Рамазон ойида БAA аҳолисини кўплаб имтиёзлар кутмоқда
Муборак Рамазон ойида Дубайдаги “Union Coop” гипермаркетлари тармоғи 10 000 дона маҳсулот нархини 75 фоизга пасайтиради. Чегирмалар, “Русские Эмираты” матбуоти хабарига кўра, энг истеъмол талаб озиқ-овқат ва ноозиқ-овқат маҳсулотларига нисбатан қўлланилади. Чакана сотувчиларнинг таъкидлашича, чегирмалар маҳсулот сифатига таъсир қилмайди.
Шунингдек, Бирлашган Араб Амирликлари аҳолиси Рамазон ойида бир қатор ўзгаришларни кутишмоқда. Aввало, давлат ва хусусий сектор ходимларининг иш куни икки соатга қисқартирилади. Ушбу қоида барча дин вакилларига тааллуқлидир ва бу иш ҳақининг камайишига олиб келмайди. Мактаб ўқувчилари ҳам қисқартирилган жадвалда ўқишади: душанбадан пайшанбагача соат 08:00 дан 13:00 гача, жума кунлари эса соат 8:00 дан 11:30 гача. Рўзадорлар учун жисмоний тарбия ва сузиш дарслари бекор қилинади, мусиқа дарслари чолғу асбобларидан фойдаланмасдан ўтказилади. Ўқитувчилар ҳам уй вазифасини камайтиради. Супермаркет ва озиқ-овқат дўконлари одатдагидан бироз узайтирилган вақт тартибида ишлайди. Кўпгина тамаддихоналар рўза кунлари иш вақтини саҳарликгача узайтиради.
Бирлашган Араб Aмирликлари Aстрономия жамияти раиси Иброҳим ал-Жарвоннинг маълумотларига кўра, мамлакатда Рамазон бу йилнинг 23 мартида бошланиб, Рамазон Ҳайити 21 апрель, жума куни бўлиши кутилмоқда. Шундай қилиб, Рамазон 29 кун давом этади.
Рамазон ойи рўзасини тутишнинг ўртача давомийлиги 14 соатни ташкил этиб, рўзадорлар Рамазон ойининг бошида 13 соат 30 дақиқа, охирги ҳафтасида эса деярли 14 соат 13 дақиқа рўза тутадилар.
ЎМИ Матбуот хизмати
ЮЗДАН ЗИЁД ОИЛАГА КЎМАК БЕРИЛДИ
Сайёр йиғилиш
Бир кишига кўмаклашсангиз, у қанчалик шод бўлади.
Энди бир эмас, ўн эмас, юздан зиёд оилага ҳам маънавий, ҳам маърифий, ҳам моддий кўмак берилса, қанча кишининг кўнгли кўтарилишини, сизни алқашини тасаввур қилиб кўринг-а.
Бугун Тошкент шаҳар бош имом-хатиби Абдуқаҳҳор домла Юнусов бошчиликларида пойтахтимизнинг Янги ҳаёт туманидаги «Ниёзмат ота» жоме масжидида маънавий-маърифий сайёр йиғилиш ўтказилди.
Тадбирда Тошкент шаҳар бош имом-хатиби ўринбосари Эргашали домла Рустамов, Тошкент шаҳар туманлари бош имомлари, имом-домлалар, «Ҳаж 2026» иштирокчилари қатнашдилар.
Тумандаги ижтимоий-маънавий муҳитни янада соғломлаштириш мақсадида маҳаллаларга ташриф буюрилди. Адашиб ақидаси бузуқ турли оқимлар таъсирига тушиб қолган шахслар, ажрим ёқасига келиб қолган оилалар билан ҳам суҳбатлар олиб борилди.
Катта ҳаёт тажрибасига эга ҳожи оталар, ҳожи оналар имом-хатиблар, отинойилар билан биргаликда олиб борган маърифий тарғиботлари ўз самарасини берди: юздан зиёд хонадонга ҳам маънавий, ҳам моддий ёрдам кўрсатилди.
* * *
Тошкент шаҳар бош имом-хатиби Абдуқаҳҳор домла Юнусов Янги ҳаёт туманидаги маҳаллаларга ташриф буюриб, у ердаги бир қанча хонадонларга кириб, хонадон эгаларининг қалбларига хурсандчилик улашдилар.
Қувонарлиси, янги ўқув йили арафасида ҳомийларни жалб қилган ҳолда 30 та ҳақдор хонадон соҳиблари фарзандларига сумка, ўқув қуроллари ҳадя этилди.
Юздан зиёд хонадон эгаларининг кўнгли кўтарилиб, улар эзгу ишларнинг бошида турган барча азиз инсонларнинг ҳақларига хайрли дуолар қилишди.
Тошкент шаҳар вакиллиги
Матбуот хизмати
