Эзгу ишда ҳамма бирдай фаоллик кўрсатяпти
Ҳурматли Президентимизнинг «Рамазон – меҳр-мурувват, аҳиллик ва шукроналик ойи» деган эзгу ғояси асосида Тошкент вилоятида эҳтиёжманд, боқувчисини йўқотган оилаларга ифторлик дастурхонлари ёзиляпти.
Бу хайрли ишда диний соҳа ходимлари билан бирга давлат ва жамоат ташкилотлари вакиллари ҳам фаол қатнашяпти.
Чиноз тумани имомлари ташаббуси билан ҳудуддаги 40 та маҳаллада эҳтиёжманд хонадон аҳллари учун ифторлик дастурхонлари ёзилди.
* * *
Қибрай тумани «Ҳожи Туроб ўғли ҳожи Абдуллоҳ» жоме масжиди имом-хатиби Баҳодир домла Тошкент давлат Аграр университети раҳбарияти, профессор-ўқитувчилари, Бобур номидаги маҳалла раиси, фаоллар билан биргаликда мазкур маҳаллада яшовчи боқувчисини йўқотган оилага ифторлик қилиб беришди.
* * *
Паркент тумани «Бешкаппа» масжиди имом-хатиби Миршавкат домла Тўйчиев муҳтож бир оилага ифторлик ташкил қилди.
* * *
Оҳангарон тумани «Санам» маҳалласида яшовчи эҳтиёжманд оилага Тошкент вилояти сув таъминоти АЖ масъуллари Оҳангарон туман имомлари билан биргаликда ихчам ва самимий ифторлик дастурхони ёзилди.
* * *
Олмалиқ шаҳар «Ҳилол» масжиди имом ноиби Муртазохон домла Абдуллахонов «Кўрпасой» маҳалласида яшовчи боқувчисини йўқотган хонадон учун ифторлик дастурхони ёзиб, уларнинг кўнглини кўтарди.
Шаҳардаги «Рамазони шариф» масжиди имом ноиби Муҳриддин домла Исмоилов Абдулла Авлоний номидаги маҳаллада яшовчи жисмоний имконияти чекланган фуқарога ҳомийлар кўмагида ифторлик учун зарур маҳсулотларни етказиб берди.
* * *
Қуйи Чирчиқ тумани «Пахтазор» маҳалласида тумандаги 34 та маҳаллада яшовчи эҳтиёжманд хонадонлар учун ифторлик дастурхонлари ёзилиб, саховат ва ҳамжиҳатлик муҳити янада мустаҳкамланди.
* * *
Тошкент вилояти божхона бошқармаси ходимлари ҳамда туман бош имом-хатиби Фарҳод домла Қорабоев Оққўрғон тумани «Қўрғонтепа» маҳалласида истиқомат қилувчи II гуруҳ ногирони, боқувчисиз ва ижтимоий ҳимояга муҳтож бир фуқарога ифторлик ташкил этишди.
* * *
Бундай мисолларни яна кўплаб келтириш мумкин.
Аллоҳ таоло эҳсонларни қабул айласин!
Тошкент вилояти вакиллиги
Матбуот хизмати
Бир гуруҳ диний-маърифий соҳа фидойиларига "Ўзбекистон Республикаси мустақиллигининг 35 йиллиги" эсдалик нишонлари топширилди
27 август куни Ўзбекистон Республикаси мустақиллигининг 35 йиллиги муносабати билан диний-маърифий соҳада самарали меҳнат қилиб келаётган фидойи юртдошларимизни тақдирлашга бағишланган тантанали тадбир бўлиб ўтди.
Тадбирда Ўзбекистон Республикаси Президентининг диний-маърифий масалалар бўйича маслаҳатчиси Музаффар Комилов кириш сўзи билан иштирок этди.
Кириш нутқида мамлакатимизда мустақиллик йилларида, айниқса, сўнгги йилларда диний-маърифий соҳани ривожлантириш, жамиятда тинчлик-тотувлик, миллатлараро ҳамжиҳатлик ва диний бағрикенгликни мустаҳкамлаш борасида амалга оширилаётган ислоҳотлар, шунингдек, соҳада фаолият юритаётган уламолар, имом-хатиблар, мударрислар ва фидойи ходимларнинг муносиб ҳиссаси ҳақида алоҳида таъкидланди.
Тантанали тадбир давомида диний-маърифий соҳада кўп йиллардан буён самарали меҳнат қилиб, юртимизда маънавий барқарорликни таъминлаш, ёш авлодни миллий ва умуминсоний қадриятлар руҳида тарбиялаш, аҳоли ўртасида маърифий тушунтириш ишларини олиб боришга муносиб ҳисса қўшиб келаётган бир гуруҳ фидойи юртдошларга "Ўзбекистон Республикаси мустақиллигининг 35 йиллиги" эсдалик нишонлари тантанали равишда топширилди.
Эсдалик нишонларини топшириш маросимида Ўзбекистон Республикаси Президентининг диний-маърифий масалалар бўйича маслаҳатчиси Музаффар Комилов, Дин ишлари бўйича қўмита раиси Содиқ Тошбоев, Ўзбекистон мусулмонлари идораси раиси, муфтий Шайх Нуриддин Холиқназар ҳазратлари, Ўзбекистондаги Ислом цивилизацияси маркази директори Фирдавс Абдуҳаликов, Ўзбекистон Республикаси Вазирлар Маҳкамаси масъул ходими Орифхон Зокировлар иштирок этдилар.
Тақдирлаш маросимида таъкидланганидек, мазкур эсдалик нишони мамлакатимиз тараққиётига, унинг тинчлиги ва барқарорлигига, жамиятда миллатлараро тотувлик ва диний бағрикенглик муҳитини мустаҳкамлашга, ёш авлодни миллий ва умуминсоний қадриятлар руҳида тарбиялашга муносиб ҳисса қўшаётган фидойи инсонларга билдирилган юксак эҳтиром ва эътироф рамзидир.
Тадбир якунида тақдирланганлар ўзларига билдирилган юксак ишонч ва эътибор учун миннатдорлик билдириб, мамлакатимиз тинчлиги ва равнақи йўлидаги эзгу фаолиятларини янада сидқидилдан давом эттиришларини таъкидладилар.
Барча мукофот соҳибларини самимий муборакбод этамиз!
Мустақиллигимизнинг 35 йиллиги муборак бўлсин!
Ўзбекистон мусулмонлари идораси Матбуот хизмати