Қабул жараёнида мурожаатларга амалий ечим берилди
Ўзбекистон мусулмонлари идораси раҳбарияти томонидан аҳоли билан ўтказилаётган очиқ ва самимий мулоқотлар фуқароларнинг муаммоларини бартараф этишда муҳим омил бўлмоқда. Ҳар бир мурожаатга алоҳида эътибор қаратилиши натижасида кўплаб масалалар жойида ва ижобий ҳал этилмоқда.
Хусусан, бугун, 4 март куни Ўзбекистон мусулмонлари идораси раисининг биринчи ўринбосари Ҳомиджон домла Ишматбеков навбатдаги фуқаролар қабулини ўтказди. Мулоқот давомида имом-хатиблар фаолияти, ҳаж ва умра зиёратлари, диний таълим тизими, оилавий муносабатлар ҳамда ижтимоий кўмакка оид мурожаатлар кўриб чиқилди.
Қабулда оилавий масалалар юзасидан келганларга шаръий ечимлар ва зарур маслаҳатлар берилган бўлса, моддий ёрдам сўраган фуқароларга белгиланган тартибда амалий кўмак кўрсатилди.
Бундай эътибор ва ғамхўрликдан мамнун бўлган юртдошларимиз Диний идора раҳбариятига миннатдорлик билдириб, хайрли дуолар қилишди. Зеро, Расулуллоҳ соллаллоҳу алайҳи ва саллам: "... Ким биродарининг ҳожатини раво қилса, Аллоҳ унинг ҳожатини раво қилади. Ким бир мусулмоннинг ташвишини аритса, Аллоҳ унинг Қиёмат кунидаги ташвишларидан бирини аритади", деб марҳамат қилганлар (Имом Бухорий ривояти).
Шу каби қабул жараёнлари ҳар ҳафтанинг чоршанба куни Ўзбекистон мусулмонлари идорасининг барча ҳудудий вакилликлари ва жоме масжидларида имом-домлалар томонидан мунтазам равишда ўтказиб келинмоқда.
Ўзбекистон мусулмонлари идораси
Матбуот хизмати
ҲАМДАРДЛИК БИЛДИРАМИЗ
Ўзбекистон мусулмонлари идораси жамоаси Имом Термизий халқаро илмий-тадқиқот маркази ходими Ҳикматуллоҳ домла Абиевга падари бузрукворининг вафоти муносабати билан таъзия билдиради.
Аллоҳ таоло марҳумнинг барча солиҳ амалларини ҳусни қабул айласин, жаннати Фирдавсдан жой ато қилсин, раҳматига олсин.
Марҳумнинг аҳли байти ва яқинларига гўзал сабр, сабрларига ажрлар ато этсин. Мусибатлари ўрнини яхшиликлар ила тўлдирсин.
Иннаа лиллааҳи ва иннаа илайҳи рожиъуун!
«Барчамиз Аллоҳникимиз ва барчамиз У Зотга қайтамиз».
Ўзбекистон мусулмонлари идораси
