврида Аллоҳнинг бизга берган улкан неъмати эканини алоҳида қайд этдилар. Шу билан бирга, масжидни обод этиш улкан ажр-савобли амал эканини ҳадислар билан далиллаб, қурилиш ишларида кўмакчи бўлган барча юртдошларимиз ҳаққига дуо қилдилар.
Маълумот ўрнида, масжиднинг янги биноси қурилиши 2022 йил ноябрь ойида бошланган. Умумий майдони 32 сотих бўлган масжидда 600 нафардан зиёд намозхон ибодатларни эмин-эркин адо этиши мумкин. Баландлиги 6 метр, айланаси 50 диаметр бўлган гумбаз масжид кўркига кўрк қўшиб турибди. Замонавий таҳоратхонада бир вақтнинг ўзида 20 киши бемалол таҳорат олиши мумкин. Масжид замонавий иситиш ва совутиш тизимлари, овоз кучайтиргичлар билан таъминланган. Имомлар, қабулхона ва қоровул учун алоҳида хоналар қилинган.
Ўзбекистон мусулмонлари идораси
Матбуот хизмати
Бир гуруҳ диний-маърифий соҳа фидойиларига "Ўзбекистон Республикаси мустақиллигининг 35 йиллиги" эсдалик нишонлари топширилди
27 август куни Ўзбекистон Республикаси мустақиллигининг 35 йиллиги муносабати билан диний-маърифий соҳада самарали меҳнат қилиб келаётган фидойи юртдошларимизни тақдирлашга бағишланган тантанали тадбир бўлиб ўтди.
Тадбирда Ўзбекистон Республикаси Президентининг диний-маърифий масалалар бўйича маслаҳатчиси Музаффар Комилов кириш сўзи билан иштирок этди.
Кириш нутқида мамлакатимизда мустақиллик йилларида, айниқса, сўнгги йилларда диний-маърифий соҳани ривожлантириш, жамиятда тинчлик-тотувлик, миллатлараро ҳамжиҳатлик ва диний бағрикенгликни мустаҳкамлаш борасида амалга оширилаётган ислоҳотлар, шунингдек, соҳада фаолият юритаётган уламолар, имом-хатиблар, мударрислар ва фидойи ходимларнинг муносиб ҳиссаси ҳақида алоҳида таъкидланди.
Тантанали тадбир давомида диний-маърифий соҳада кўп йиллардан буён самарали меҳнат қилиб, юртимизда маънавий барқарорликни таъминлаш, ёш авлодни миллий ва умуминсоний қадриятлар руҳида тарбиялаш, аҳоли ўртасида маърифий тушунтириш ишларини олиб боришга муносиб ҳисса қўшиб келаётган бир гуруҳ фидойи юртдошларга "Ўзбекистон Республикаси мустақиллигининг 35 йиллиги" эсдалик нишонлари тантанали равишда топширилди.
Эсдалик нишонларини топшириш маросимида Ўзбекистон Республикаси Президентининг диний-маърифий масалалар бўйича маслаҳатчиси Музаффар Комилов, Дин ишлари бўйича қўмита раиси Содиқ Тошбоев, Ўзбекистон мусулмонлари идораси раиси, муфтий Шайх Нуриддин Холиқназар ҳазратлари, Ўзбекистондаги Ислом цивилизацияси маркази директори Фирдавс Абдуҳаликов, Ўзбекистон Республикаси Вазирлар Маҳкамаси масъул ходими Орифхон Зокировлар иштирок этдилар.
Тақдирлаш маросимида таъкидланганидек, мазкур эсдалик нишони мамлакатимиз тараққиётига, унинг тинчлиги ва барқарорлигига, жамиятда миллатлараро тотувлик ва диний бағрикенглик муҳитини мустаҳкамлашга, ёш авлодни миллий ва умуминсоний қадриятлар руҳида тарбиялашга муносиб ҳисса қўшаётган фидойи инсонларга билдирилган юксак эҳтиром ва эътироф рамзидир.
Тадбир якунида тақдирланганлар ўзларига билдирилган юксак ишонч ва эътибор учун миннатдорлик билдириб, мамлакатимиз тинчлиги ва равнақи йўлидаги эзгу фаолиятларини янада сидқидилдан давом эттиришларини таъкидладилар.
Барча мукофот соҳибларини самимий муборакбод этамиз!
Мустақиллигимизнинг 35 йиллиги муборак бўлсин!
Ўзбекистон мусулмонлари идораси Матбуот хизмати
