Муслималигингиз - шарафингиздир
Шодлик келмоғидан умидингми уздинг,
Улуғ зот тақдирига қани иймонинг?
Аллоҳнинг йўлида сизга етган барча нарса Унинг изни ила гуноҳларингизга каффорот бўлади. Расулуллоҳ соллаллоҳу алайҳи васаллам бундай деганлар:
قال رسول الله صلى الله عليه وسلم: إذا صلت المرأة خمسها وصامت شهرها وحفظت فرجها وأطاعت زوجها قيل لها ادخلي من أي أبواب الجنة شئت
«Агар аёл беш вақт намозини ўқиса, фарз рўзасини тутса, номусини сақласа ва эрига итоат қилса унга “жаннат эшикларидан хоҳлаганингдан киравер дейилади”» (Имом ибн Ҳиббон ривояти).
Бу улуғ амалларни бажарсангиз меҳрибон ва раҳмли Зотга йўлиқасиз ҳамда У сизга дунё ва охиратда ёрдам беради.
Шариат белгилаган ўринда тўхтанг. Аллоҳнинг китоби ва Расулуллоҳ соллаллоҳу алайҳи васалламнинг суннатлари йўлидан юринг. Сиз муслимасиз. Бу эса улуғ шараф, улкан фахрдир. Сиздан бошқалар эса насроний, яҳудий, динсизлик ёки умуман Исломга мухолиф бўлган миллат ва элатларда туғилган. Аммо сизни Аллоҳ муслима қилишни ихтиёр этди. Сизни Муҳаммад соллаллоҳу алайҳи васалламнинг изидан борувчилардан қилди ҳамда Оиша, Хадижа ва Фотима розияллоҳу анҳумга эргашганлардан қилди. Сизни беш маҳал намоз ўқишингиз, Рамазон рўзасини тутишингиз ва ҳар томонлама иффатингизни сақлашингиз ёқимли эмас-ми? Аллоҳни Робб, Исломни дин ва Муҳаммад алайҳиссаломни пайғамбар деб билишингиз энг қадрли неъмат, бахтингиз эмас-ми?!
Шуъла: Сизнинг динингиз олтинингиз, ахлоқингиз безагингиз ва одобингиз эса мол-мулкингиздир.
Доктор Оиз ал-Қарнийнинг
"Рўзадорлар учун дарслар" китобидан
“Discover Pakistan” телеканалида Ўзбекистоннинг маънавий-маърифий меросига бағишланган кўрсатув намойиш қилинди
Покистоннинг оммабоп “Discover Pakistan” телеканалида Ўзбекистонда бўлиб ўтган I Халқаро ислом цивилизацияси форуми бағишланган махсус кўрсатув эфирга узатилди, деб хабар бермоқда “Дунё” АА.
Урду тилида намойиш қилинган мазкур телелойиҳа I Халқаро ислом цивилизацияси форумида иштирок этган “Discover Pakistan” ижодий жамоаси томонидан тайёрланган.
Унда форумнинг асосий натижалари, унинг халқаро аҳамияти ва Ўзбекистоннинг ислом цивилизацияси меросини асраб-авайлаш ва диний-маърифий соҳадаги ислоҳотлари хусусида сўз юритилди.
Эфир давомида форум турли мамлакатлардан келган таниқли олимлар, диншунослар, давлат ва жамоат арбобларини бир майдонга жамлаган нуфузли халқаро мулоқот платформаси сифатида эътироф этилди. Муаллиф таъкидланганидек, анжуман диний бағрикенглик, миллатлараро тотувлик, маърифий ислом ғояларини кенг тарғиб қилиш, экстремизм ва радикализмга қарши маънавий-маърифий ёндашувларни мустаҳкамлашга қаратилган долзарб ташаббусларни илгари сурди.
Кўрсатувда Ўзбекистон Президенти раҳбарлигида юртимизда диний-маърифий соҳада амалга оширилаётган кенг кўламли ислоҳотлар, буюк алломалар меросини чуқур ўрганиш, илмий тадқиқотларни қўллаб-қувватлаш ҳамда ислом маданияти ва цивилизациясига оид бой меросни халқаро майдонда тарғиб этиш борасидаги ишларга алоҳида эътибор қаратилди. Самарқанд, Тошкент ва Термиз каби илм-фан марказларининг жаҳон ислом цивилизацияси тараққиётида тутган ўрни ҳақида ҳам батафсил маълумот берилди.
Кўрсатувда форум иштирокчилари бўлган бир қатор хорижий олимларнинг интервьюлари ҳам ўрин олган. Хорижий экспертлар мазкур форум мамлакатлар ва турли халқлар ўртасидаги маданий-гуманитар ҳамкорликни янада мустаҳкамлаш, диний бағрикенглик ва ўзаро ҳурмат тамойилларини кенг тарғиб қилишда муҳим аҳамият касб этганини қайд этди.
Теледастур бошловчиси айтганидек, форум доирасида қабул қилинган ташаббуслар халқаро ҳамжамият томонидан ижобий баҳоланмоқда ва улар илм-фан, таълим ва маданий мулоқотни ривожлантиришга хизмат қилади. “Ўзбекистоннинг очиқ ва конструктив ташқи сиёсати ҳамда халқаро мулоқот майдонларини ташкил этиш борасидаги саъй-ҳаракатлари юксак баҳоланди”, – дея таъкидлаган муаллиф.
“Discover Pakistan” телеканали орқали эфирга узатилган мазкур кўрсатув Покистон жамоатчилигини Ўзбекистоннинг бой маънавий-маърифий мероси ва I Халқаро ислом цивилизацияси форумининг мазмун-моҳияти билан яқиндан таништиришга хизмат қилди.
Ўзбекистон мусулмонлари идораси Матбуот хизмати
